‏ Acts 20

1MORONG lao dukedier, Pauluj ap molipe pena tounpadak kan, ap kotin kamurimuri on irail o kotila, pwen jailokelan Majetonien. 2A lao kakan jili jap oko, o panapanaui irail kaualap, ap kotilan wein Krik. 3A lao kotikot waja o jaunipon jilu, ap men kotilan Jirien, ari jo, a kotin pure don Majetonien, pwe Juj oko majamajan i. 4A iet akan, me likid i lel Ajien: Jopater nain Piruj men Peröa, a Arijtarkuj o Jekunduj men Tejalonik, a Kaiuj men Derpe, o Timoteuj, o Tikikuj, o Tropimuj men Ajien. 5Mepukat tion maj ap aui kit nan Troaj. 6Murin kamadip en prot jomut je jerok wei jan Pilipi, tanatanki ran limau kokola re ’rail Troaj, waja je mimi ia ran iju. 7A ni ran kaieu en wik, ni at pokon pena, pwen pilitiki pena prot, Pauluj ap kotin padaki on irail. A mandan ran o a pan jamala. A kotin kawarailar a padak lao lel ailep en pon. 8A lamp toto mi nan kokon poa, waja je pokon pena ia. 9A manakap amen, me ad a Eutikuj, me momod nan wanimtuk, me mair kalikala. A ni en Pauluj a padak warai, i ari mair kalikala melel, ap pupedi jan ni kajilu en kokon poa, o re pokada, a melar. 10A Pauluj me kotidi kipedi on poa o polodi i majani: Komail der mauk, pwe a memaur! 11I lao kotidala o pilitiki pena prot, o konoter, o padapadak warai lao lel waja ran, ap kotilar. 12A irail wado manakap memaur ap pereperen kaualap. 13A kit me madan ian jop o, tanatan kolan Ajoj, waja je pan uk ia Pauluj, pwe i me a kakalik on kit. A pein i pan japal. 14A lao tu on kit nan Ajoj, je ap uk i, tanalan Mitelene. 15Kit tanatan kodo jan waja o, a manda je lel on likin Kioj, o manda je lele don Jamoj, o je mondi Trokilion, a manda je pwara don Miletuj. 16Pwe Pauluj kileledier en dauli Epijuj, pwe a der pwapwand nan Ajien, pwe a kotin karawaru, ma a pan kak, a pan lel on Ierujalem ni ran en Pentikoj. 17A jan Miletuj a kotin ilakilan Epijuj molipe jaunkoa en momodijou kan. 18Irail lao pwara don i, a kotin majani on irail: Komail aja duen ai wiawia re omail anjau karoj jan ni tapin ran o, me i lel Ajien, 19Duen i papa Kaun o ni aktikitik, o janejan, o kamekam nan pun en Juj oko, ni ar rukiruki ia di. 20O duen i jota oki janer meakot me katepan, pwe i kaireki komail karoj, o padapadaki komail janjal o nan im akan. 21O i kadede on men Juj o pil men Krik kalula on Kot o pojon atail Kaun Iejuj Krijtuj. 22A kilan, i ap kokodalan Ierujalem,nen i jalidi o i jaja, da me pan pid ia waja o. 23A Ngen jaraui kin kotin kadede on ia nan kanim karoj, me jal akan o kamekam kin auiaui ia. 24Ari jo, i jota kin injenoki mepukat, i pil jota kajampwaleki maur i, pwe i en kaimwijokela ai koa dodok, me i aleer jan ren Kaun Iejuj, en kadede ronamau en mak en Kot. 25A kilan, i ap ajaer, me komail karoj, me i padapadaki oner wein Kot, pan jolar udial maj ai. 26I me i kadede on komail ran wet, me i makelekel jan ntan komail karoj. 27Pwe i padaki on komail duen kupur en Kot, o jota man meakot me i okijan komail. 28Komail ari kalaka komail o momodijou karoj waja, me Ngen jaraui kotin kajapwil komail dan jilepa ko, pwen apapwali momodijou en Kot me a kotin pwainiki pein nta. 29Pwe i ajaer, me murin ai jamalar kidi komad akai pan pwara don komail, me jota pan kajampwaleki pwin o. 30A ol akai pan uda jan nan pein komail, me pan padak japun, pwen wiaki tounpadak kan pein ar warok kan. 31Komail ari majamajan o tamanda, me i jota dukedi, panaui amen amen, janejan ni ran ni pon jaunpar jilu. 32Ari, i pan mueid on komail Kot o majan en kupur a, me manaman on kapwai komail ada, o kotiki on komail jojo eu ren me jaraui kan. 33I jota noroke en amen a jilper, de kold, de likau. 34Pein komail aja, me pa i kat kin papa ia o ai warok kan. 35I kajale on komail er meakan duen komail en dodok, pwen jauaja me luet akan o tamatamanda majan en Kaun Iejuj akan, duen a pein kotin majani: Kiki wei me kaperen jan ale. 36A lao kotin majanier mepukat, a kelepuki ian irail karoj kapakap. 37Irail ari janejan kaualap o polodi tapin wor en Pauluj o metik i. 38Re injenjuedekier kaualap a majan, me dene re jolar pan udial jilan i. Irail ari likid i koti on pon jop o.