Luk 23 | NzbSC | STEP | Baate botchi bàtɛmene, nibàbéte Sése gu mboge a Pilate.

Luke 23

Bagɔdi babéte Sése gu mboge a Pilate

1 Baate botchi bàtɛmene, nibàbéte Sése gu mboge a Pilate. 2 Bɔ bàtode gu mboge a Pilate, nibàkutule ndɛ maambe mvuamɔvɛ bo: «Bése lebagele lineli lebɛkichi arémbele baate ba tsɛnge a bése a béne. Naléli bɔ ndé yabafutani mapaga gulidi Sésare kumu a tsɛnge. Mane, nabalɛle bɔ ndé, Mɛ ni Mupotili, ni Kumu wu baate batale bo náyade.» 3 Pilate àmane maambe muɛne yoge, nàdume ndɛ ndjide ndé: «Wɛ kani Kumu bachife?» Sése nàkale ndɛ ndé: «Wɛ muɛne wɛ mamane lɛle.» 4 Avanekaniva Pilate àlɛle bivonde bia bavédi ba malage na baate botchi ndé: «Mɛ samɔne tchambe lebakitchise lebagele lineli chigi mu lɔ vɛ.» 5 Tɔ bɔ nibàgalenge nàlɛle bo: «Ndɛ baate arémbele na maambe ma ndɛ lɔngese. Ndɛ gu kɛse a Ngalilé àbɛndi, nàviogi mu kɛse a Sudé kuange nachi ndɛ todi guni.»

Bagɔdi babéte Sése gu mboge Irodi

6 Va Pilate àyoge maambe ma baate muɛne bàlɛle, nàfule bɔ ndé: «Lebagele lineli ka muchi Ngalilé?» 7 Ndɛ yoge ndé Sése gu kɛse a Ngalilé yi Irodi àtome àmate, nàtchindege bɔ na ndɛ gu mboge Irodi muti Irodi gu Sérusalɛme àbade. 8 Irodi àmɔne Sése, nàkuade na ngɔmbe muti ndɛ bàde àmayoge maambe ma bàyambelenge mu Sése. Ndɛ bɛle vɛ àtɔndenge mɔne Sése mu ndé bombe ndɛ toge sade imuile va mise mɛndi. 9 Irodi àdume Sése mandjide mvuamɔvɛ, Sése àsàyagele ndɛ vɛ. 10 Bivonde bia bavédi ba malage na basupili ba mangidi ma Nzɛmbi bàbàbade vane, nibàkutule Sése maambe mvuamɔvɛ. 11 Irodi bone bagɔdi bɛndi bàsɛbe na vɔngele sése, bàluatese ndɛ lengoyi lelayingegenge, nibàgabese ndɛ gu mboge a pilate. 12 Irodi bone a Pilate bambɛne bàbade na bukale tɔ letsuge muɛne bɔ nibànɔnge.

Pilate apase mupame wa bome Sése

13 Pilate àtɛde bivonde bia bavédi ba malage na bivonde biéne biotchi na baate bakime, 14 nàlɛle bɔ ndé: «Béne leyidi mɛ na lebagele lineli, gu lɛle mɛ ti ndɛ baate arémbele, tɔ mɛ dume ndɛ mandjide mu maambe ma béne leléli mɛ, mɛ samɔni tchambe lebakitchise ndɛ chigi mu lɔ vɛ. 15 Namoni a Irodi na ndɛ, asamoni tchambe le ndɛ ki tchise ndɛ chigi mu lɔ vɛ. 16 Ka gobani ndɛ ndile mibɛmbi, vayulavane béne leniangese ndɛ.» 17 Mukungi a Pake wotchi, Pilate àbadenge na iku chapose muchi tsugu mumochi. 18 Avanekaniva baate botchi bàbuamegenge bo: «Lebagele lineli ndile kuade. Pose bése Barabase.»

19 Lebombe le Pilate àtɛte Barabase gu tsugu mu ndɛ bàde gutsɔ kɔngi a baate bàbàyongesenge musɛnge a Sérusalɛme na le ndɛ bome mutu.

