‏ Exodus 21

1Lezi yizahlulelo ozazibeka-ke phambi kwabo ^a.

2Uba uthenga isigqili esingumHebheru ^b, sizasebenza iminyaka eyisithupha, kodwa ngowesikhombisa sizaphuma sikhululekile ngesihle. 3Uba safika sisodwa, sizaphuma sisodwa; uba sithethe, umkaso uzaphuma laso. 4Uba inkosi yaso yasinika umfazi, asizalele amadodana kumbe amadodakazi, umfazi labantwana bakhe bazakuba ngabenkosi yakhe, njalo sizaphuma sisodwa. 5Kodwa uba isigqili sisitsho lokutsho ukuthi: Ngiyayithanda inkosi yami, umkami labantwana bami, kangiyikuphuma ngikhululekile ^c; 6inkosi yaso izasiletha kubahluleli ^d, ibisisiletha emnyango loba emgubazini, njalo inkosi yaso izabhoboza indlebe yaso ngosungulo ^e, siyisebenzele-ke kuze kube nininini.

7Njalo uba umuntu ethengisa indodakazi yakhe ukuze ibe yisigqilikazi ^f, kayiyikuphuma njengalokhu izigqili ziphuma ^g. 8Uba singayithokozisi inkosi yaso ezimisele sona, izasenza sihlengwe; kayiyikuba lamandla okusithengisa esizweni semzini, njengoba esiphethe ngenkohliso. 9Kodwa uba esimisela indodana yayo, izakwenza kuso njengelungelo lamadodakazi. 10Uba ezithathela omunye, ukudla kwaso, isigubuzelo saso lokuhlala kwaso ndawonye kayiyikukunciphisa ^h. 11Kodwa uba ingasenzeli lezizinto ezintathu, sizaphuma ngesihle ngaphandle kwemali.

Imithetho emayelana labalimazayo lababulalayo

12Otshaya umuntu aze afe, uzabulawa lokubulawa ⁱ. 13Kodwa uba ebengamcathamelanga ^j, kodwa uNkulunkulu ekwenze wahlangana lesandla sakhe, ngizakumisela indawo ukuthi abalekele kuyo ^k. 14Kodwa uba umuntu esukela umakhelwane wakhe ambulale ngobuqili ^l, uzamsusa elathini lami ukuze afe ^m.

15Otshaya uyise kumbe unina, uzabulawa lokubulawa.

16Loweba umuntu ⁿ, amthengise ^o, loba eficwa esandleni sakhe ^p, uzabulawa lokubulawa.

17Othuka uyise kumbe unina ^q, uzabulawa lokubulawa.

18Njalo nxa amadoda esilwa, enye itshaye enye ngelitshe kumbe ngenqindi, kodwa ingafi kodwa ilale embhedeni, 19uba ilulama itotobe phandle ngodondolo lwayo ^r, leyo eyitshayileyo izakhululwa. Kodwa izahlawulela isikhathi sokungasebenzi kwayo, izayelaphisa lokuyelaphisa.

20Uba-ke umuntu etshaya isigqili sakhe kumbe isigqilikazi sakhe ngenduku size sife ngaphansi kwesandla sakhe, sizaphindiselwa lokuphindiselwa. 21Kanti nxa silulama usuku kumbe insuku ezimbili, kayikuphindiselwa, ngoba siyimali yakhe ^s.

22Njalo nxa amadoda esilwa, atshaye owesifazana okhulelweyo aze aphume umntwana wakhe, kodwa kungelangozi yokufa, izahlawuliswa lokuhlawuliswa, njengokubeka kwendoda yomfazi phezu kwayo, izahlawula ^tnjengokumiswe ngabahluleli ^u. 23Kodwa uba kulengozi yokufa, uzanika umphefumulo ngomphefumulo ^v, 24ilihlo ngelihlo ^w, izinyo ngezinyo, isandla ngesandla, unyawo ngonyawo, 25ukutshiswa ngokutshiswa, inxeba ngenxeba ^x, umvimvinya ngomvimvinya.

26Uba-ke umuntu etshaya ilihlo lesigqili sakhe kumbe ilihlo lesigqilikazi sakhe alibulale, uzasiyekela sihambe sikhululekile ngenxa yelihlo laso. 27Uba-ke etshaya izinyo lesigqili kumbe izinyo lesigqilikazi likhumuke, uzasiyekela sihambe sikhululekile ngenxa yezinyo laso.

