Matthew 11:14-30

14njalo uba livuma ukukwemukela, lo unguElija obezakuza ^a. 15Olendlebe zokuzwa, akezwe ^b.

16Kodwa ngizasifananisa lani lesisizukulwana? Sifanana labantwana abahlezi emamakethe ^c, bememeza kubangane babo ^d, 17besithi: Salitshayela umhlanga, kodwa kalisinanga; salililela, kodwa kalikhalanga ^e. 18Ngoba uJohane wafika engadli ^f enganathi ^g, basebesithi: Uledimoni. 19INdodana yomuntu yafika isidla inatha, basebesithi: Khangelani, umuntu oligovu lesinathi sewayini, umngane wabathelisi ^h lezoni ⁱ. Kodwa inhlakanipho ithiwa ilungile ^j ngabantwana bayo ^k.

Ukusolwa kwemizi engaphendukanga

20Waseqala ukusola imizi okwakwenziwe phakathi kwayo ubunengi bemisebenzi yakhe yamandla, ngoba ingaphendukanga, wathi: 21Maye kuwe, Korazini ^l! Maye kuwe, Bhethisayida ^m! Ngoba uba kwakwenziwe eTire leSidoni ⁿ imisebenzi yamandla eyenziwe kini ^o, ngabe kade baphenduka emasakeni ^p lemlotheni ^q. 22Kodwa ngithi kini: Kuzakuba ngcono ^r eTire leSidoni ngosuku lwesigwebo kulakini ^s. 23Lawe, Kapenawume, ophakanyiselwe ezulwini ^t, uzaphoselwa phansi esihogweni ^u; ngoba uba yayenziwe eSodoma imisebenzi yamandla eyenziwe kuwe, ngabe basekhona kuze kube lamuhla ^v. 24Kodwa ngithi kini: Kuzakuba ngcono kulizwe leSodoma ngosuku lwesigwebo, kulakuwe ^w.

UJesu udumisa uYise; unxusa abahluphekileyo beze kuye

25Ngalesosikhathi uJesu ^x waphendula wathi: Ngiyakubonga ^y, Baba, Nkosi yezulu lomhlaba ^z, ngoba uzifihlile lezizinto ^aa kwabahlakaniphileyo labaqedisisayo ^ab, kodwa wazembulela izingane; 26yebo Baba, ngoba ngokunjalo kwaba kuhle phambi kwakho ^ac. 27Konke kwanikelwa kimi nguBaba; njalo kakho oyaziyo iNdodana, ngaphandle kukaYise; kakho futhi omaziyo uYise ngaphandle kweNdodana, njalo loba ngubani iNdodana ethanda ukumembulela ^ad.

28Wozani kimi lonke elikhatheleyo ^ae lelisindiweyo, njalo mina ngizaliphumuza ^af. 29Thathani ijogwe lami lilibeke phezu kwenu ^ag lifunde kimi ^ah, ngoba ngimnene ngithobekile enhliziyweni ^ai; njalo lizathola ukuphumula emiphefumulweni yenu ^aj; 30ngoba ijogwe lami libutshelezi, lomthwalo wami ulula ^ak.

Matthew 12

UJesu uchasisa umlayo wesabatha

1Ngalesosikhathi uJesu wadabula emasimini amabele ngesabatha; njalo abafundi bakhe babelambile ^al, baqala ukukha izikhwebu, badla ^am. 2Kodwa abaFarisi bekubona bathi kuye: Khangela, abafundi bakho benza okungavunyelwanga ukwenziwa ngesabatha ^an. 3Kodwa wathi kubo: Kalifundanga yini uDavida akwenzayo ^ao, mhla elambile yena lababelaye; 4ukuthi wangena njani endlini kaNkulunkulu, wadla izinkwa zokubukiswa, ayengavunyelwa ukuzidla, ngitsho lababelaye ^ap, ngaphandle kwabapristi bodwa ^aq? 5Ingabe kalifundanga yini emlayweni, ukuthi ngamasabatha abapristi bayalona isabatha ethempelini, bangabi lacala ^ar? 6Kodwa ngithi kini: Kukhona lapha omkhulu kulethempeli ^as. 7Kodwa aluba belisazi ukuthi kutshoni ukuthi ^at: Ngifisa isihawu hatshi umhlatshelo, ngabe kalibalahlanga abangelacala. 8Ngoba iNdodana yomuntu iyiNkosi leyesabatha ^au.