20 Pilate nàbàyambele na bɔ muti ndɛ tɔndenge niangese Sése. 21 Tɔ baate nibàgale nàlɛle bo: «Kɔmene ndɛ ndile mu mbate a kurusu. Ndɛ ndile kɔmene mu mbate a kurusu.» 22 Pilate nàbàfule baate muɛne lefule la mutate ndé: «Tchambe lelebi lebagele lineli achidi lini? Mɛ samɔne tchambe lelibi le lebagele lineli achidi lebakitoge ndɛ tchise chigi mu lɔ vɛ. Ka gobani ndɛ ndile mibɛmbi, vayulavane béne leniangese ndɛ.» 23 Tɔ baate nibàgalenge nàlɛle mbuli ambuli bo kɔmene ndɛ ndile mu mbate a kurusu. Mu chimbe gu bɔ bàbàchimbenge Pilate, ndɛ nàpole levu. 24 Avanekaniva Pilate àchinge tchambe le baate bàfule ndɛ. 25 Ndɛ nàpose Barabase wu baate bàtɔngenge bo àpole gu tsugu. Lebombe le bàtɛte ndɛ gu tsugu mu ndɛ bàde gutsɔ kɔngi a baate bàbàyongesenge musɛnge a Sérusalɛme na le ndɛ bome mutu. Vayulavane, Pilate nàlɛle bagɔdi ndé sadani Sése ngane a bu béne latɔnde.

Bagɔdi bakɔmene Sése mu mbate a kurusu

26 Va bagɔdi bàbétenge Sése gu kɔmene ndɛ va kurusu, bɔ nibàbuane na lebagele le bàtɛdenge Chime wa muchi Chirɛne àmatenge gu manungi. Bɔ bàkuate ndɛ, nibàchimbe ndɛ mu pape kurusu mu duke Sése nayɔ. 27 Piti a baate na yɔ niyàdukenge Sése mu mambise. Namoni a bakaase bakime nibàlélenge na dume matule mu Sése. 28 Sése agéngege gulidi bakaase muɛne, nàlɛle bɔ ndé: «A bakaase ba Sérusalɛme, niagani léle mu mɛ, lélani mu béne muɛne na mu baane ba béne.» 29 Muti lekɛse lebákálɛlenge bo: «Bubuɛ gulidi bakaase ba bingume, na bakaase babasabote na nuise baane mabɛne vɛ bɛle lekade.» 30 Avane baate nibálɛle mikɔnge bo: «Sɛkegani gu yulu a bése.» Nàlɛle bivéndeke bo: «Dibani bése.» 31 Ti bamuɛse mimbɔnde gulidi muti wu mumubise, tchambe kabuni lekábade gulidi muti wuwakani. Bɔ ndɛ kabuni bákásade? 32 Bagɔdi nibàbéte na mibongi miɔli gu kɔmene miɔ bone a ba Sése. 33 Va bagɔdi bàtɔde va itchige chibatɛde ivanze, bɔ nibàkɔmene Sése na mibongi muɛne. Awunewu mubongi ngule a mbagele awone ngule a kaase. 34 Avanekaniva Sése àlɛle ndé: «Taate chindele baate muɛne maambe ma bɔ bàsade. Muti bɔ basatchikese maambe muɛne vɛ.» Bɔ nibàsade kɛnge a sɔle mu yabe mutu wukibɔnge mangoyi ma Sése. 35 Piti a baate yiyàbade vane, niyàkɛngese buni maambe motchi màviɔgenge. Bivonde bia bachife nibiàsɛbenge nàlɛle bo: «Wɛ ti mumbuli wɛ lidi mutu wu Nzɛmbi àsɔle, kipɔtege wɛ muɛne ngane a buni wɛ potili baate bakime.» 36 Bagɔdi na bɔ nibàsɛbenge Sése. Bɔ bakukele va pédi a ndɛ, nibàkuke ndɛ malame mangɛni nàlɛle bo: 37 «Wɛ ti mumbuli wɛ lidi Kumu bachife, kipɔtege wɛ muɛne.» 38 Mu mbate a kurusu, va yulu a mutsuɛ Sése, bɔ nibàkome mabige maneme: «A wunewu ni Kumu bachife.» 39 Vatsɔ mibongi mibàkomene na Sése, mumochi nàlɛle ndɛ ndé: «Wɛ ngɛ wɛ lɛle wo wɛ ni mutu wu Nzɛmbi àsɔle. Kipɔtege wɛ muɛne tsɔvane wɛ pɔtele na bése.» 40 Tɔ wone mubongi nàsɛmbe mbɛgi ndé: «Wɛ ka wɛ samɔne bɔɔme bua Nzɛmbi vɛ? Béne a ndɛ botchi ngɛ chigi imochi batchise.» 41 Sabone bése a na wɛ batchise chigi, mu maambe mamabi ma bése na wɛ lechidi. Tɔ ndɛ asachidi tchambe lelebi ti lemochi vɛ. 42 Avane mubongi wuwàsɛmbe mbɛgi nàlɛle Sése ndé: «A Sése, ibángele mɛ va wɛ káyade gutsɔ Buyumune bua wɛ.» 43 Sése nàkale ndɛ ndé: «Mumbuli mɛ lɛle wɛ mé baande lɔlɔ, wɛ ka nɛme wɛ kibade gu itchige cha inionge.»

