Mat 14:13-21, Luk 9:10-17, Joh 6:1-13 | Ndebele | STEP | UJesu esezwile wasuka lapho ngomkhumbi waya endaweni eyinkangala eyedwa; kodwa amaxuku e ku zwa amlandela ngenyawo evela emizini .

Matthew 14:13-21

UJesu usuthisa amadoda azinkulungwane ezinhlanu

13 UJesu esezwile ^a wasuka lapho ngomkhumbi waya endaweni eyinkangala eyedwa; kodwa amaxuku ekuzwa amlandela ngenyawo evela emizini ^b. 14 UJesu esephumile wabona ixuku elikhulu, waba lesihelo ngabo ^c, wasilisa abagulayo babo ^d.

15 Kwathi sekuhlwile abafundi bakhe beza kuye, bathi: Lindawo iyinkangala, lesikhathi sesihambile ^e; liyekele ixuku lihambe, ukuze baye emizaneni bazithengele ukudla ^f. 16 Kodwa uJesu wathi kubo: Kakuswelekanga ukuthi bahambe; banikeni lina ukuthi badle. 17 Kodwa bathi kuye: Kasila lapha ngaphandle kwezinkwa ezinhlanu lenhlanzi ezimbili. 18 Wasesithi: Ziletheni lapha kimi. 19 Waselaya amaxuku ukuthi ahlale phansi etshanini, wathatha izinkwa ezinhlanu lenhlanzi ezimbili ^g, wakhangela phezulu ezulwini ^h, wabusisa, esezihlephule wabanika abafundi izinkwa, labafundi bapha amaxuku ⁱ. 20 Basebesidla bonke, basutha; badobha imvuthu ezazisele, izitsha ezigcweleyo ezilitshumi lambili ^j. 21 Lalabo abasebedlile babengamadoda angaba zinkulungwane ezinhlanu, ngaphandle kwabesifazana labantwana.

Luke 9:10-17

UJesu usuthisa amadoda azinkulungwane ezinhlanu

10 Abaphostoli ^k sebebuyile bambikela konke ababekwenzile. Wasebathatha ^l, wahamba labo bebodwa waya endaweni eyinkangala eyomuzi othiwa yiBhethisayida ^m. 11 Kwathi amaxuku esekwazi, amlandela; wasewemukela, wakhuluma lawo ngombuso kaNkulunkulu ⁿ, wabasilisa labo abaswele ukusiliswa ^o.

12 Ilanga laseliqala ukutshona ^p; abalitshumi lambili basebesiza bathi kuye: Yekela ixuku lihambe, ukuze baye emizaneni lezigabeni ezizingelezeleyo bangenise khona, bathole ukudla ^q; ngoba lapha sisendaweni eyinkangala. 13 Kodwa wathi kubo: Banikeni lina bona ukuthi badle. Bathi-ke: Asilakho okwedlula izinkwa ezinhlanu lenhlanzi ezimbili, ngaphandle kokuthi thina siyebathengela ukudla bonke lababantu. 14 Ngoba kwakukhona amadoda angaba zinkulungwane ezinhlanu. Wasesithi kubafundi bakhe: Bahlaliseni phansi ngezigaba ngamatshumi amahlanu. 15 Basebesenza njalo, babahlalisa phansi bonke. 16 Wasezithatha izinkwa ezinhlanu lenhlanzi ezimbili, wakhangela phezulu ezulwini, wazibusisa, wazihlephula, wazinika abafundi ukuthi babeke phambi kwexuku. 17 Basebesidla basutha bonke; kwadojwa imvuthu ezazisele kubo, izitsha ezilitshumi lambili.

John 6:1-13

1 Emva kwalezizinto uJesu wasuka waya ^r ngaphetsheya kolwandle lweGalili ^s, lweTiberiyasi ^t. 2 Laselimlandela ixuku elikhulu, ngoba babebone izibonakaliso zakhe azenza kulabo abagulayo ^u. 3 UJesu wasesenyukela entabeni ^v, wahlala phansi khona labafundi bakhe ^w. 4 Iphasika, umkhosi wamaJuda, laselisondele ^x.

5 Kwathi uJesu ephakamisa amehlo, wasebona ixuku elikhulu lisiza kuye ^y, wathi kuFiliphu ^z: Sizathenga ngaphi izinkwa, ukuze laba badle? 6 Njalo watsho lokhu emhlola, ngoba yena wayekwazi azakwenza ^aa. 7 UFiliphu wamphendula wathi: Izinkwa zabodenariyo* abangamakhulu amabili zingebanele, ukuthi wonke ngamunye wabo azuze ingcosana ^ab. 8 Omunye wabafundi bakhe, uAndreya umfowabo kaSimoni Petro ^ac, wathi kuye: 9 Kukhona umfanyana lapha, olezinkwa ezinhlanu zebhali* lenhlanzana ezimbili ^ad; kodwa ziyini kwabanengi kangaka? 10 Kodwa uJesu wathi: Hlalisani abantu phansi. Kwakukhona utshani obunengi kuleyondawo ^ae. Ngakho amadoda ahlala phansi inani lawo lalingaba zinkulungwane ezinhlanu ^af. 11 UJesu wasezithatha izinkwa, esebongile wazinika abafundi ^ag, labafundi kulabo ababehlezi phansi; ngokunjalo lenhlanzana ngangokufuna kwabo ^ah. 12 Bathi sebesuthi, wathi kubafundi bakhe: Buthani imvuthu eziseleyo, ukuze kungachitheki lutho. 13 Basebebutha, bagcwalisa izitsha ezilitshumi lambili ngemvuthu zezinkwa ezinhlanu zebhali, ezasalayo kulabo abadlayo ^ai.