Mar 11:1-10, Luk 19:29-38 | Ndebele | STEP | Kwathi besondela eJerusalema , eBetfage leBethani , entabeni yeMihlwathi, wathuma ababili kubafundi bakhe,

Mark 11:1-10

1 Kwathi besondela eJerusalema ^a, eBetfage leBethani ^b, entabeni yeMihlwathi, wathuma ababili kubafundi bakhe, 2 wathi kubo: Hambani liye emzaneni okhangelene lani; lizahle lithi lingena kuwo lifice ithole likababhemi likhulekiwe ^c, okungazange kuhlale kulo umuntu; lilikhulule lililethe ^d. 3 Njalo uba umuntu esithi kini: Likwenzelani lokhu? Lithi: INkosi iyaliswela; njalo uzahle alithumele lapha. 4 Bahamba-ke bafica ithole likhulekiwe lisesangweni ngaphandle, endleleni; basebelikhulula. 5 Labanye kwababemi khona bathi kubo: Lenzani likhulula ithole? 6 Basebesitsho kubo njengoba uJesu elayile; basebebayekela bahamba. 7 Basebeliletha ithole kuJesu, baphosela izembatho zabo phezu kwalo, wasehlala phezu kwalo. 8 Labanengi bendlala izembatho zabo endleleni; labanye bagamula izingatsha lamahlamvu ezihlahleni, bakwendlala endleleni ^e. 9 Lalabo ababehamba phambili lababelandela bamemeza, besithi: Hosana*! Ubusisiwe ozayo ebizweni leNkosi; 10 ubusisiwe umbuso kababa wethu uDavida, ozayo ebizweni leNkosi. Hosana kweliphezulu ^f!

Luke 19:29-38

29 Kwasekusithi esondela eBetfage leBethani entabeni okuthiwa ngeyeMihlwathi, wathuma ababili kubafundi bakhe, 30 esithi: Hambani liye emzaneni okhangelene lani; lizakuthi lingena kuwo lifice ithole likababhemi libotshiwe, okungazanga kuhlale kulo muntu; lilikhulule lililethe. 31 Uba umuntu elibuza esithi: Lilikhululelani? Lizakutsho njalo kuye ukuthi: INkosi iyaliswela. 32 Ababethunyiwe bahamba-ke bafica kunjengoba ebatshelile ^g. 33 Kuthe besalikhulula ithole, abaninilo bathi kubo: Lilikhululelani ithole ^h? 34 Bona basebesithi: INkosi iyaliswela. 35 Basebeliletha kuJesu; baphosela izembatho zabo phezu kwethole likababhemi, bamkhweza uJesu kulo. 36 Kwathi ehamba, bendlala izembatho zabo phansi endleleni ⁱ. 37 Kwathi khathesi esesondela ekwehleni kwentaba yeMihlwathi, ixuku lonke labafundi laqala ukuthokoza lokudumisa uNkulunkulu ngelizwi elikhulu ^j ngayo yonke imisebenzi yamandla eliyibonileyo ^k, 38 lisithi: Ibusisiwe inkosi ezayo ebizweni leNkosi ^l; ukuthula ezulwini, lenkazimulo kweliphezulu ^m.