Leku la Sése

44 – 45 Va lekɛse la muangele, ifunde nichàkogele tsɛnge yotchi kuange na va letɛdi larɛkene. Tsaande yi bàdibege itini cha nzɔ Nzɛmbi cha buyimbe niyàkasege va kɛti. 46 Sése nàyambele mbuli ambuli ndé: «Taate. Mɛ ka Lenioni lɛme mɛ tamene mu makake ma wɛ.» Ndɛ mane yambele, nàsose mufudi. 47 Ivonde cha bagɔdi wa muchi Rɔme àmɔne buni maambe màviɔge, nàkàkese Nzɛmbi nàlɛle ndé: «Mutu wunewu ka mutu wuwayɛbene abédi.» 48 Baate botchi bàbàyade gu mɔne buni maambe muɛne motchi màviɔgenge, nibàmɔne tinge a Sése. 49 Bambɛgi ba Sése namoni a bakaase bàbàkémbenge na ndɛ baande gu Ngalilé, nibàbade vale mu mɔne buni maambe muɛne motchi màviɔgenge.

Suséfe akunde Sése

50 – 51 Lebagele lebàtɛdenge Suséfe, wuwabàde mutu wu mubuɛ ngua maambe mamayɛbene, nàtalenge leyade la Buyumune bua Nzɛmbi. Ndɛ gutsɔ lekabe la bivonde bia bachife àbade. Tɔ àsàchilele na chinge maambe ma bivonde bia bachife bàgade mu mbate a Sése vɛ. Ndɛ muchi Arimaté àbade. 52 Lebagele muɛne àyɛnde gu mboge a Pilate, nàfule niute a Sése mu yɛnde gu kunde. 53 Ndɛ sotese niute a Sése, amase yɔ mu kurusu, àpɔte na matsaande mafuke, nàtémbe yɔ gutsɔ péchi yibàboke gutsɔ lemani yibàsàmakunde mvumbi vɛ. 54 Letsuge muɛne, letsuge lebàvangenge maambe ma letsuge lebavome, muti letsuge lebavome àbade ka bɛle nàtɔde. 55 Bakaase bàbàkémbenge na Sése baande gu Ngalilé nibàyɛnde bone a ba Suséfe gu péchi gu mɔne buni bakunde Sése. 56 Vayulavane, bɔ nibàgabege gu yulu a musɛnge mu vange mɛdi na miyɔmbe bia tsule yiyibuɛ mu yitele mu niute a Sése. Mu letsuge la tsaambe, bɔ nibàvome ngane a bu mangidi ma Nzɛmbi malɛle.