Luk 22 | Ndebele | STEP | Kwasekusondela umkhosi wesinkwa esingelamvubelo, othiwa liphasika .

1 Kwasekusondela umkhosi wesinkwa esingelamvubelo, othiwa liphasika ^a. 2 Abapristi abakhulu lababhali basebedinga ukuthi bangambulala njani; ngoba babesesaba abantu. 3 USathane ^b wasengena kuJudasi othiwa nguIskariyothi ^c, owayengowenani labalitshumi lambili. 4 Wasesuka wayakhuluma labapristi abakhulu lezinduna ngokuthi angamnikela njani kubo ^d. 5 Basebethokoza, basebevumelana ukumnika imali. 6 Wasevuma, njalo wadinga ithuba elihle lokumnikela kubo lingekho ixuku ^{▼▼ ixuku: kumbe, singekho isiphithiphiti.}.

Ukumiswa kwesidlo esingcwele

7 Lwaselufika usuku lwesinkwa esingelamvubelo, okwakumele kuhlatshwe ngalo iphasika ^f. 8 Wasethuma uPetro loJohane, esithi: Hambani liyesilungisela iphasika, ukuze sidle. 9 Basebesithi kuye: Uthanda ukuthi silungise ngaphi? 10 Wasesithi kubo: Khangelani, kuzakuthi selingenile emzini, umuntu uzahlangana lani ethwele imbiza yamanzi; limlandele endlini azangena kuyo. 11 Beselisithi kumninindlu: Uthi uMfundisi kuwe: Ingaphi indlu yezihambi, lapho engingadlela khona iphasika labafundi bami? 12 Yena-ke uzalitshengisa indlu enkulu ephezulu eyendlelweyo; lilungise khona. 13 Bahamba-ke bafica njengokutsho kwakhe kubo; basebelungisa iphasika ^g.

14 Kwathi selifikile ihola, wahlala phansi ^h, labaphostoli abalitshumi lambili belaye ⁱ. 15 Wasesithi kubo: Ngokunxwanela nginxwanele ukudla lani leliphasika ngingakahlupheki; 16 ngoba ngithi kini: Kangisoze ngidle futhi kulo, lize ligcwaliseke ^j embusweni kaNkulunkulu ^k. 17 Wasethatha inkezo, esebongile wathi ^l: Thathani lokhu, beselisabelana; 18 ngoba ngithi kini: Kangisoze nginathe okwesithelo sevini, kuze kufike umbuso kaNkulunkulu ^m. 19 Wasethatha isinkwa ⁿ, esebongile ^o wasihlephuna, wabanika, esithi: Lokhu kungumzimba wami, owanikelelwa lina; lokhu kwenzeni ukungikhumbula ^p. 20 Ngokunjalo lenkezo emva kokudla, esithi: Inkezo le iyisivumelwano esitsha egazini lami, elichithelwa lina.

21 Kodwa khangelani, isandla songinikelayo silami etafuleni ^q. 22 Ngoba isibili iNdodana yomuntu ihamba ^r njengokumisiweyo ^s; kodwa maye kulowomuntu enikelwa nguye! 23 Bona basebeqala ukubuzana ukuthi kambe ngubani kubo ozakwenza lokho ^t.

Ubukhulu obuqotho

24 Kwavela lokuphikisana phakathi kwabo ^u okokuthi nguwuphi kubo ongathiwa ngomkhulu ^v. 25 Wasesithi kubo ^w: Amakhosi abezizwe azibusa ngobulukhuni, leziphathamandla zazo zithiwa ngabasizi. 26 Kodwa lina kakungabi njalo; kodwa omkhulu phakathi kwenu ^x kabe njengomncinyane ^y, longumkhokheli njengosebenzayo. 27 Ngoba nguwuphi omkhulu ^z, lowo ohleziyo ekudleni kumbe lowo osebenzayo ^aa? Kayisilowo yini ohlezi ekudleni? Kodwa mina ngiphakathi kwenu njengaye osebenzayo ^ab.

28 Lina-ke liyibo ababehlezi lami ezilingweni zami ^ac; 29 njalo mina ngilimisele ^ad umbuso, njengoba uBaba engimisele ^ae, 30 ukuthi lidle linathe etafuleni lami embusweni wami ^af, lihlale ezihlalweni zobukhosi, lisehlulela izizwe ezilitshumi lambili zakoIsrayeli ^ag.

Ukuxwayiswa kukaPetro

31 INkosi yasisithi: Simoni, Simoni, khangela, uSathane ulifunisisile ^ah, ukuze alihlungule njengamabele ^ai; 32 kodwa mina ngikukhulekele ^aj, ukuze ukholo lwakho lungapheli; wena-ke nxa usuphendukile ^ak uqinise abazalwane bakho ^al. 33 Kodwa wathi kuye: Nkosi, lentolongweni ^am lekufeni ngilungele ukuya khona lawe ^an. 34 Kodwa yena wathi: Ngiyakutshela, Petro, iqhude kaliyikukhala lamuhla, ungakaphiki kathathu ukuthi uyangazi ^ao.

