Mar 12:1-12, Luk 20:9-19 | Ndebele | STEP | Waseqala ukukhuluma labo ngemifanekiso wathi : Umuntu wahlanyela isivini, wasibiyela ngothango, wagebha isikhamelo, wakha umphotshongo, wasiqhatshisa kubalimi, waya kwelinye ilizwe.

Mark 12:1-12

1 Waseqala ukukhuluma labo ngemifanekiso wathi: Umuntu wahlanyela isivini, wasibiyela ngothango, wagebha isikhamelo, wakha umphotshongo, wasiqhatshisa kubalimi, waya kwelinye ilizwe. 2 Kwathi sekuyisikhathi esifaneleyo wathuma inceku kubalimi, ukuze yemukele kubalimi okwesithelo sesivini. 3 Kodwa bayibamba bayitshaya, bayimukisa ize. 4 Wasebuya ethuma kubo enye inceku; laleyo bayitshaya ngamatshe bayilimaza ekhanda, bayixotsha isithelwe inhloni. 5 Wasebuya ethuma enye; yona basebeyibulala; lezinye ezinengi, ezinye bazitshaya, lezinye bazibulala ^a. 6 Ngakho eseselendodana eyodwa ethandekayo kuye ^b, ekucineni wayithuma kubo layo, esithi: Bazayihlonipha indodana yami. 7 Kodwa labobalimi bakhulumisana besithi: Le yindlalifa; wozani, siyibulale, lelifa lizakuba ngelethu. 8 Basebeyibamba bayibulala, bayiphosela ngaphandle kwesivini. 9 Ngakho uzakwenzani umninisivini? Uzakuza ababhubhise abalimi, anikele isivini kwabanye ^c. 10 Kalibalanga yini lumbhalo othi: Ilitshe abakhi abalalayo, yilo eseliyinhloko yengonsi; 11 lokhu kwenziwe yiNkosi, njalo kuyisimanga emehlweni ethu ^d? 12 Basebedinga ukumbamba, kodwa besaba ixuku; ngoba babesazi ukuthi wayekhulume lumfanekiso emelane labo ^e. Basebemtshiya bahamba ^f.

Luke 20:9-19

Umfanekiso wabalimi besivini

9 Waseqala ukutshela abantu lumfanekiso, esithi: Umuntu othile wahlanyela isivini, wasiqhatshisa kubalimi ^g, waya kwelinye ilizwe okwesikhathi eside ^h; 10 kwathi ngesikhathi esifaneleyo wathuma inceku kubalimi, ukuze bayinike okwesithelo sesivini; kodwa abalimi bayitshaya bayithumeza ize. 11 Wasethuma njalo enye inceku; layo bayitshaya bayiyangisa, bayithumeza ize ⁱ. 12 Wasephinda ethuma leyesithathu; layo leyo bayilimaza bayiphosela ngaphandle ^j. 13 Umninisivini wasesithi: Ngizakwenza njani? Ngizathuma indodana yami ethandekayo; mhlawumbe bebona yona bazayihlonipha. 14 Kodwa abalimi beyibona bazindlisana ^k, besithi: Le yindlalifa; wozani, siyibulale, ukuze ilifa libe ngelethu. 15 Bayiphosela ngaphandle kwesivini, bayibulala. Kambe uzakwenzani kubo umninisivini? 16 Uzakuza, ababhubhise labobalimi, anikele isivini kwabanye. Bekuzwa basebesithi: Akungabinjalo ^l! 17 Kodwa wabakhangela wathi ^m: Pho kuyini lokhu okulotshiweyo, okuthi: Ilitshe abakhi abalalayo, yilo eseliyinhloko yengonsi ⁿ? 18 Wonke owela phezu kwalelolitshe, uzaphahlazwa; kodwa loba ngubani eliwela phezu kwakhe, lizamchoboza.

Umthelo kaKesari

19 Abapristi abakhulu lababhali basebedinga ukumbamba ngezandla ngalelohola, kodwa besaba abantu; ngoba baqedisisa ukuthi wayekhuluma lumfanekiso emelane labo ^o.