Luke 14

Sése abɛlese mutu wuwàbade na maambe gutsɔ niute letsuge lebavome

1Letsuge lebavome, ivonde cha baate ba lebuli la bafarichi nàtɛde Sése gu tchade gu nzɔ ndɛ. Baate bàbàbade vane, nibàkɛngesenge Sése. 2Lebagele lelàbade na bichige bia niute biabase na maambe, lekukele va busu bua Sése, 3Sése nàfule basupili ba mangidi ma Nzɛmbi na baate ba lebuli la bafarichi ndé: «Mangidi ma bése a béne, ma chingese bése a béne mu bɛlese mubéde letsuge lebavome?» 4Tɔ basupili ba mangidi ma Nzɛmbi na baate ba lebuli la bafarichi bàsàbage lebige lakale ndɛ vɛ. Avane Sése àbɛmbe lebagele muɛne, àbɛlese ndɛ, nàlɛle ndɛ ndé: «Gabege gu nzɔ wɛ.» 5Vayulavane, Sése nàbàlɛle bɔ ndé: «Vatsɔ béne mutu naa wu muane a ndɛ voki ngɔmbi a ndɛ ti apatege gutsɔ lebéle, ndɛ akabise ndɛ pose muti ndé lɔ letsuge lebavome?» 6Basupili ba mangidi ma Nzɛmbi na baate ba lebuli la bafarichi bàsàbage lebige lakale ndɛ vɛ.

Nzɛmbi akomese mutu wuwakolene

7Sése àmɔne gu baate bàbàtɛde gu mubéke lekuɛle bàtsagelenge mu bitchige biatsomi, nàtadele bɔ kokome ndé: 8«Mutu atɛde wɛ gu mubéke lekuɛle, yapatsagele va itchige cha tsomi, bombe ndɛ tédi mutu wulutili wɛ buyimbe.» 9Awone ayade, kumu mubéke wutédi béne botchi, ayade, akalɛle wɛ ndé: «Mbɛgi a mɛ tɛmene, niagele itchige chinechi gulidi mutu wunewu. Na tsoni yotchi, wɛ tɛmene, wɛ kayɛnde ka gu tsagele gu itchige cha gu mbise.» 10Tɔ batɛde wɛ gu mubéke lekuɛle, yapatsagele va itchige cha tsomi. Kumu mubéke aningele, amɔne wɛ tsagele gu itchige cha gu mbise, akalɛle wɛ ndé: «Mbɛgi a mɛ tɛmene yade gu tsagele gu itchige cha buyimbe. Avane, wɛ báde ka mutu wuwagɔbe va mise ma baate botchi babatédi gu mubéke.» 11Mutu wuwakomese niute a ndɛ, Nzɛmbi akolese ndɛ. Namoni a mutu wuwakolese niute a ndɛ, Nzɛmbi akomese ndɛ.

Kokome a mukungi wu munéni

12Sése nàlɛle mutu wuwàtɛde ndɛ gu mubéke lekuɛle ndé: «Wɛ sade mubéke lekuɛle, yatɛde bambɛgi bawɛ, na ngage a wɛ na bichine, muti bɔ na bɔ basade mubéke lekuɛle, batɛde wɛ mu kale péle. 13Tɔ wɛ sade mubéke lekuɛle, tɛde baate baba vɛ na matsɔnge, na bikate, na baate babalidi na biku na bapɛpidi. 14Wɛ sade bone, wɛ kuade na ngɔmbe muti baate muɛne bachitoge wɛ kale péle vɛ. Nzɛmbi nákale wɛ péle va ndɛ kásole baate babayɛbene gu leku.» 15Vatsɔ baate bàbàtɛde na Sése gu mukungi lekuɛle, mutu mumochi àyoge maambe ma Sése yàmbelenge, nàlɛle ndé: «Bubuɛ gulidi mutu wu kátchade ilambe chi inéni gu mboge a Nzɛmbi gu yulu gu ndɛ yumu.» 16Avanekaniva Sése àkale ndɛ ndé: «Letsuge lemochi, mutu àsade ilambe chi inéni, nàtɛde baate mvuabɔvɛ.» 17Lekɛse latchade letɔde, ndɛ nàtchindege muséli a ndɛ gu lɛle baate ba ndɛ tɛde ndé: «Wokani, lekɛse latchade lematɔde.» 18Tɔ baate botchi ba ndɛ tɛde nibàbise. Mutu atsomi nàlɛle muséli ndé: «Kɔkɔle a wɛ, mɛ chitoge yade vɛ, muti mɛ nungi yi mɛ sumbi mɛ yɛnde gu léngele.» 19Awone nàlɛle ndɛ ndé: «Kɔkɔle a wɛ mɛ chitoge yade vɛ, mɛ lekumi la bangɔmbi mɛ sumbi, mɛ napayɛnde gu mɔne buni bɔ babianze.» 20Wa mutate nàlɛle muséli ndé: «Kɔkɔle a wɛ mɛ chitoge yade vɛ, mɛ mukɛdi ki namanze mɛ kuéli.» 21Muséli àgabege, nàtɔse ivonde chɛndi maambe ma baate muɛne bàlɛle ndɛ. Kéchi yikuate ivonde chɛndi, ivonde nàlɛle ndɛ ndé: «Yɛnde mu bitchige biotchi na mu yulu mimbambe mia musɛnge wɛ tsuale baate babavɛ na matsɔnge, na ba ngua biku na bapɛpidi na baate babatsotsege.» 22Avane muséli àyade, nàlɛle ivonde chɛndi ndé: «A ivonde, mɛ chidi buni wɛ léli, tɔ bitchige bia tsagele ki bione biéne.» 23Ivonde nàbàlɛle muséli ndé: «Yɛnde mu yulu mandjile na gutsɔ manungi, wɛ chimbe baate botchi mu yade, nzɔ mɛ yibase.» 24Mumbuli mɛ lɛle béne mé: «Vatsɔ baate ba mɛ tɛde tsomi, mutu ti mumochi asákátchade ilambe chɛme vɛ.»