35 Wasesithi kubo: Mhla ngilithuma ^ap lingelamxhaka lesikhwama ^aq lamanyathela ^ar, laswela yini ulutho? Basebesithi: Kasiswelanga lutho. 36 Wasesithi kubo: Kodwa khathesi lowo olomxhaka kawuthathe, ngokunjalo lesikhwama ^as; lalowo ongelakho, athengise isembatho sakhe, athenge inkemba. 37 Ngoba ngithi kini, kusamele kugcwaliseke kimi lokhu okulotshiweyo, ukuthi: Wabalwa kanye lezoni ^at; ngoba lalezizinto eziqondane lami zilesiphetho ^au. 38 Basebesithi: Nkosi, khangela, nanzi inkemba ezimbili. Wasesithi kubo: Kwanele.

EGetsemane

39 Wasephuma ^av waya entabeni yeMihlwathi ^aw njengokwejwayela ^ax; labafundi bakhe bamlandela. 40 Esefikile kuleyondawo, wathi kubo ^ay: Khulekani ukuthi lingangeni ekulingweni ^az. 41 Yena wasemonyuka kubo okungaba libanga lokuphosa ilitshe, waguqa phansi ngamadolo wakhuleka ^ba, 42 esithi: Baba, uba uthanda, susa linkezo kimi; kodwa-ke kungenziwa intando yami, kodwa eyakho. 43 Kwabonakala kuye ingilosi evela ezulwini imqinisa ^bb. 44 Esesesizini olunzima, wakhuleka kakhulu ^bc. Njalo izithukuthuku zakhe zaba njengamathonsi egazi zawela emhlabathini. 45 Esesukumile emkhulekweni, weza kubafundi bakhe, wabafica belele ngenxa yokudabuka, 46 wasesithi kubo: Lilaleleni? Vukani likhuleke, ukuze lingangeni ekulingweni ^bd.

Ukubotshwa kukaJesu

47 Kwathi esakhuluma ^be, khangela, ixuku, lalowo okuthiwa nguJudasi, omunye wabalitshumi lambili, ehamba phambi kwabo, wasesondela kuJesu ukumanga. 48 Kodwa uJesu wathi kuye: Judasi, uyayinikela yini iNdodana yomuntu ngokuyanga? 49 Kwathi labo ababengakuye sebebona okuzakwenzeka bathi kuye: Nkosi, sigadle yini ngenkemba ^bf? 50 Omunye wabo wasegadla inceku yompristi omkhulu, waquma indlebe yayo yokunene. 51 Kodwa uJesu waphendula wathi: Yekelani kuze kube yilokhu. Wasethinta indlebe yayo, wayisilisa ^bg.

52 UJesu wasesithi kubapristi abakhulu lezinduna zethempeli labadala ababeze kuye ^bh: Liphume njengokuyamelana lomphangi yini lilezinkemba lezinduku? 53 Nxa bengilani insuku ngensuku ethempelini, kalelulanga izandla ukumelana lami; kodwa leli lihola lenu ^bi, lamandla obumnyama ^bj.

UPetro ulandula uJesu

54 Sebembambile bamqhuba, bamusa endlini yompristi omkhulu ^bk. UPetro waselandela ekhatshana ^bl. 55 Sebebasile umlilo ^bm phakathi kweguma ^bn, sebehlezi phansi ndawonye, uPetro wahlala phakathi kwabo. 56 Kodwa incekukazi ethile imbona ehlezi emlilweni, yamjolozela ^bo, yathi: Lumuntu laye ube laye. 57 Kodwa wamphika, wathi: Mama, kangimazi. 58 Emva kwesikhatshana omunye ^bp wasembona wathi ^bq: Lawe ungomunye wabo. Kodwa uPetro wathi: Ndoda, kangisuye. 59 Sekungaba kwedlule ihola elilodwa, omunye waqinisa, esithi: Isibili laye ube laye; ngoba futhi ungumGalili. 60 Kodwa uPetro wathi: Ndoda, kangazi ukuthi uthini. Njalo khonokho esakhuluma lakhala iqhude. 61 INkosi yasiphenduka yamkhangela uPetro ^br. UPetro waselikhumbula ilizwi leNkosi, ukuthi yakhuluma njani kuye isithi: Iqhude lingakakhali, uzangiphika kathathu ^bs. 62 UPetro wasephuma phandle wakhala kabuhlungu.

UJesu uphathwa kubi

63 Lamadoda ayembambile uJesu ^bt amklolodela, amtshaya ^bu. 64 Amembesa, amtshaya ubuso, asembuza, esithi: Profetha! Ngubani okutshayileyo? 65 Akhuluma lezinye izinto ezinengi kuye ehlambaza ^bv.

UJesu uphambi kwabapristi abakhulu

66 Kwathi sekusile ^bw, abadala babantu babuthana, labapristi abakhulu lababhali ^bx, basebemusa emphakathini wabo ^by, bathi: 67 Uba unguKristu, sitshele. Wasesithi kubo: Uba ngilitshela, kalisoze likholwe; 68 njalo uba lami ngilibuza, kalisoze lingiphendule, loba lingikhulule ^bz. 69 Kusukela khathesi iNdodana yomuntu izahlala ngakwesokunene samandla kaNkulunkulu ^ca. 70 Basebesithi bonke: Kanti uyiNdodana kaNkulunkulu ^cb? Wasesithi kubo: Kutsho lina ukuthi ngiyiyo ^cc. 71 Basebesithi: Pho sisafunelani ubufakazi? Ngoba sesizizwele uqobo lwethu emlonyeni wakhe.