Act 18 | PON | STEP | MURIN mepukat a kotila ja n Aten o kotila n Korint,

‏ Acts 18

1 MURIN mepukat a kotila jan Aten o kotilan Korint, 2 A lao diaradar Juj amen me ad a Akwila me ipwidier Pontuj, me apton kodo jan Italien o a paud Prijila, aki Klaudiuj majani, me Juj oko karoj en kokoke jan Rom, i ari kotilan re ’ra. 3 O kotikot re ’ra, ian dodok, pwe ira jon ta ieu wiada im likau. 4 O ni ran en japat karoj a kin kotin padapadak nan jinakoke o kalekalolekone men Juj o men Krik kan. 5 A Jilaj o Timoteuj lao kodido jan Majetonien, Pauluj kotin jopijokki kaualap padak o, pwe a kadede on Juj akan, me Iejuj me Krijtuj. 6 A irail lao akamai o lalaue, a ap jipededi japwilim a likau majani on irail: Dip omail en kapokon on pein komail. Ngai me makelekel jan met, i pan kola ren men liki kan. 7 I ari kotila jan waja o ap kotilan nan im en amen me ad a Jujt me kin kaudok on Kot, me im a pat on jinakoke. 8 A Krijpuj, jaumaj en jinakoke pojonla Kaun o, ianaki karoj toun im a; toun Korint me toto lao ronada, ap pojonla o paptaijela. 9 Kaun o ap kotin majani on Pauluj ni a auramen ni pon: Der majak, padapadak ender nenenla! 10 Pwe Ngai ian uk, o jota me pan jair uk, pwen kame uk, pwe nai aramaj me toto nan kanim wet. 11 I ari kotikot waja o par eu o jaunipon wonu kaweweda majan en Kot nan pun arail. 12 Ni muein Kalion kakaundar Akaia, Juj akan ap wiaki eu, jaikidi Pauluj o wa don i mon mol en kadeik o, 13 Indada: Lap men et kin pitipiti aramaj, ren kaudok on Kot ap palian kapun. 14 Pauluj lao men majanda, Kalion ap majani on Juj oko: Komail Juj oko, ma japun eu de me jued kot, i pan ron komail. 15 A ma akamai duen lamalam, o ad akan, o omail kapun, nan pein komail pan wia, pwenai jota men jaunkapun pan mepukat. 16 I ari jiken ir wei jan ni mol en kadeik o. 17 A karoj ap jaikidi Jojtenej, jaumaj en jinakoke o woki i mon mol en kadeik o. A Kalion jota injenoki mepukat karoj. 18 Pauluj lao kotikot waja o ran toto, ap kotin kamurimuri on jaulan kan o ianala jop pot kotilan Jirien; Prijila i Akwila ian i. Maj a kotin kotedar tapwi nan Kenkräa, pwe a inau mia. 19 I ari jupi on Epijuj, pwilikidi on ira waja o, a pein i kotilon on nan jinakoke o kaparok on Juj oko. 20 Irail poeki i, en mimieta re ’rail anjau warai, a jota kotin duki on. 21 O a kotin kamurimuri on irail majani: I udan ian kamadip kokodo nan Ierujalem. A ma Kot pan kotin mueid on ia, i pan pure don komail. A ap kotin majel jan Epijuj. 22 A lao kotin keredi Jäjarea, ap kotidala ranamau on momodijou ap kotilan Antiokien. 23 A kotikot waja o anjau kij, ap kotila kakan jili nan wein Kalatia, o Prikien, kakelada tounpadak kan karoj. 24 A men Juj amen, me ad a Apoluj, me tikidar Alekjandrien, iei ol kadek lokaia, o me ereki kijin likau kan, a ko don Epijuj. 25 Men et aleer padak ni al en Kaun o, o a kelail ninen e, a padapadak o kaweweda mau meakan duen Iejuj; a paptaij en Ioanej me a aja. 26 I ari tapiada aima padapadak nan jinakoke. A Akwila o Prijila lao ron i, ap uke don ira i, kawewe on i al en Kot. 27 A lao men kola Akaia, jaulan kai ap intin won tounpadak kan, poeki re ’rail, ren kajamo i. I lao pwarado, ap jauaja irail, me pojon kilar mak en Kot. 28 Pwe a manaman on Juj akan, kajale on irail jan kijin likau kan me Iejuj me Krijtuj.