‏ Mark 8

UJesu usuthisa amadoda azinkulungwane ezine

1Ngalezonsuku kwakukhona ixuku elikhulu kakhulu, njalo lalingelakho okokudla ^a, uJesu wabizela kuye abafundi bakhe wathi kubo: 2Ngilesihelo ngexuku; ngoba sebehlezi lami insuku ezintathu, bengelalutho lokudla; 3njalo uba ngibayekela baye emakhaya abo bengadlanga, bazayatha endleleni; ngoba abanye babo bavela khatshana ^b. 4Abafundi bakhe basebemphendula bathi: Zingavela ngaphi izinkwa umuntu angasuthisa ngazo laba lapha enkangala? 5Wasebabuza wathi: Lilezinkwa ezingaki? Basebesithi: Eziyisikhombisa. 6Waselaya ixuku ukuthi lihlale phansi emhlabathini; wasethatha izinkwa eziyisikhombisa, esebongile wazihlephula wazinika abafundi bakhe, ukuthi babeke phambi kwabo; basebebeka phambi kwexuku. 7Njalo babelenhlanzana ezinlutshwana; esebusisile wathi bazibeke lazo phambi kwabo. 8Basebesidla, basutha; basebedobha imvuthu ezazisele, izitsha eziyisikhombisa. 9Lababedlile babengaba zinkulungwane ezine; wasebayekela bahamba.

10Njalo wahle wangena ^c emkhunjini labafundi bakhe ^d, weza kungxenye zeDalmanutha ^e.

Abafuna isibonakaliso

11AbaFarisi basebephuma, baqala ukuphikisana laye, befunisisa kuye isibonakaliso esivela ezulwini, bemlinga. 12Wasebubula kakhulu emoyeni wakhe wathi ^f: Lesisizukulwana sidingelani isibonakaliso? Ngiqinisile ngithi kini: Kakulasibonakaliso esizanikwa kulesisizukulwana. 13Wasebatshiya, wangena emkhunjini futhi, wasuka waya ngaphetsheya ^g.

UJesu ukhuza abafundi ngokungaqedisisi kwabo

14Kodwa abafundi babekhohliwe ukuthatha izinkwa, njalo bengelalutho emkhunjini ngaphandle kwesinkwa esisodwa. 15Wasebalaya, wathi: Nanzelelani, liqaphele imvubelo yabaFarisi ^h lemvubelo kaHerodi ⁱ. 16Basebekhulumisana, besithi: Ngoba kasilazinkwa ^j. 17UJesu esekwazi wathi kubo: Kungani likhulumisana ngokuthi kalilazinkwa ^k? Kalikaboni, njalo kaliqedisisi yini ^l? Lokhe lilenhliziyo ezilukhuni yini? 18Lilamehlo kaliboni yini? Futhi lilendlebe kalizwa yini? Njalo kalikhumbuli yini ^m? 19Mhla ngahlephulela abazinkulungwane ezinhlanu izinkwa ezinhlanu ⁿ, ladobha izitsha ezingaki ezigcwele imvuthu? Bathi kuye: Ezilitshumi lambili. 20Njalo mhla ziyisikhombisa kwabazinkulungwane ezine ^o, ladobha izitsha ezingaki ezigcwele imvuthu? Basebesithi: Eziyisikhombisa. 21Wasesithi kubo: Yinindaba lingaqedisisi ^p?

Isiphofu seBhethisayida

22Wasefika eBhethisayida ^q. Basebeletha kuye isiphofu, bamncenga ukuthi asithinte ^r. 23Wasebamba isandla sesiphofu, wasikhuphela ngaphandle komzana ^s; esekhafulele emehlweni aso ^t, wabeka izandla zakhe phezu kwaso ^u, wasibuza ukuthi ngabe sibona ulutho. 24Sasesikhangela phezulu sathi: Ngibona abantu behambahamba kungathi yizihlahla. 25Emva kwalokhu wabuya wabeka izandla zakhe phezu kwamehlo aso, wasenza sakhangela phezulu; sasesisiliswa, sabona bonke ngokucacileyo ^v. 26Wasesithuma endlini yaso, wathi: Ungangeni emzaneni ^w, njalo ungatsheli muntu loyedwa emzaneni ^x.

Isivumo sokholo sikaPetro

27UJesu wasephuma labafundi bakhe baya emizaneni yeKesariya yeFiliphu ^y; besendleleni wababuza abafundi bakhe, wathi kubo: Abantu bathi ngingubani? 28Basebephendula bathi: UJohane uMbhabhathizi; labanye: UElija; labanye: Omunye wabaprofethi. 29Yena wasesithi kubo: Lina-ke lithi ngingubani? UPetro wasephendula wathi kuye: Wena unguKristu. 30Wasebalayisisa ^z ukuthi ^aa bangatsheli muntu ngaye ^ab.

UJesu ukhuluma ngokufa lokuvuka kwakhe

31Waseqala ukubafundisa ^ac, ukuthi iNdodana yomuntu imele ukuhlupheka izinto ezinengi, ilahlwe ngabadala labapristi abakhulu lababhali, ibulawe, ibuye ivuke emva kwensuku ezintathu ^ad. 32Waselikhuluma lelilizwi obala. UPetro wasemthatha waqala ukumkhuza. 33Kodwa etshibilika, wabona abafundi bakhe, wamkhuza uPetro, wathi: Suka ngemva kwami, Sathane; ngoba kawucabangi ngezinto zikaNkulunkulu, kodwa ngezabantu.

Ukuhlutshwa kukaJesu lokwabamlandelayo

34Kwathi esebizele kuye ixuku kanye labafundi bakhe, wathi kubo: Uba umuntu ethanda ukuza ngemva kwami, kazidele, athathe isiphambano sakhe, angilandele. 35Ngoba loba ngubani othanda ukusindisa impilo yakhe, izamlahlekela; kodwa loba ngubani olahlekelwa yimpilo yakhe ngenxa yami levangeli, yena uzayisindisa. 36Ngoba kuzamsizani umuntu, nxa ezuza umhlaba wonke, kodwa alahlekelwe ngumphefumulo wakhe? 37Kumbe umuntu uzanikani kube lihlawulo lomphefumulo wakhe ^ae? 38Ngoba loba ngubani olenhloni ngami langamazwi ami ^af kulesisizukulwana esifebayo lesonakeleyo, iNdodana yomuntu layo izakuba lenhloni ngaye ^ag, nxa isiza enkazimulweni kaYise kanye lengilosi ezingcwele ^ah.