Luke 5

Zises Alana Adunga Bha Mba Azigabha Etum Abie

(Mat 4:18-22; Mak 1:16-20)

1Ofu yiyi Zises ayima ka egun ebi Genesaret ▼

▼Genesaret: Nzina edi ebuɔ zizi kan ebi Galili.

ka ekpatuɔ Galili, akpanga edag Osɔwɔ, akpanga anie ayima abuna yie alagha atung ka edag Osɔwɔ. 2Anyanga ka nkuɔ alab agba abhan ya abhuɔ bha onyam amu asig, ba ananga asu asim obhuɔ. 3Yie ayab alam ka ogba yiyi, yi odi yi Saimɔn, ama tuɔ yie si ayab ogba mesi amu ka esǝm. Amazuɔn nzi ka ogba ananga akpina anie.

4Ka amomara ekpina, atuɔ Saimɔn si, “Wuɔb sung ka esǝm alab luɔ ntufug kǝn obuɔbha onyam.”

5Saimɔn abanga si, “Egamanie emefina etangatu fiefie eluɔ ntufug nyi, nzum mazi erebuɔb, kǝn zi wuɔmodag na, nlogholo ntufug.”

6Abie anim na, abuɔb akpanga onyam, ntufug obhuɔ atuɔr ma ekabha. 7Mfa yuɔ obhuɔ anima ndinga atuɔ atiem ba adi ka ogba nyinga si amatuɔb obhuɔ, na yuɔ aba amasuna agba nya abhan tata atuɔr mesiema.

8Ebiem kǝn Saimɔn Pite anyanga nzum zi edu na ama kama adung aka Zises, adag si, “Du sighim, Ntun, atib me ndi nima abibi.” 9Atib si yie, ma atiem fiefie azuɔna ka obuɔna ngugu ka ekpanga onyam yi abuɔba. 10Ebiem zizi kǝn Zemsi ma Zɔn, abuɔna Zebedi, ba atuɔna ma Saimɔn atuɔbha azuɔn ka obuɔna ngugu.

Zises ama tuɔ Saimɔn si, “Dobien nyira; tuɔr ka emie omonango obuɔb anie.” 11Nayuɔ aluɔra agba obhuɔ akuna ka ega amu asig anyim obhuɔ fiefie, atuɔnga Zises.

Zises Afanga Nyama Abina Nie Nlum

(Mat 8:1-4; Mak 1:40-45)

12Ka ntina yi Zises azuɔna ka ela zizi nie nlum abha yuɔ abina abuna yie. Abie si anyang Zises, agbɔ ka atuɔ ma amar ayie, aliera Zises si, “Ntun ekuɔrimawa ekuɔr nimim me mbara.”

13Zises atina obhuɔ akam yie. Amadag si, “Mme mo niena. Bara!” Ka ntina nyi na yi abina atara.

14Nayuɔ Zises atuɔ yie si, “Dotuɔ nie mayuɔ, kan sung tunga nzuɔma Osɔwɔ ziza oka ezuɔmzuɔm ebiem kǝn Mosis aka ezigha atib ma efanga za kǝn anie anyanga si omosar.”

15Kǝn otib awie osanga ofiera okpiena, adibunga anie aba ama yuɔg yie atabha efanga ka ayama. 16Kan Zises ka ekpanga ntina ananga amu ka mfum fi anie akadi amakag nzuɔm.

Zises Afanga Nkpuɔgha Ngugu Nienlum

(Mat 9:1-8; Mak 2:1-12)

17Ofu yiyi ebiem kan Zises ananga akpina nna, Afarisi ma akpanga bha azigha azuɔna mfa, adu ka ela mazimazi ka Galili, ma ka Zudiya ma Zerusalem, azuɔna mfa. Nsama Ntun azuɔna mfa mane si yie afanga ayama. 18Abhalum bibha atabha nkpuɔgha ngugu ka ekpa asieb ebiem kan akuɔgha yie alam mane ka nzu nyi si anugha yie ka amara Zises. 19Kan zi ariɔyang mbha yi asinga alam mane atib ka adibunga anie, ama yara ebuna nzu mane, asana yie ma ekpa ka ebanga zi amozibha, ka etingeting adibunga anie nzi anunga yie, ka amara Zises.

