Mar 11:27-33, Luk 20:1-8 | Ndebele | STEP | Basebebuya bafika eJerusalema; kwathi ehambahamba ethempelini, abapristi abakhulu lababhali labadala beza kuye,

Mark 11:27-33

Amandla kaJesu

27 Basebebuya bafika eJerusalema; kwathi ehambahamba ethempelini, abapristi abakhulu lababhali labadala beza kuye, 28 bathi kuye: Izinto lezi uzenza ngaliphi igunya; njalo ngubani okunike leligunya lokuthi wenze lezizinto? 29 UJesu wasephendula wathi kubo: Lami ngizalibuza umbuzo ^{▼▼ umbuzo: kumbe, into} ube munye, njalo lingiphendule, khona ngizalitshela ukuthi ngenza lezizinto ngaliphi igunya. 30 Ubhabhathizo lukaJohane lwavela ezulwini, kumbe ebantwini? Ngiphendulani. 31 Basebekhulumisana, besithi: Uba sisithi: Ezulwini, uzakuthi: Pho kalikholwanga kuye ngani? 32 Kodwa uba sisithi: Ebantwini; besaba abantu; ngoba bonke babemphatha uJohane, ngokuthi ungumprofethi ngeqiniso. 33 Basebephendula bathi kuJesu: Kasazi. UJesu wasephendula wathi kubo: Lami kangilitsheli ukuthi ngenza lezizinto ngaliphi igunya ^b.

Luke 20:1-8

1 Kwasekusithi ngolunye lwalezonsuku ^c, efundisa abantu ethempelini etshumayela ivangeli, bamfikela abapristi abakhulu lababhali kanye labadala, 2 basebekhuluma laye, besithi: Sitshele, ukuthi izinto lezi uzenza ngaliphi igunya, kumbe ngubani okunike leligunya? 3 Wasephendula wathi kubo: Lami ngizalibuza umbuzo ube munye, njalo lingitshele: 4 Ubhabhathizo lukaJohane lwavela ezulwini, kumbe ebantwini ^d? 5 Basebezindlisana, besithi: Uba sisithi: Ezulwini; uzakuthi: Kungani-ke lingamkholwanga? 6 Kodwa uba sisithi: Ebantwini; abantu bonke bazasikhanda ngamatshe ^e; ngoba baleqiniso lokuthi uJohane wayengumprofethi ^f. 7 Basebephendula ngokuthi kabazi lapho olwavela khona. 8 UJesu wasesithi kubo: Lami kangilitsheli ukuthi ngenza lezizinto ngaliphi igunya.