UJesu usilisa ngesabatha

9Futhi wasuka lapho wangena esinagogeni labo; 10njalo khangela, kwakukhona umuntu olesandla esitshwabheneyo ^av; basebembuza besithi: Kuvunyelwe yini ukusilisa ngamasabatha? ukuze bambeke icala. 11Kodwa wathi kubo: Nguwuphi umuntu phakathi kwenu, elemvu eyodwa, futhi uba yona iwele emgodini ngesabatha, ongayikuyibamba ayikhuphule ^aw? 12Umuntu uyedlula-ke kangakanani imvu ^ax! Ngakho kuvunyelwe ukwenza okuhle ngamasabatha. 13Wasesithi kumuntu: Yelula isandla sakho. Waseselula, sasesisiliswa saphila njengesinye.

Inceku ekhethiweyo

14Basebephuma abaFarisi becebisana ngaye, ukuthi bangambulala njani ^ay. 15Kodwa uJesu esekwazi wasuka lapho ^az; amaxuku amakhulu asemlandela, wasebasilisa bonke ^ba. 16Wasebalayisisa ukuthi bangamvezi ^bb; 17ukuze kugcwaliseke okwakhulunywa nguIsaya umprofethi, ukuthi: 18Khangela, inceku yami engiyikhethileyo; othandekayo wami ^bc othokoza ngaye umphefumulo wami; ngizabeka uMoya wami phezu kwakhe, njalo uzatshumayela ukwahlulela kwabezizwe. 19Kayikubangisa, kayikumemeza, njalo kakho ozalizwa ilizwi lakhe ezindleleni. 20Umhlanga ofecekileyo kayikuwephula, lentambo yesibane ethunqayo kayikuyicitsha, aze aphumelelise ukwahlulela ^bd ekunqobeni ^be. 21Lezizwe zizathemba ebizweni lakhe ^bf.

Isono sokuhlambaza

22Kwasekulethwa kuye ongenwe lidimoni, eyisiphofu lesimungulu; wasemsilisa, kwaze kwathi isiphofu esiyisimungulu sakhuluma njalo sabona ^bg. 23Asemangala amaxuku wonke athi ^bh: Lo kayisiyo yini iNdodana kaDavida ^bi? 24Kodwa abaFarisi sebezwile bathi: Lumuntu kakhuphi amadimoni, ngaphandle ngoBhelezebhule inkosi yamadimoni ^bj. 25Kodwa uJesu, eseyazi imicabango yabo, wathi kubo ^bk: Wonke umbuso owehlukene umelene lawo ngokwawo uyachitheka; lawo wonke umuzi kumbe indlu eyehlukene imelene layo ngokwayo ingeze yema. 26Njalo uba uSathane ekhupha uSathane, wehlukene emelene laye ngokwakhe; pho umbuso wakhe uzakuma njani ^bl? 27Futhi uba mina ngikhupha amadimoni ngoBhelezebhule, amadodana enu akhupha ngobani? Ngakho wona azakuba ngabagwebi benu ^bm. 28Kodwa uba mina ngikhupha amadimoni ngoMoya kaNkulunkulu, umbuso kaNkulunkulu usufikile kini ^bn. 29Kumbe umuntu angangena njani endlini yesiqhwaga aphange impahla yaso, ngaphandle kokuthi asibophe kuqala isiqhwaga ^bo? Abesephanga-ke indlu yaso ^bp. 30Ongelami, umelene lami, longabuthi lami, uyachithiza ^bq.

31Ngakho ngithi kini: Abantu bazathethelelwa sonke isono lokuhlambaza ^br; kodwa ukuhlambaza uMoya kakuyikuthethelelwa abantu ^bs. 32Lalowo okhuluma ilizwi elimelana leNdodana yomuntu ^bt, uzathethelelwa ^bu; kodwa lowo okhuluma emelana loMoya oyiNgcwele, kayikuthethelelwa, kungeyisikho kulesisikhathi loba kwesizayo.

33Loba yenzani isihlahla sibe ngesilungileyo, lesithelo saso sibe ngesilungileyo, kumbe lenze isihlahla sibe sibi, lesithelo saso sibe sibi ^bv, ngoba isihlahla saziwa ngesithelo ^bw. 34Nzalo yezinyoka, lingakhuluma njani izinto ezinhle, libabi ^bx? Ngoba umlomo ukhuluma ngokugcwala kwenhliziyo. 35Umuntu olungileyo ukhupha izinto ezilungileyo kokuligugu elilungileyo lenhliziyo; lomuntu omubi ukhupha izinto ezimbi kokuligugu elibi ^by. 36Kodwa ngithi kini: Lonke ilizwi eliyize abalikhulumayo abantu, bazaziphendulela ngalo ngosuku lokwahlulela. 37Ngoba ngamazwi akho uzalungisiswa, langamazwi akho uzalahlwa ^bz.

