Mar 2:3-12, Luk 5:18-26 | Ndebele | STEP | Basebesiza kuye, beletha owome umhlubulo, ethwelwe ngabane .

Mark 2:3-12

3 Basebesiza kuye, beletha owome umhlubulo, ethwelwe ngabane ^a. 4 Babengelakusondela kuye ngenxa yexuku, bavula ^b uphahla lapho ayekhona, bathi sebelubhobozile behlisa ithala alele kulo owome umhlubulo ^c. 5 Njalo uJesu ebona ukholo lwabo wathi kowome umhlubulo: Ndodana, izono zakho uzithethelelwe ^d. 6 Kodwa abanye bababhali ababehlezi lapho, banakana enhliziyweni zabo ^e, bathi: 7 Ukhulumelani inhlamba enje lo? Ngubani ongathethelela izono ngaphandle koyedwa, uNkulunkulu ^f? 8 Njalo khonokho uJesu ekwazi emoyeni wakhe ukuthi babenakana njalo phakathi kwabo, wathi kubo: Linakanelani izinto lezi enhliziyweni zenu ^g? 9 Yikuphi okulula, ukuthi kowome umhlubulo: Izono zakho uzithethelelwe ^h, kumbe ukuthi: Sukuma, uthathe icansi lakho, uhambe? 10 Kodwa ukuze lazi ukuthi iNdodana yomuntu ilamandla okuthethelela izono emhlabeni (wathi kowome umhlubulo): 11 Ngithi kuwe: Sukuma uthathe icansi lakho, uye endlini yakho. 12 Njalo wahle wasukuma, wathatha icansi, waphuma phambi kwabo bonke; baze bamangala bonke ⁱ, bamdumisa uNkulunkulu, besithi: Kasizange sikubone okunje.

Luke 5:18-26

18 Njalo khangela, amadoda ethwele ngohlaka umuntu owayome umhlubulo; njalo adinga ukumngenisa ambeke phambi kwakhe; 19 kodwa engatholi indlela yokumngenisa ngenxa yexuku ^j, akhwela ephahleni lwendlu, amehlisa ezitineni zokufulela ngethala phambi kukaJesu phakathi laphakathi ^k. 20 Kwathi ebona ukholo lwawo, wathi kuye: Ndoda, izono zakho uzithethelelwe. 21 Ababhali labaFarisi basebeqala ukunakana, besithi: Ungubani lo okhuluma inhlamba ^l? Ngubani ongathethelela izono, ngaphandle kukaNkulunkulu yedwa ^m? 22 Kwathi uJesu esazi ukunakana kwabo waphendula wathi kubo: Linakanani enhliziyweni zenu? 23 Yikuphi okulula, ukuthi: Izono zakho uzithethelelwe; kumbe ukuthi: Sukuma uhambe? 24 Kodwa ukuze lazi ukuthi iNdodana yomuntu ilamandla okuthethelela izono emhlabeni (wathi koyisigoga): Ngithi kuwe: Sukuma, uthathe ithala lakho, uye endlini yakho ⁿ. 25 Njalo wahle wasukuma phambi kwabo, wathatha lokhu ayelele kukho, wasuka waya endlini yakhe ^o, edumisa uNkulunkulu ^p. 26 Lokusanganiseka kwababamba bonke, basebedumisa uNkulunkulu ^q, bagcwala ukwesaba ^r, besithi: Sibone izimanga lamuhla.