20Ka Zises amoyang eniena obhuɔ, adag si, “Ntiewanga omotabha oyimoka ka abibi.”

21Afarisi ma akpina bha azigha atuɔr mefara ka atima obhuɔ si, “Duɔ yuɔna yuɔ akuɔ zizie kan Osɔwɔ? Duɔ amana ayima aka abibi ariema ozuɔn Osɔwɔ manting.”

22Zises agbiera ogbiera mfara obhuɔ ama bab si, “Edu sisien kan wan efara anyim ka atima yana? 23Zing ega ediegha: si adag si, ‘Amoyima aka abibi yana,’ masi adag si, ‘Mu zien?’ 24Kan si wan egbiera si Muɔn Nienlum a Nienlum akpi nsam ka ngun si ayima aka abibi.” Nayuɔ atuɔ nkpuɔgha ngugu nienlum nyuɔ, “Ntuɔ wa, muyima, tab ekpa za sung kura ka ozuɔna.” 25Ka aza nya naya yie amu ayima ka amara obhuɔ, amuɔb ekpa zi ananga anuɔnga akura ka mfum fi ananga azuɔn, ananga aka Osɔwɔ nkar. 26Mayuɔ mayuɔ azuɔn ka obuɔna ngugu aka Osɔwɔ nkar. Obhuɔ amadag, “War emenyang anyim obuɔna ngugu elien.”

Zises Alana Libai

(Mat 9:9-13; Mak 2:13-17)

27Ebiezuɔn mfa Zises adu amanyang ntabha ntab ofina mfum yuɔ ayie si Libai, azig ka mfum etum a fie. Zises atuɔ yie si, “Tuɔngim,” 28Libai ayab, amu asig anyim fie, atuɔnga yie.

29Emebie ezuɔn mfa Libai enugha egama ekag aka Zises ka nzu yie. Zises azuɔna egamanie ka ekag nzi. Akpanga atabha bha ntab ofina mfum ma anie edidie atuɔbha azuɔn mfa ananga ayie ma obhuɔ. 30Kǝn Afarisi ma akpina bha azigha ba adi ka ebunga Farisi atira atuɔ ba atuɔnga yie, “Edu sisien, kǝn eyigha ewuɔgha ma atabha bha tasi ma anima bha abibi.”

31Zises abanga obhuɔ si, “Yuɔ adi ka nsam sang asiebha mfanga anie, yuɔ adi ka oyama asiebha. 32Ndobha si ma nlan ba abarobara, mba ka anima bha abibi si anyanga ekpin.”

Mbabha Abanga ma Nzan a Nzuɔm

(Mat 9:14-17; Mak 2:18-22)

33Adagha atuɔ yie si, “Atuɔnga bha Zɔn ananga azuɔn ma nzan akag nzuɔm ebiem zizi kǝn atuɔnga bha Afarisi, kǝn bibha akam na ka eyigha ma ewuɔgha.”

34Zises abanga obhuɔ si, “Wan emaneman enunga anie nkuɔgha nkan azuɔn ka nzan ka mfuɔna eban adi mfa? 35Kǝn ntina adinga abagha yi ayigha mfuɔna eban ke efuɔnga obhuɔ; ka afu nya yuɔ ama zuɔna ma nzan.”

36Atuɔ obhuɔ edag otubha akpu nzi si: “Nie mayuɔ yuɔ akagha eza mbuɔma eyuɔbha efiefie ka eyuɔbha ekukuna adim. Animima na, asagha zi efiefie, nzi enima enagha ezuɔna ebiem zizi ma zi ekukuna. 37Mayuɔ ananga yanga nsi efie akag ka akukuna adagha ngugu nyam. Animimana, nsi efie nyi awana adag nya; nsi nyi awu adag nya anyuɔgha. 38Nasang nsi efie abana si akag ka adagha ngugu nyam efie. 39Kǝn mayuɔ yuɔ amamawuɔ ekikara nsi akpo sieb nsi efie adim, atib adagha si, ‘Yi ekukuna aga onuɔb.’”