2Ch 36 | PMA | STEP |

‏ 2 Chronicles 36

Iahova Sakin Me-Isrel Keil Vasi Uva en Hen Me-Babilon Keil ven Tisaen Keil One

2 Kronikel 36:14-21

14 Hetetamen keil onen me-Sudah keil, pris keil ka meatin vasi keil amules amusil sakien tatisa keil suval meatin keil ten kantri sav keil amul amumoni, ka tisaen keil one vilelau ka vasi out. Ka Eim Votut onen Iahova koa kei varei mumoni vi votut, keil amumoni mai vilehilu en meten. 15 Avaseini keil amumon koanek, Iahova, Ahi onen avu one keil, lises san provet keil onen avasel kat keil veni kei enmahis meatin keil onen ka enrovattei vapurun Eim Votut onen. 16 Ka keil amumon karien va kat eiloheh keil onen Ahi, asesein selusien keil onen, ka aviteai karen provet keil onen. Amumoni mukok va vio ... vurohien onen Ahi mariso va kat keil ka sakras emun vaha netan.

17 Sakini, Iahova san asuv houlu ten out Babilon va vavae vatal keil, isen Nebukanesa. Kei mu vinvini litetai keil ten out Sudah, ral koakeil emun aro suai en Eim Votut onen Ahi. Ahi enromahis etai meatin. Ehon keil ral min atouli keil, meahos keil ral min atou keil, koakeil amesai ka koakeil ave tahos, ka ulmatu ka tovuli keil emun, Ahi mumon keil vasi uva en hen asuv houlu Nebukanesa. 18 Ka Nebukanesa ral min meatin keil onen alah vuol en tounah vasi keil one: tounah keil en Eim Votut onen Iahova ral mane keil koa mul ien, ka tounah keil vasi koa mul en mari eim onen asuv houlu ral min eim keil onen hetetamen keil onen. Tounah vasi keil onen me-Sudah keil, me-Babilon keil akuri vi one suk. 19 Keil aling ahang kan lin Eim Votut onen Ahi, amu lin vieh koa karali taon ten out Serusalem ral min more eim keil onen asuv houlu ral min hetetamen keil onen. Tounah keil koa arlahtei, aling ahang kan lin vasi. 20 Me-Sudah keil vasi koa armu vinitei ka amoul amules, me-Babilon keil alah keil uva en out ose keke avoumon keil avahi slev keil one ka onen ehon one keil koa ikatau. Sakini, amules en hen me-Babilon keil rokol avong koa asuv houlu ten out Persia mai vae mulin keil ka tounah one mai vi onen. 21 En sakien enek, selusien koa Iahova sani min provet Seremaea mai vi anatin koa vit, ^{▼▼2 Kron 36:21 Ser 25:11; 29:10} “Atan ekek hehi heite hon, meatin hetovuol houm ien hetokol sua hanumau etel ka halualim emun (70), hemal en sua keil koa arali koteh Sabat keil ien.” ^{▼▼2 Kron 36:21 En Levitikas 25:1-7 Ahi mengkati keke meatin keil onen akilea avoum en atan tai sua ahetai (6). Ka en sua koa vi oulu (7) en keil, keil iling atan koanek heseh, irluhluhtei ien. Ka me-Isrel ka me-Sudah keil armumontei vamukonek.}

Asuv Houlu ten out Persia Maen Me-Isrel Keil Avaha Ris en Out Ose Keil

2 Kronikel 36:22-23

22 Navong asuv houlu Saeros ten out Persia kur rohtoh en keihoen onen, Iahova mumon selusien koa sani min provet Seremaea mai vi anatin. ^{▼▼36:22 Seremaea 25:1-14} Ahi sakin asuv houlu Saeros vasan mengkatien tai vaha en out vasi koa kei losil kati keke amutis selusien tai onen keke avahuli en meten meatin vasi keil onen koa vit,

23

“Koanek vi selusien onen Saeros, asuv houlu ten out Persia. Iahova, Ahi ten out nesa, ling kantri vasi keil ten out out netan en hek. Kei rie lat nau moumon Eim Votut onen en taon ten out Serusalem en atan ten out Sudah. Sakini, kosa, kami koa mivi meatin keil onen, mikilea mivaha ris en out Serusalem. En hisien keil onak, navis Iahova, Ahi onami, heto ven kami en ualien keil onami.”