Mar 12:13-37, Luk 20:20-38 | Ndebele | STEP | Basebethuma kuye abanye babaFarisi labakaHerodi , ukuze bamthiye ekukhulumeni .

Mark 12:13-37

Umthelo kaKesari

13 Basebethuma kuye abanye babaFarisi labakaHerodi ^a, ukuze bamthiye ekukhulumeni ^b. 14 Basebesiza bathi kuye: Mfundisi, siyazi ukuthi wena uqotho, njalo kawukhathali ngomuntu; ngoba kawunanzi isimo somuntu, kodwa ufundisa indlela kaNkulunkulu ngeqiniso ^c: Kuvunyelwe yini ukuthela kuKesari kumbe hatshi? 15 Sithele, kumbe singatheli? Kodwa ekwazi ukuzenzisa kwabo wathi kubo: Lingilingelani ^d? Lethani kimi udenariyo*, ukuze ngibone. 16 Basebeletha. Wasesithi kubo: Ngokabani lumfanekiso lalumbhalo ^e? Basebesithi kuye: NgokaKesari. 17 UJesu wasephendula wathi kubo: Mnikeni uKesari okukaKesari, loNkulunkulu okukaNkulunkulu. Basebemangala ngaye.

Ukuvuka kwabafileyo

18 Basebesiza kuye abaSadusi, abathi kakukho ukuvuka kwabafileyo; basebembuza, besithi: 19 Mfundisi, uMozisi wasibhalela, ukuthi: Uba umfowabo womuntu esifa, atshiye umkakhe, engatshiyi bantwana, umfowabo kamthathe umkakhe, amvusele umfowabo inzalo ^f; 20 kwakulezelamani eziyisikhombisa; owokuqala wasethatha umfazi, wafa engatshiyanga inzalo; 21 lowesibili wamthatha, wafa, laye engatshiyanga inzalo; lowesithathu kwaba njalo; 22 lalaba boyisikhombisa bamthatha, kabatshiyanga inzalo. Ekucineni kwabo bonke kwafa lomfazi. 23 Ngakho ekuvukeni kwabafileyo, mhla bevukayo, uzakuba ngumkabani kubo; lokhu abayisikhombisa babelaye engumkabo? 24 UJesu wasephendula wathi kubo: Kaliduhanga yini ngalokhu, ngoba lingayazi imibhalo, loba amandla kaNkulunkulu? 25 Ngoba mhla bevukayo ekufeni, kabathathani, njalo kabendiswa, kodwa banjengengilosi ezisemazulwini. 26 Kodwa mayelana labafileyo, ukuthi bayavuswa, kalifundanga yini egwalweni lukaMozisi, ukuthi uNkulunkulu esihlahleni wakhuluma njani kuye ^g, esithi: NginguNkulunkulu kaAbrahama, loNkulunkulu kaIsaka, loNkulunkulu kaJakobe ^h? 27 Kayisuye uNkulunkulu wabafileyo, kodwa uNkulunkulu wabaphilayo; ngakho lina liduhile kakhulu.

Umlayo wokuqala

28 Wasefika omunye wababhali, esezwile bebuzana, esebonile ukuthi ubaphendule kuhle, wambuza wathi: Yiwuphi umlayo wokuqala kuyo yonke ⁱ? 29 UJesu wasemphendula wathi: Owokuqala kuyo yonke imilayo ngowokuthi: Zwana, Israyeli: INkosi uNkulunkulu wethu, iNkosi yinye; 30 njalo wothanda iNkosi uNkulunkulu wakho ngenhliziyo yakho yonke, langomphefumulo wakho wonke, langengqondo yakho yonke, langamandla akho wonke. Yilo umlayo owokuqala ^j. 31 Lowesibili uyafanana, yilo: Wothanda umakhelwane wakho njengalokhu uzithanda wena ^k. Kawukho omunye umlayo omkhulu kulale. 32 Umbhali wasesithi kuye: Kuhle, Mfundisi, utsho okuqotho ukuthi kuloNkulunkulu oyedwa ^l, langaphandle kwakhe kakho omunye; 33 lokumthanda ngenhliziyo yonke ^m, langokuqedisisa konke, langomphefumulo wonke, langamandla wonke, lokuthanda umakhelwane njengawe ⁿ, kuyedlula yonke ^o iminikelo yokutshiswa lemihlatshelo ^p. 34 UJesu esembona ukuthi uphendule ngenhlakanipho, wathi kuye: Kawukhatshana lombuso kaNkulunkulu ^q. Njalo kakwabe kusaba khona umuntu olesibindi sokumbuza ^r.

