2 Timothy 4
1I KAKALIKI on uk melel mon Kot o Krijtuj Iejuj, me pan kadeikada me maur o me melar akan ni a pan kotido ni a wei, 2Padaki majan nantion eta ni anjau mau o ni anjau me jued kajaleda dip, o kapunada, o panaui ni kanonama, o kaukawewe. 3Pwe eu anjau kokodo re jota pan mauki padak en kamaur, a duen pein arail inon kajapwilada jaunpadak kai, me pan wiada padak duen me re mauki. 4O re pan kawuki jan melel jalon arail, ap kawuki on kajoi mal akan. 5A koe en majamajan ni meakaroj. Peren ki kamekam, kapwaiada wiawia en wanporon amen. Kapwaiada mau om koa. 6Metet nai kamekamela o anjau en ai mela leler. 7I wiadar pei mau eu, i kanikielar ai weir en tan, i dadaurata pojon. 8Ari, nin en me pun nekinek on ia, me Kaun o pan kotiki on ia ni ran o, iei jaunkapun pun, a kaidin on nai ta, pwe on Karoj, me anane a pwarado. 9Kaporijokki uk, pwen madan kodo re i. 10Pwe Demaj me kaje ia lar pwe a pok on jappa et, ap jamalaner Tejalonik, Krejenj Kalejia, Tituj Dalmatien, 11Lukaj eta mi re i, ukada Markuj, pwen ian kodo met, pwe a katepa on ia ni ai dodok. 12A Tikikuj i kadaralan Epij uj. 13Likau pup, me i pwilikidier Trouj ren Karpuj, wado ni om pan pwarado, o puk kan o kijin likau kan. 14Alekjander jaunmata wia on ia me jued toto, Kaun o en kotin depuk on i duen a wiawia kan! 15Koe pil kalaka i, pwe a kin nantion palian at padak. 16Ni tapin ai pan pakadeikada, jota amen me jauaja, pwe karoj tan jan ia, mepukat ender pwaipwai on irail. 17A Kaun o kotin ieian ia o kamana ia da, pwe i en kak kanikiela ai padapadak o men liki kan karoj en ron. I dorelar jan au en laien. 18A Kaun o pan kotin kapit ia la jan ni wiawia jued karoj, o kotin kalua won ia wein nanlan, I en linan kokolata! Amen. 19Ranamau, won Prijka o Akwila o toun im en Onejiporuj. 20Erajtuj mondi Korint, a Tropimuj jomaudar, i ap pwilikidi Miletuj. 21Kaporijokki uk, pwen kodo mon anjaun kapau. En Eupuluj a ranamau won uk, o pil en Pudenj, o Linuj, o Klaudia, o ri atail karoj. 22Kaun o en kotikot ni nen om! Mak en mi re omail!
Copyright information for
PON