Mat 9:18-26, Mar 5:22-43 | Ndebele | STEP | Kwathi esakhuluma lezizinto kubo , khangela, kwafika umphathi othile waguqa phambi kwakhe, wathi: Indodakazi yami isanda ukufa; kodwa woza ubeke isandla sakho phezu kwayo, njalo izaphila .

Matthew 9:18-26

Indodakazi kaJayirosi ivuswa ekufeni. Owesifazana owayelomopho uyasiliswa

18 Kwathi esakhuluma lezizinto kubo ^a, khangela, kwafika umphathi othile waguqa phambi kwakhe, wathi: Indodakazi yami isanda ukufa; kodwa woza ubeke isandla sakho phezu kwayo, njalo izaphila ^b. 19 Wasesukuma uJesu wamlandela, labafundi bakhe.

20 Njalo khangela, owesifazana owayelomopho okweminyaka elitshumi lambili ^c, weza ngemuva kwakhe, wathinta umphetho wesembatho sakhe. 21 Ngoba wathi ngaphakathi kwakhe: Aluba ngithinta nje isembatho sakhe, ngizasindiswa ^d. 22 Kodwa uJesu etshibilika embona, wathi: Mana isibindi, ndodakazi; ukholo lwakho lukusindisile. Owesifazana wasesila kusukela ngalelohola ^e.

23 UJesu wasefika endlini yomphathi, wabona abakhalisa imihlanga lexuku liphithizela ^f, 24 wathi kubo: Dedani; ngoba intombazana kayifanga ^g, kodwa ilele. Basebemhleka usulu ^h. 25 Kodwa ixuku selikhutshiwe, wangena wabamba isandla sayo, intombazana yasivuka. 26 Indumela yalokho yasiphumela kulelolizwe lonke ⁱ.

Mark 5:22-43

22 Njalo khangela, kwafika ^j omunye wabaphathi besinagoge, uJayirosi ngebizo ^k; embona, wawa phansi enyaweni zakhe, 23 wamncenga kakhulu, esithi: Indodakazi yami encane isiphela; ake uze ubeke izandla phezu kwayo, ukuze isindiswe, njalo izaphila ^l. 24 Wasehamba laye; ixuku elikhulu laselimlandela, lamminyezela.

25 Njalo owesifazana othile owayelomopho wegazi okweminyaka elitshumi lambili, 26 ehluphekile kakhulu kubelaphi abanengi, echithile konke ayelakho, engasizakalanga, kodwa kulokhu kumqinela, 27 esezwile ngoJesu, weza exukwini ngemuva, wathinta isembatho sakhe; 28 ngoba wathi: Aluba ngithinta izembatho zakhe nje, ngizasindiswa. 29 Futhi wahle woma umthombo wegazi lakhe, wasesizwa emzimbeni ukuthi usilile esifweni ^m. 30 Njalo uJesu wahle wazi phakathi kwakhe ukuthi amandla aphumile kuye, watshibilika esexukwini, wathi: Ngubani othinte izembatho zami ⁿ? 31 Abafundi bakhe basebesithi kuye: Uyabona ixuku likuminyezela, kodwa uthi: Ngubani ongithintileyo? 32 Wasethalaza ukuthi ambone owenze lokhu. 33 Kodwa owesifazana esesaba ethuthumela, ekwazi okwenzekileyo kuye, weza wawa phambi kwakhe, wamtshela iqiniso lonke. 34 Wasesithi kuye: Ndodakazi, ukholo lwakho lukusindisile; hamba ngokuthula, siliswa esifweni sakho ^o.

35 Esakhuluma, kwafika abanye bomphathi wesinagoge ^p, bathi: Indodakazi yakho isifile; usamkhathazelani uMfundisi ^q? 36 Kwahle kwathi uJesu esizwa ilizwi elikhulunywayo wathi kumphathi wesinagoge ^r: Ungesabi, kholwa kuphela ^s. 37 Futhi kavumelanga muntu ukuthi amlandele, ngaphandle kukaPetro loJakobe ^t loJohane umfowabo kaJakobe ^u. 38 Wafika-ke endlini yomphathi wesinagoge ^v, wabona isiphithiphithi, labakhalayo labalilayo kakhulu, 39 esengenile wathi kubo: Liphithizelelani, likhala? Umntwana kafanga, kodwa ulele. 40 Basebemhleka usulu. Kodwa yena, esebakhuphile bonke, wathatha uyise womntwana omncane lonina lalabo ababelaye, wangena lapho okwakulele khona umntwana omncane ^w. 41 Wabamba isandla somntwana omncane, wathi kuye: "Thalitha, kumi" ^x; okuyikuthi ngokuphendulelwa: Wena ntombazana encane, ngithi kuwe, vuka ^y. 42 Njalo yahle yavuka intombazana encane, yahamba, ngoba yayileminyaka elitshumi lambili; basebesanganiseka ngokusanganiseka okukhulu ^z. 43 Wasebalayisisa kakhulu ukuthi lokhu kungaziwa muntu; wathi kayinikwe ukudla ^aa.