Imithetho emayelana lezinkabi ezihlabayo

28Njalo uba inkabi ihlaba owesilisa kumbe owesifazana abesesifa, inkabi izakhandwa lokukhandwa ngamatshe ^y, lenyama yayo ingadliwa; kodwa umnininkabi uzayekelwa. 29Kodwa uba inkabi ibijwayele ukuhlaba mandulo, njalo kufakaziwe kumniniyo, kodwa engayilondolozanga, ibisibulala owesilisa kumbe owesifazana, leyonkabi izakhandwa ngamatshe, lomniniyo laye abulawe. 30Uba inhlawulo ibekwa phezu kwakhe ^z, uzanika imbadalo yokuhlengwa komphefumulo wakhe, njengakho konke okubekwe phezu kwakhe. 31Loba ihlaba indodana kumbe ihlaba indodakazi, kuzakwenziwa kuye njengomthetho lo. 32Nxa inkabi ihlaba inceku kumbe incekukazi, uzanika amashekeli* esiliva angamatshumi amathathu ^aa enkosini yayo, lenkabi ikhandwe ngamatshe ^ab.

33Njalo uba umuntu evula umgodi, loba uba umuntu egebha umgodi angawusibekeli, kuwele kuwo inkabi kumbe ubabhemi, 34umninimgodi uzahlawula, abuyisele imali kumniniyo, kodwa efileyo izakuba ngeyakhe.

35Njalo uba inkabi yomuntu ilimaza inkabi kamakhelwane wakhe ize ife, bazathengisa inkabi ephilayo, behlukaniselane imali yayo, behlukaniselane efileyo futhi. 36Kumbe uba kusaziwa ukuthi inkabi ibijwayele ukuhlaba mandulo, kodwa umniniyo engayilondolozanga, uzabhadala lokubhadala inkabi ngenkabi, kodwa efileyo izakuba ngeyakhe.

‏ Exodus 22

Imithetho yempahla eyebiweyo lenikelwe ukulondolozwa

1Uba umuntu eseba inkabi loba imvu, ayihlabe kumbe ayithengise, uzahlawula inkabi ezinhlanu ngenkabi, lezimvu ezine ngemvu ^ac.

2Uba isela lificwa lifohlela, litshaywe lize life ^ad, kakulacala legazi kuye ^ae. 3Uba ilanga seliphumile phezu kwalo, ulecala legazi. Lifanele ukubhadala lokubhadala; uba lingelalutho, limele lithengiswe ngenxa yokweba kwalo ^af. 4Uba okwebiweyo kuficwa lokuficwa esandleni salo kuphila ^ag, loba inkabi loba ubabhemi kumbe imvu, lizabuyisela kuphindwe kabili ^ah.

5Nxa umuntu edlisa insimu kumbe isivini, angenise izifuyo zakhe zidle ensimini yomunye, uzabuyisela ngokuhle kwensimu yakhe langokuhle kwesivini sakhe.

6Uba kuqhamuka umlilo, ulumathe emeveni kuze kutshe inqumbi yamabele loba amabele amileyo loba insimu, othungele umlilo uzahlawula lokuhlawula.

7Uba umuntu enika umakhelwane wakhe imali loba impahla ukuze akulondoloze, njalo kwebiwe endlini yalowomuntu, uba isela litholwa lizabuyisela kuphindwe kabili ^ai. 8Uba isela lingatholwa, umninindlu uzasondezwa kubahluleli ^aj ukuthi kafakanga yini isandla sakhe empahleni kamakhelwane wakhe. 9Ngalo lonke udaba lwecala, ngenkabi, ngobabhemi, ngemvu, ngesembatho, ngakho konke okulahlekileyo, umuntu atsho ngakho ukuthi ngokwakhe, udaba lwabo bobabili luzakuza kubahluleli ^ak; lowo abahluleli abamlahlayo uzabuyisela kuphindwe kabili kumakhelwane wakhe.

10Uba umuntu enikela kumakhelwane wakhe ubabhemi loba inkabi loba imvu kumbe isifuyo nje ukuthi akulondoloze, besekusifa loba kulimala kumbe kuthunjwe, kungelamuntu obonayo, 11isifungo seNkosi sizakuba phakathi kwabo bobabili ^al, ukuthi kelulanga isandla empahleni kamakhelwane wakhe; njalo umniniyo uzasemukela, kayikubuyisela. 12Kodwa uba yebiwe lokwebiwa kuye ^am, uzamhlawula umniniyo. 13Uba idatshuliwe lokudatshulwa, kayilethe ibe yibufakazi, kayikubuyisela edatshuliweyo.

