‏ Acts 10

1OL amen mi Jäjarea ad a Korneliuj, me jaumaj en pwin en jaunpei eu, me ad a men Italien, 2Me lelapok o majak Kot ianaki toun im a karoj, me poden kijakij on aramaj, o kapakap on Kot anjau karoj. 3A majani ni kajanjal eu tounlan en Kot amen, me pwara don i ni klok jilu, majani on i: Korneliuj! 4A kankakil i o majakadar, potoan on: Main, dakot? A kotin majani on i: Om kapakap akan o koleir leler wajailen Kot. 5Koe ari kadar won Iope ol akai, ukedo Jimon, me pil ad a Petruj, 6Me kin kairu ren Jimon jaun wia kil en man, me im a jal on jed; 7A tounlan o, me kotin mamajani on i, lao kotilar, ap ekeredo na ladu riamen o jaunpei lelapok amen, me kin mi re a anjau karoj. 8A lao majani on irail mepukat karoj, ap kadar ir alan Iope. 9A mandan ran o ni ar japajapalwei o koren ion kanim o, Petruj ap kotila pon im o, pwen kapakap impan klok eijokriau. 10Ap men jakadar o a pan jak. A ni ar kaonopadan i, ap majani kajanjal eu: 11A kilaner nanlan a ritidar o ed eu likamata tein pwainok kalaimun kokodi, me imwi kan pukopuk pena o pwilidi on nani pwel. 12Jon en man en jappa karoj mi lole, me kin aluki pa, o me laualo, o man korop kai, o manpir en pan lan. 13Onil eu peidi don i majanier: Petruj, paurida, kamela o mana! 14A Petruj potoan on: Kaidin Main, pwe i kaikenta mana me mal kot, de me jamin. 15Anil o majani on i kariapak: Meakot, me Kot kamakelekeladar koe der mamaleki! 16Mepukat wiauier pan jilepak! Ed o ap kapuredalan nanlan. 17A Petruj ni a kotin ponepon kidar wewe en kajanjal o, me a majanier, kilan, ol oko me pakadarado jan ren Korneliuj, ap rapaki im en Jimon o uda pan wanim o, 18O likilikwir pepeidok, ma Jimon, me pil mar a Petruj kotikot waja o. 19A Petruj ni a kotin madamadaua duen kajanjal o, Ngen ap kotin majani on i: Kilan ol jilimen raparapa kin uk. 20Uda o kodiwei ian irail o jo peikajal, pwe Ngai me kadar irail do. 21Petruj ap kodilan ren ol oko, majani: Kilan, ietnai, me komail raparapaki. Da karepen omail kodo? 22Irail inda: Korneliuj jaumaj en jaunpei amen, ol pun amen, me majak Kot, o kalok mau ren Juj akan karoj, me manier jan ren tounlan jaraui en Kot amen, en poron don komui, en kotido nan tanpaj a, pwen mani jan komui majan akan. 23I ari kajamo ir lon o kinte kin irail er. A mandan ran o a kotin ian ir wei; o jaulan en Iope kai pil ian i. 24A mandan ran o re leler Jäjarea. A Korneliuj kapokon pena jau i o kompokepa kan ap auiaui irail. 25A Petruj lao pedelon on, Korneliuj ap tu on i o pupedi on ni aluwilu a o kaudok on i. 26A Petruj kauada i indada: Uda, pwenai pil aramaj amen. 27A ni ara majan pena, ap pedelon on, diaradar me toto momod pena. 28I ari majani on irail: Komail aja, me a jota inen, ol en Juj amen en pat on men liki amen de kola re a. A Kot kotin kajale on ia, i ender mamaleki de jauteki amen aramaj. 29I me i koki do o jo peikajal ni ar idok ia. Ari, i men kalelapok, da karep en omail eker ia do? 30Korneliuj ap majaniada: Mon pon pa ponnai kaijejol lel auer wet. A ni klok duau i kapakap nan im ai. A kilan, ol amen me kot mo i, mi nan likau linalin, 31O majani: Korneliuj, om kapakap me pwaida, o om koleir leler kupur en Kot. 32Ari, ilakilan Iope, pwe Jimon me pil ad a Petruj, en kodo. A kakairu nan im en Jimon jaun wia kil en man, me jal on jed. A lao pwarado, a pan padapadaki uk. 33Ngai ari pitipit ilakilan komui, a meid mau omui pwarador. Ari iet kit karoj janjal mon Kot, pwe jen ron meakan, me Kot majani on komui. 34Petruj ap kotiki pajan jilan i indada: Melel, i ajaer, me Kot jota kin kotin lipilipiliki aramaj, 35A nan jap karoj meamen majak i o wiawia me pun, nan i me konekon re a. 36Majan o me a kotin kadara don men Ijrael, en kaire kin irail popol ren Iejuj Krijtuj. (Nan i me Kaun pan meakaroj). 37Komail aja majan me kalok jili me tapidar nan Kaliläa lel Iudäa pon murin paptaij, me Ioanej wiada padak due. 38Duen en Kot a kotin keiekier Iejuj en Najaret Ngen jaraui o manaman, me kotin kakan jili wiawia mau o kakeladar me tanwar en tewil, pwe Kot kotin ieian i. 39A kit karoj me jaunkadede en meakaroj, me a kotin wiadar nan jap en Juj akan o pil Ierujalem, me re pajuredi on nin tuka o kamatalar. 40Nan i me Kot kotin kaiajadar ni ran kajilu o kajaleda i. 41Kaidin on aramaj karoj, pwe on jaunkadede kai, me pilipildar ren Kot, kit me ian i jak o urak murin a iajadar jan ren me melar akan. 42I ari majani on kit, jen padapadak on aramaj o kadede melel, me i, me Kot kotin piladar, pwen Jaunkapun pan me maur o me melar akan. 43A jaukop karoj kin kadede duen i, me dip en ir karoj, me pojon i, pan lapwada pweki mar a. 44A ni Petruj kotikida majan pukat Ngen jaraui ap moredi pon karoj, me roneron padak o. 45A me pojon akan, kijan jirkomjaij, karoj me ian Petruj pwarador, puriamuiki, me Ngen jaraui pil moredi pon men liki kan. 46Pwe re ronadar ar lokaia kidanil toror kapina Kot. Petruj ap majanier: 47Ij me pan inapwiedi pil, me mepukat ender paptaijela, pwe re aleer Ngen jaraui dueta kitail? 48I ari majani, me ren paptaijela ni mar en Iejuj Krijtuj. Irail ap poeki, a en mimieta re ’rail ran akai.