Luke 21

Ekeka Nkan Ekar

(Mak 12:41-44)

1Ebiem kǝn Zises atabha amar na anyang afanga anie ka akagha akaka obuɔ ka nkpukpu okagha akpugha nzu nzum. 2Atuɔb anyang ka nkpag nkana ekar amuga akag abhana akpugha abhan ya akpi. 3Ntuɔ wan si, “Ka nsiera, nkpag nkpag a nkan ekar nyuɔ amoka aga obuɔ fiefie. 4Anie mba fie aka ekeka obhuɔ ka afang ya akpi, kan yie ka okpag awie akagha fie fie ya akpi ka ekpin azie.”

Onyuɔgha Nzu Nzuɔm Osɔwɔ ma Ndinga Ntina Akana

(Mat 24:1-2; Mak 13:1-2)

5Anie ba atuɔnga yie bamɔg atuɔr medagha kǝn asi nzu nzuɔm anuɔb ma atingha atan ma akaka ya adie abhuɔ aka Osɔwɔ. Kǝn Zises adagha si, 6“Ka ya wan enyanga na, ntina adinga abagha yi akpasi etan mazi enange ekuma ka ekuna ntiem. Fie awanowana.”

7Abab, “Nkpikpina, bagha ntina yi anyim nya adu? Zien ezuɔna ndinga yi atunga si anyim nya akudu?”

8Yie abanga si, “Makuna eyira si aka dira wan. Atib akpanga abagha ka mbing anyanga, anang adag si, ‘Me ndi yie,’ kpiena okpiena, ‘Ntina amo lara.’ Marobhuɔ etuɔnga. 9Eyogima atib ma nta ma ogbugha mfum, marebien nyira. Anyim nya atogho odu ka ntutuɔra, kǝn nkikǝna ananga na ntǝm yiyi.”

10Amafiera adag atuɔ obhuɔ si, “Akukuɔgha ngun azuɔna ka efin ma akukuɔgha ngun, ofina mfum ozuɔn ka efin ma ofina mfum. 11Egamegama omara atuɔ ozuɔna, ngba ma ayira yira ayama ka akpanga afum, anyima nyira ma agama adinga ya adu ka ela Osɔwɔ.

12“Kǝn si nya fie amakuɔ mfum, abhuɔbha wan aka wan ekarkar. Adie wan obuɔb akag ka ozu nkuɔn akag wan ka mgbakuɔb. Abama nana ka atun ma afina ba mfum, nya fiefie atib mbing a yanga. 13Nzi ekawan nsam si ekpang mbing anyanga. 14Kǝn ma defara kǝn emugha edag kǝn efuɔra. 15Atib nka wan edag ma ogbiera ntuɔra yi anie eli bǝna mayuɔ aka mana atabha. 16Akpasi ma nsiezana ma nezana abuɔna niebha, anie ba atim esig agara wan. Akpasi wan bandig ayuna wan. 17Anie fie ali wan atib eniena ma nanga. 18Kan akpasi elu ka esi zana enange etana. 19Kǝn etanima eyima egagha ekpin.

Anyuɔgha Zerusalem

(Mat 24:15-21; Mak 13:14-19)

20“Emame nyang anuɔgha bha nta asibha Zerusalem, mfa yuɔ egbiera si ezagha emesi. 21Ma nunga mba ba adi ka Zudiya abie amu ka egun, mba ba adi ka ela Zerusalem, abie adu, mba ba adi ka ekika ela akalam ka ola ela. 22Mfa adi ekarkar. Anyim nya adu ebien kǝn amiema. 23Ezuɔna egama nyira ka afu nya eka anima bha alim ma ayabha bha abuɔn! Egama eyunga ebagha ka mfum mfi, osaghatim Osɔwɔ ogbo obuna obhuɔ. 24Akpuɔgha eku akangkang, atab obhuɔ kǝn agbakuɔb amu ma obhuɔ ka aza ngun fiefie. Ba ariɔzuɔn a Zu asɔgha Zerusalem ka asan tata ntina obhuɔ aman.

25“Adinga azuɔna ka nzun, mie ma adurandu. Ka ngun anie azuɔna ka nyira atib ananga agbiera zi anima ka ewuɔm ebugha agama aya. 26Anie agbɔgha mkpuna ka nyira, atib ma anyim ya bagha ka ngun ka si asam nya ya adi ka ela Osɔwɔ, agbugha ogbugha. 27Ka ntina nyi anyanga Muɔn Nienlum a Nienlum asana abagha ka ekɔg ma nsam ma egama ekunekuna. 28Ntina yi anyim nya atuɔra medu, yima tigtig, tab esi za otab, atib efuɔr fuɔr aza edinga ewuɔbha ebaba.”

Ekpina Atib Ma Eti Fig

(Mat 24:32-35; Mak 13:28-31)

29Mfa yuɔ Zises atuɔ obhuɔ edag otubha akpu nzi si: “Ma yira eti fig ma nti fiefie. 30Ntina yi eduma ma nyana, wanafǝna enyanga egbiera na si nana ama olara. 31Akpasi na, emamenyang anyim nya adu, egbiera na si ofina mfum ela Osɔwɔ omo babha.

32“Ntuɔ wan ka nsiera si nyiema nyi ananga singa tata anyim nya fie adu. 33Ebu ma atuɔ asinga osing, kǝn edag a zanga enang esinga.

34“Ma bien okuna eyira. Ma doka zizǝna ka egama eyigha ma ewuɔgha ma ogbinga atim ekpin nzi, Nasag ofu nyi obuɔbha wan gbrufug kǝn ekpɔgha. 35Atib obagha oka mayuɔ mayuɔ yuɔ adi ka ngun nyi. 36Ma zuɔn ka obaba ngugu ka ntina mayi mayi, enang ekag nzuɔm kǝn emana efuɔr ka mazi mazi zi ebie edu, kǝn etuɔbha emana eyima ka amara Muɔn Nienlum a Nienlum.”

37Ofu mayimayi Zises ananga akpina ka Nzu Nzuɔm, ka egu anang adu amazuɔn ka egun zi alana si Egun a Olib. 38Anie fie anang aba ka ofufurofu si amayuɔg yie ka Nzu Nzuɔm.