14Uba-ke umuntu eseboleka ulutho kumakhelwane wakhe, beselulimala loba lusifa umninilo engelalo, uzahlawula lokuhlawula. 15Uba umninilo elalo, kayikuhlawula; uba beluqhatshiwe, lulande ukuqhatshwa kwalo.

Imithetho emayelana lamanye amacala

16Uba-ke indoda iyenga intombi emsulwa engakhombanga ^an, ilale layo, izayilobola lokuyilobola ibe ngumkayo. 17Uba uyise esala lokwala ukumnika yona, uzabhadala imali njengelobolo lezintombi ezimsulwa ^ao.

18Lingayekeli umthakathikazi ukuthi aphile ^ap.

19Wonke olala lenyamazana uzabulawa lokubulawa ^aq.

20Ohlabela onkulunkulu ngaphandle kweNkosi kuphela uzatshabalaliswa ^ar.

21Njalo ungamcindezeli owezizwe, ungamhluphi, ngoba lalingabezizwe elizweni leGibhithe ^as.

22Lingacindezeli lawuphi umfelokazi kumbe intandane ^at. 23Uba ubacindezela lokubacindezela, yebo, uba bekhala lokukhala kimi ^au, ngizakuzwa lokuzwa ukukhala kwabo ^av, 24ulaka lwami luzavutha ^aw, ngilibulale ngenkemba, labomkenu babe ngabafelokazi labantwana benu intandane ^ax.

25Uba useboleka abantu bami imali abangabayanga abalawe ^ay, ungaziphathi njengombolekisi kubo, ungabeki inzalo phezu kwabo. 26Uba uthatha lokuthatha isembatho sikamakhelwane wakho sibe yisibambiso ^az, sibuyisele kuye lingakatshoni ilanga; 27ngoba siyisigubuzelo sakhe sodwa, siyisembatho sakhe esikhumbeni sakhe; uzalala phakathi kwani? Kuzakuthi-ke lapho ekhala kimi, ngizamuzwa ^ba, ngoba ngilomusa ^bb.

28Lingathuki onkulunkulu ^bc, lingaqalekisi induna yabantu bakini.

29Lingaphuzisi isivuno senu esigcweleyo lomhluzi wenu wezithelo. Uzangipha izibulo emadodaneni akho ^bd. 30Wenze njalo ngenkabi yakho langemvu yakho ^be; kuzakuba lonina insuku eziyisikhombisa ^bf; ngosuku lwesificaminwembili unginike khona.

31Lizakuba ngabantu abangcwele kimi ^bg; ngakho lingadli inyama edatshulwe egangeni yizilo, iphoseleni inja ^bh.

‏ Exodus 23

Imithetho yokulunga leyobumnene

1Ungawuphathi umbiko wamanga ^bi, ungafaki isandla sakho lomubi ukuze ube ngumfakazi wobubi ^bj.

2Ungalandeli abanengi ngezinto ezimbi ^bk, ungafakazi ecaleni ukuze weyamele kwabanengi uliphambule ^bl.

3Lomyanga ungamzweli ecaleni lakhe ^bm.

4Uba uhlangana lenkabi yesitha sakho loba ubabhemi waso kuduha, uzakubuyisela lokukubuyisela kuso ^bn. 5Uba ubona ubabhemi walowo okuzondayo elele ngaphansi komthwalo wakhe, uyekele ukumkhulula, uzamkhulula lokumkhulula laye.

6Kawuyikuphambula ukwahlulelwa komyanga wakho ecaleni lakhe ^bo. 7Bana khatshana lendaba yamanga ^bp, ungabulali ongelacala lolungileyo ^bq, ngoba kangiyikumlungisisa okhohlakeleyo ^br.

8Njalo kawuyikwemukela isivalamlomo ^bs, ngoba isivalamlomo siphumputhekisa ababonayo, sonakalise amazwi abalungileyo.

9Futhi kawuyikumcindezela owezizwe ^bt; ngoba lina liyayazi imizwa yowezizwe, ngoba lalingabezizwe elizweni leGibhithe.