Utamene gua maambe ma mu niute a wɛ mu duke Sése

25Sése àgɛlege gulidi piti a baate yiyàdukungenge ndɛ, nàlɛle bɔ ndé: 26«Mutu ti atonde yade gulidi mɛ, letɔnde le ndɛ lidi nalɔ mu taate a ndɛ, na mu nguɛndi, na mu mukɛdi a ndɛ, na mu baane bɛndi, na mu baane ba taate a ndɛ, na mu bakédi bɛndi, na mu maambe ma mu niute a ndɛ muɛne ti lesalotele letɔnde le ndɛ lidi nalɔ mu mɛ vɛ, ndɛ asalidi tchitse mu bade mutu a mɛ vɛ.» 27Mutu wuwabise tamene maambe ma mu niute a ndɛ mu mɔne mimbɔnde mu mɛ, asalidi tchitse mu bade mutu a mɛ vɛ.

28Vatsɔ béne, mutu ti atɔnde tonge nzɔ yiyinéni, ndɛ mé bombe tsagele apatsagele mu yabe lerange la bichige na yabe ti alidi na masoge ma tchitse mu manese tonge nzɔ muɛne? 29Ndɛ ti asalidi na matsɔnge matchitse vɛ, ndɛ boke mikise, abande tonge nzɔ, ndɛ yɔ bamanese tonge vɛ, baate botchi babamɔne isale muɛne, sɛbenge ka ndɛ. 30Baate ndile kalɛlenge bo: «Lebagele lineli buédi abéndi tonge nzɔ tɔ nakondi.» 31Kumu a tsɛnge ti atɔnde yɛnde gu luane mudinge na lebɛdi la kumu a tsɛnge ikime ndɛ bombe tsagele apatsagele mu tase ti, na lekumi lemochi la mitochini mia bagɔdi le mɛ lidi nalɔ, mɛ toge yɛnde gu luane na kumu a tsɛnge wulidi na makumi mɔli ma mitochini mia bagɔdi? 32Kumu a tsɛnge wulidi na lekumi lemochi la mitochini mia bagɔdi amɔne ndé ndɛ chitoge mudinge luane na kumu a tsɛnge wulidi na makumi mɔli ma mitochini mia bagɔdi vɛ, ákátchindege mbanze gulidi kumu a tsɛnge wone mu ndé bone a ndɛ bagade inɔnge. 33Avane Sése nàbàlɛle ndé: «Vatsɔ béne mutu ti asatamene maambe motchi ma mu niute a ndɛ vɛ, ndɛ asalidi wakoge mu bade mutu a mɛ vɛ.»

Yabadani baate babavɔngele

34«Mumbuli mɛ lɛle béne mé musɛgi ikumbe chi ibuɛ. Tɔ ti ndɛ niɛge ka vɛ, yɔ kabuni bakigabese? 35Musɛgi muɛne vane tsɔnge ka vɛ. Babɔngɔnge ndɛ, musɛgi muɛne vɛde ndile ka gu lebumbe. Baate babalidi na matchui buɛchi, bubuɛ batchikese maambe muɛne.»