UKristu losendo lwakhe

35 UJesu ^s, efundisa ethempelini ^t, wasephendula wathi: Batsho njani ababhali ukuthi uKristu uyindodana kaDavida? 36 Ngoba uDavida uqobo lwakhe ngoMoya oyiNgcwele wathi: INkosi yathi eNkosini yami: Hlala ngakwesokunene sami, ngize ngibeke izitha zakho zibe yisenabelo senyawo zakho ^u. 37 Ngakho uDavida uqobo lwakhe umbiza ngokuthi yiNkosi; pho uyindodana yakhe njani?

Lexuku elikhulu lamuzwa ngokuthokoza ^v.

Luke 20:20-38

20 Basebemqaphela ^w, bethuma ^x inhloli ^y, ezazitshaya ezilungileyo, ukuze bambambe ekukhulumeni ^z, ukuze bamnikele egunyeni lemandleni ^aa ombusi ^ab. 21 Bambuza-ke, besithi: Mfundisi, siyazi ukuthi wena ukhuluma ufundise ngokuqondileyo, kawemukeli buso, kodwa ufundisa indlela kaNkulunkulu ngeqiniso ^ac. 22 Sivunyelwe yini ukuthela kuKesari, kumbe hatshi ^ad? 23 Kodwa wabubona ubuqili babo ^ae, wathi kubo: Lingilingelani? 24 Ngitshengisani udenariyo*; ulomfanekiso lombhalo kabani? Basebephendula besithi: OkaKesari. 25 Wasesithi kubo: Ngakho nikani uKesari okukaKesari, loNkulunkulu okukaNkulunkulu. 26 Basebesehluleka ukumbamba ngelizwi lakhe phambi kwabantu; basebemangaliswa yimpendulo yakhe, bathula ^af.

Ukuvuka kwabafileyo

27 Kwasekusiza kuye abathile babaSadusi, abaphika besithi kakukho ukuvuka kwabafileyo, bambuza, 28 besithi: Mfundisi, uMozisi wasibhalela ukuthi: Uba kusifa umfowabo womuntu elomkakhe, lo abesesifa engelamntwana, umfowabo kamthathe umfazi, abesemvusela inzalo umfowabo ^ag. 29 Ngakho kwakulezelamani eziyisikhombisa; owokuqala wasethatha umfazi, wafa engelamntwana; 30 lowesibili wamthatha umfazi, laye lo wafa engelamntwana; 31 lowesithathu wamthatha. Kwaba njalo-ke lakwabayisikhombisa; abatshiyanga abantwana, bafa. 32 Ekucineni kwabo bonke kwafa lomfazi. 33 Ngakho ekuvukeni kwabafileyo, uzafika abe ngumkabani kubo? Ngoba abayisikhombisa babelaye engumkabo.

34 UJesu wasephendula wathi kubo: Abantwana balumhlaba bayathatha, bendiswe; 35 kodwa labo okuzathiwa bafanele ukuzuza lowomhlaba lokuvuka kwabafileyo kabathathani, kabendiswa ^ah; 36 ngoba bengelakuphinda bafe; ngoba banjengezingilosi, njalo bangabantwana bakaNkulunkulu, bengabantwana bokuvuka ^ai. 37 Kodwa ukuthi abafileyo bayavuswa, loMozisi wakutshengisa esihlahleni ^aj, lapho eyibiza iNkosi ngokuthi nguNkulunkulu kaAbrahama loNkulunkulu kaIsaka loNkulunkulu kaJakobe ^ak. 38 Futhi kayisuye uNkulunkulu wabafileyo, kodwa owabaphilayo; ngoba bonke baphilela yena ^al.