Imithetho yesabatha leyemikhosi emithathu

10Njalo iminyaka eyisithupha uzahlanyela isiqinti sakho ^bu, ubuthe isivuno saso. 11Kodwa ngowesikhombisa uzasilalukisa sibe lifusi, ukuze abayanga besizwe sakho badle, lalokho okuseleyo inyamazana zeganga zikudle. Wenze njalo ngesivini sakho lemihlwathi yakho. 12Insuku eziyisithupha uzakwenza umsebenzi wakho, njalo ngosuku lwesikhombisa uphumule ^bv, ukuze kuphumule inkabi yakho labobabhemi bakho, kuvuselele-ke indodana yencekukazi yakho lowezizweni. 13Lezintweni zonke esengizitshilo kini qaphelani ^bw, lebizo labanye onkulunkulu lingaliphathi, kaliyikuzwakala emlonyeni wakho ^bx.

14Kathathu ^by ngomnyaka uzangigcinela umkhosi ^bz. 15Umkhosi wesinkwa esingelamvubelo uzawugcina ^ca, insuku eziyisikhombisa udle isinkwa esingelamvubelo njengokukulaya kwami, ngesikhathi esimisiweyo senyanga kaAbhibhi; ngoba kuyo waphuma eGibhithe; kabayikubonakala phambi kwami bengaphethe lutho ^cb. 16Lomkhosi wesivuno ^cc, izithelo zokuqala zomsebenzi wakho, owuhlanyeleyo ensimini; lomkhosi wokubutha ekupheleni komnyaka ^cd, lapho usubuthile umsebenzi wakho ensimini. 17Kathathu ngomnyaka bonke abesilisa bakho bazabonakala phambi kweNkosi uJehova.

18Kawuyikunikela igazi lomhlatshelo wami kanye lesinkwa esilemvubelo ^ce. Lamafutha omkhosi wami angalali kuze kuse. 19Ikhethelo lezithelo zokuqala zensimu yakho uzaliletha endlini yeNkosi uNkulunkulu wakho ^cf. Ungapheki izinyane echagweni lukanina ^cg.

Ingilosi yeNkosi ithunywa ukuze ikhokhele amaIsrayeli

20Khangela, ngithuma ingilosi ▼

▼ ingilosi: kumbe  iNgilosi.

phambi kwakho ukuze ikulondoloze endleleni ^ci, ikuse endaweni engiyilungisileyo. 21Uqaphele phambi kwayo, ulalele ilizwi layo; ungayicunuli ^cj, ngoba kayiyikuthethelela iziphambeko zenu ^ck; ngoba ibizo lami liphakathi kwayo. 22Kodwa uba ulalela lokulalela ilizwi layo, wenze konke engikutshoyo, sengizakuba yisitha sezitha zakho ^cl, ngiphambane labaphambana lawe. 23Ngoba ingilosi yami izahamba phambi kwakho ^cm, ikungenise kumaAmori lamaHethi lamaPerizi lamaKhanani lamaHivi lamaJebusi ^cn. Njalo ngizababhubhisa. 24Ungakhothameli onkulunkulu babo, ungabakhonzi, ungenzi njengemisebenzi yabo ^co; kodwa ubachithe lokubachitha ^cp, ubhidlize lokubhidliza izinsika zabo eziyizithombe ^cq. 25Lizakhonza-ke iNkosi uNkulunkulu wenu ^cr; njalo izabusisa ukudla kwakho lamanzi akho ^cs, njalo ngisuse isifo phakathi kwakho ^ct.

26Kakuyikuba khona okuphunzayo lokuyinyumba elizweni lakho ^cu. Ngizaphelelisa inani lensuku zakho ^cv. 27Ngizathumela ukwesabeka kwami phambi kwakho ^cw, ngiphambanise bonke abantu ozafika kubo ^cx, ngenze izitha zakho zonke zikunike isiphundu. 28Ngizathumela olonyovu phambi kwakho ^cy abazaxotsha amaHivi, amaKhanani lamaHethi phambi kwakho. 29Kangiyikubaxotsha phambi kwakho ^cz ngomnyaka owodwa, hlezi ilizwe libe ngamanxiwa, lenyamazana zeganga zikwandele. 30Ngizabaxotsha phambi kwakho kancinyane kancinyane, uze wande, udle ilifa lelizwe. 31Njalo ngizamisa imingcele yakho ^da kusukela eLwandle oluBomvu kuze kufike elwandle lwamaFilisti, njalo kusukela enkangala kuze kufike emfuleni; ngoba ngizanikela esandleni sakho abakhileyo belizwe ^db; uzabaxotsha phambi kwakho. 32Ungenzi isivumelwano labo labonkulunkulu babo ^dc. 33Kabayikuhlala elizweni lakho, hlezi bakwenze ukuthi wone kimi; uba ukhonza onkulunkulu babo, ngeqiniso kuzakuba yisifu kuwe ^dd.