Abafuna isibonakaliso

38Abanye bababhali labaFarisi basebephendula, bathi: Mfundisi, sifuna ukubona isibonakaliso esivela kuwe ^ca. 39Kodwa waphendula wathi kubo: Isizukulwana esibi ^cb lesifebayo sidinga isibonakaliso; kodwa kasiyikunikwa isibonakaliso, ngaphandle kwesibonakaliso sikaJona umprofethi ^cc. 40Ngoba njengalokhu uJona waba sesiswini sensikabayitshiye insuku ezintathu lobusuku obuthathu, ngokunjalo iNdodana yomuntu izakuba semathunjini omhlaba insuku ezintathu lobusuku obuthathu ^cd. 41Amadoda eNineve ^ce azasukuma ekugwetshweni kanye lalesisizukulwana ^cf, asilahle ^cg; ngoba aphenduka ngokutshumayela kukaJona ^ch; njalo khangelani, omkhulu kuloJona ulapha ^ci. 42Indlovukazi yeningizimu izasukuma ekugwetshweni kanye lalesisizukulwana ^cj, isilahle; ngoba yavela emikhawulweni yomhlaba ukuzakuzwa inhlakanipho kaSolomoni ^ck; njalo khangelani, omkhulu kuloSolomoni ulapha ^cl.

Ukuphenduka okungaphelelanga

43Kodwa nxa umoya ongcolileyo esephumile emuntwini ^cm, uyahamba adabule indawo ezomileyo, edinga ukuphumula, kodwa engakutholi. 44Abesesithi: Ngizabuyela endlini yami engaphuma kuyo; njalo esefikile ayifice ize, ithanyelwe ^cn, njalo ilungisiwe. 45Abesehamba athathe kanye laye abanye omoya abayisikhombisa ababi kulaye uqobo, besebengena bahlale khona ^co; njalo ukucina kwalowomuntu kube kubi kulokuqala. Kuzakuba njalo lakulesisizukulwana esibi ^cp.

Izihlobo zikaJesu eziyizo

46Kwathi esakhuluma emaxukwini, khangela, unina ^cq labafowabo bema ngaphandle, bedinga ukukhuluma laye. 47Omunye wasesithi kuye: Khangela, unyoko labafowenu bemi phandle, bedinga ukukhuluma lawe. 48Kodwa waphendula wathi komtshelileyo: Ngubani umama? Labafowethu ngobani? 49Waseselulela isandla sakhe kubafundi bakhe wathi: Khangelani, umama labafowethu ^cr. 50Ngoba loba ngubani owenza intando ^cs kaBaba osemazulwini, nguye ongumfowethu lodadewethu lomama ^ct.

Matthew 13:1-2

Umfanekiso womhlanyeli

1Kwathi ngalolosuku uJesu waphuma endlini ^cu wahlala phansi elwandle ^cv. 2Kwasekubuthana kuye amaxuku amakhulu ^cw, waze wangena ^cx emkhunjini wahlala phansi; lexuku lonke lema ekhunjini ^cy.

Mark 4:1-12

1Wasebuya waqala ukufundisa ngaselwandle; kwasekubuthana kuye ixuku elikhulu ^cz, waze wangena emkhunjini wahlala olwandle; njalo ixuku lonke lalisemhlabathini ngaselwandle ^da.

2Wasebafundisa izinto ezinengi ngemifanekiso, lekufundiseni kwakhe wathi kubo ^db: 3Lalelani; khangelani, kwaphuma umhlanyeli ukuyahlanyela. 4Kwasekusithi ekuhlanyeleni, enye yawela eceleni kwendlela, kwasekufika inyoni zezulu zayidla zayiqeda. 5Njalo enye yawela emhlabathini olamatshe, lapho eyayingelamhlabathi omnengi khona; futhi yahle yamila, ngoba yayingelakutshona komhlabathi; 6kwathi ekuphumeni kwelanga yahangulwa yabuna ngoba yayingelampande. 7Enye yasiwela emeveni, ameva asekhula, ayiminyanisa, futhi ayithelanga isithelo. 8Njalo enye yawela emhlabathini omuhle; yathela isithelo esakhulayo sanda, yazala enye amatshumi amathathu, lenye amatshumi ayisithupha, lenye ikhulu. 9Wasesithi kubo: Olendlebe zokuzwa, akezwe.

Umsebenzi wemifanekiso

10Kwathi eseyedwa, labo ababemphahlile kanye labalitshumi lambili bambuza ngomfanekiso. 11Wasesithi kubo: Kuphiwe kini ukwazi imfihlo yombuso kaNkulunkulu; kodwa labo abangaphandle ^dc benzelwa izinto zonke ngemifanekiso; 12ukuze bebona babone, bangabonisisi; njalo besizwa bezwe, bangaqedisisi; hlezi loba nini baphenduke, bathethelelwe izono zabo ^dd.