Luke 16

Obie Ntǝna Eyiema Egama Nie Mfum Etum

1Zises atuɔ anie ba atuɔnga yie si, “Efengene zizi ezuɔna mfa alagha nie yuyuɔ si azuɔn esi ka mfum etuma a fie. Kǝn mba arodam adag amanang adu si mfina mfum etum nyuɔ amanang anyuɔga akpugha nsie nzu. 2Nzi enima kǝn alana yie abab si, ‘Bagha nzum zi nyuɔgha na atib mana? Ba tunga ebiem kǝn omofina mfum etum, atib tuɔr ka emie esi ka mfum fi onongo okpo zuɔn.’

3“Nzuɔna ka esi etum ama tuɔ zizie si, ‘Emie nima sisien? Egamanie wanga aku tabha etum a zanga. Nkpim nsam yi nsama abi, kpiena ɔkpiǝna ndi ka nsuɔn si ma nliem. 4Nyiyi nzum zi nima! Ntima mbien akpanga atiem esig kǝn amame oyigha ka etum atabhim.’

5“Nna yuɔ alana anie bha ayie egama mfuna etum awie abuɔ ka yuyuɔ si aba amabien ebung atib ma abuɔ nya. Abab ngunga mba si, ‘Okpi egama mfuɔna etum wanga mbuɔ sisien?’”

6“Yie abanga si, ‘Abar aku olib atan adon.’

“Egamanie mbabha etum atuɔ yie si, ‘Kuɔ nwier aya, zuɔn nzi wamwam, nim yi si aguɔr abhan ma atǝn abhan ma wubha.’

7“Amatuɔb abab oyuɔgha anie abhan si, ‘Wuɔ oyie yie mbuɔ sisien?’

“Yie abanga si, ‘Nsanga abhakpa aguɔr adon.’

“Yie atuɔ yie si, ‘Kuɔ nwier a ya nim yi aguɔr adon.’

8“Efangene mfuɔna etum akara ndana nsiera mbabha etum atib abien ewag ma ekpin azie ka osisi. Atib anie ngun nyi agotana ka onima anie obhuɔ akpuguru aga anie eyinga. 9Ntuɔ wa si fina obiena ngun lan atiem esig ka ziza, kǝn omamoman, atabha wa ka mfum fi adi keyiema ma keyiema.

10“Yuɔ amanima afina edigadigha zi aka yie, amana afina egamagama. Kǝn yuɔ ariemoman afina edigadigha egamagama ananga mana afina. 11Oriemobien nsiera ma afanga ngun, odu sisien obien nsiera ma atingha afang? 12Oriema obien nsiera ma anyima nie, duɔ amakawa anyim ya adi yiya?

13“Nie yuɔ amana azuɔn ka ekpatuɔ agamanie abhan adim. Atib ali yuyuɔ nyuɔnga akuɔr yie. Nasang amana akag etim azie ka yuyuɔ aga nyuɔnga. Onanga omana okuna Osɔwɔ ma agbugha.”

14Afarisi ba akagha nkung ka akpugha obhuɔ ayuɔg yie amanang ayuɔn yie ka edag nzi. 15Yie adag atuɔ obhuɔ si, “Wan ba ekuɔra si eyira zana ka enunuɔ ka amar atiem, kǝn Osɔwɔ ayi atim ayana. Nzum zi anie akpi ekunakuna, zi eriekpi eyabha ka amar Osɔwɔ.

Nkpiena ekpinekpina

16“Azigha ma anyanga bha enyanga amar Osɔwɔ ya ananga adag tata ntina Zɔn nyara nie alab. Tuɔr ka ntina nyi, okpanga etinga otib ofina mfum Osɔwɔ omokuɔ mfum. Mayuɔmayuɔ ama asɔgha esi si alam. 17Ediegha si ebu ma atuɔ etan ega si ntiti emiema ezigha yi aga oduɔnga atan.

18“Nie yuɔ atienma nkan awie akuɔ yuɔ edidie agbuɔ ka ota, kǝn nie yuɔ akuɔma nienkan yuɔ nlum atiena akpasi yuɔ atienma nlum agbuɔ ka ota.”

Obie Efangene ma Lazɔrɔs

19Zises adagha si, “Efangene nienlum zizi ezuɔna mfa enange yuɔbha atingha asuɔbha suɔbha abuɔma ezuɔn ka egama eyara ekpin ka ofu mayimayi 20Ka nyuɔ ebama zie anunga nliem yuyuɔ yuɔ alana si Lazɔrɔs, yuɔ aduɔg abuna, 21ma oninga nkung si ayie ya adu ka ekuna nzumoyie efangene agbuɔgha. Akpasi owuɔ omonang o oba omolabha yie aduɔg.

22“Ka ntina aba yi nliema nliem akpo azigha bha etum Osɔwɔ amatab yie amumane ka nkuɔ egbura Ebraham. Efangene atuɔb akpo asam yie 23Oturantu wier omu ka ela akpuɔgha nie. Nga ka etitana, ka azuɔna ka eyira, atab amar anyang Ebraham ka edabha mbha ma Lazɔrɔs ka nkuɔ egbura yie. 24Kǝn ama yie, ‘Tata Ebraham, bien esiyira mananga tum Lazɔrɔs abanga ka eza nzi ama asung esi enya buɔ ka alab amana elibha zanga, atib me ndinga ka eyira ngun nyi.’

25“Kǝn Ebraham abanga, ‘Muɔn, tr si nang ka ntina ekpin aya otaba anunuɔ anyim a ya, Lazɔrɔs atabha abibi. Emie yie amadinga ka eyiegha, wuɔ odinga onyanga eyira 26Kpiena nya fie, anunga etuna ebrebra abanga wan ma nra kǝn nie yuɔ adigma si adu ka war aba ka wan ananga mana, akpasi yuɔ adagma si adu nga ka wan aba ka war ananga mana.’

27“Yie abanga si, ‘Nliera wa, tata, tum Lazɔrɔs amu ka ofun awanga, 28atib nkpi abuɔna nyien abhalum adon. Nunga yie atuu obhuɔ atung atib ma mfum mfi kǝn akakpo tuɔb aba ka mfum eyira mfi.’

29“Ebraham abanga si, ‘Akpi Mosis ma akpanga ba ntima Osɔwɔ. Nunga yie alaga obhuɔ atung.’

30“Efangene abanga si, ‘Nasang, Tata Ebraham, Otumima nie adu nga ka eku amatuɔ obhuɔ aniena oniena adu asig abibi obuɔ.’

31“Yie adag atuɔ obhuɔ si, ‘Akalagma atung aka Mosis ma akpanga ba ntima Osɔwɔ, ananga aniena akpasi nie anyima ka eku.’”