‏ Acts 7

1JAMERO lapalap ap majani: Melel mepukat? 2A majani: Ri ai o jam ai kan, komail ron, Kot en linan kotin pwara don jam atail Apraam ni a kotikot Mejopotamien, ni a jaikenta kotikot Aran, 3O kotin majani on i: Kowei jan nan jap om o jan ren jau om, ko won eu jap, me I pan kajale on uk! 4I ap lipa jan nan jap en Kaltäa o kotikot Aran. Jam a lao matalar, a kotin kalua won i jap wet, waja komail kotikot anjau wet. 5I ari jota kotin mueid on i, en japaneki jap o, jota waja, me laude on pat en nä eu, ap kotin inauki on i, ni anjau jaikenta japwilim a jeri, me a pan kotiki on i o kadaudok a, en japaneki. 6A iet duen me Kot kotin majani: Kadaudok a pan kakairu nan jap en men wai, o re pan lidula, o kanaudokala jaunpar papuki. 7O Kot kotin majani: I pan kadeikada toun wei o, me re kin liduliduwi. A murin met re pan lipa jan jap o, ap kaudok on ia jap wet. 8I ari kotiki on irail inau en jirkomjaij. A ap wiadar Ijaak o jirkomjaij i ni ran kawalu, a Ijaak wiadar Iakop, a Iakop jam atail ekriamen oko. 9A jam atail oko peirinki Iojep ap netikilan i Äkipten. A Kot me kotin apwali i, 10O kotin dorela i jan ni a apwal akan karoj, o kotiki on i konekon on kupurokon mon Parao, nanmarki en Äkipten. I ap kajapwilada i, en kaun en Äkipten o a dipijou karoj. 11Muein lek ap kipadi jap en Äkipten karoj o Kanaan; i anjau o me apwal melel, o jam atail akan jota diaradar jak ar kijin jak. 12A Iakop lao mani, me mana mi Äkipten, ap kotin poronelar maj jam atail akan. 13A lao kariapak Iojep ap diarokadar ren ri a ol akan, o jau en Iojep janjaledo ren Parao. 14Iojep ap ilake don jam a Iakop, pwen kotilan re a o jau i kan karoj, irail me ijiakan limen. 15Iakop ap kotidilan Äkipten o matalar, i o jam atail akan. 16Irail ari wijikelan Jikem o jaredier nan joujou o, me Apraam netiekida moni kai jan ren nain Emor oko, jam en Jikem. 17A anjau, me inau en Kot on Apraam pan pwaida, lao korendor, men Ijrael ap kaparapar o totolar nan Äkipten. 18A lao lel amen nanmarki kaunda Äkipten, me jaja Iojep, 19I me widiwidina kainok atail oko, o wia jued on jam (atail) akan, pwe ren kajela nairail kijin jeri kan, pwe re de memaurata. 20I anjau me Mojej ipwidier, me jeri kajelel amen, ap apapwalieta nan im en jam a jaunipon jilu. 21A lao lokidokilar, japwilim en Parao jeripein ap dorela i o kakairada dueta udan na. 22Mojej ari padakeda ni jon en lolekon en men Äkipten karoj; a i me manaman ni a majan o wiawia kan. 23A lao jaunpar paeijok dauer poa, ap lamedar, en tu on ri a ol akan men Ijrael. 24A lao majani amen, me kalokolok mal, ap jauaja i o depuk on, me kaloke mal, ap kotin kamelar ol en Äkipten. 25Pwe a kupura, me ri a ol akan pan dedeki, me Kot pan kotin kapiti kin ir jan lim a; a re jota dedeki, 26A mandan ran o a kotila re ’rail ni ar akamai pena, ap men kotin kapol ira la, majani: Koma pirien eu, menda koma wia japun nan pun oma? 27A me wiada japun on men imp a o jikon wei i, inda: Ij me kajapwil uk adar, pwen at jaumaj o jaunkapun? 28Koe pan kame ia la dueta koe kamela men Äkipten aio? 29Mojej ap tanki jan lokaia pot et o kakairu jili nan jap en Midian eu, waja a kanaitikieda ol riamen. 30Kadekadeo lao par paeijok dauer poa, tounlan amen ap pwara don i ni nana Jinai nin tuka teketek umpumpul pot. 31Mojej lao majani, ap kotin puriamuiki kajanjal o. A ni a koti on, pwen majani, kapitie en Kaun o ap pei don i: 32Ngai Kot en jam om akan, Kot en Apraam, o Ijaak, o Iakop. Mojej ap kotin rerereda o majak udial i. 33Kaun o ap kotin majani on i: Ki jan jut ni nä om akan, pwe waja koe u ia me jaraui! 34I kilaner kankaneraner en nai aramaj akan, o I roner ar janejan, ap kodi don kamaio wei ir ala. Ari kodo, I pan kadar uk alan Äkipten! 35I Mojej, me irail mamaleki ni ar indinda: Ij me kajapwil uk ada, pwen at jaumaj o jaunkapun? I me Kot kotin poronela, en jaumaj o jaunkamaur ki lim en tounlan o, me kotin pwara don i nan tuka teketek. 36Iei i, me kalua ir jan o wiadar manaman o kilel akan nan jap Äkipten, o nan jed waitata, o nan jap tan jaunpar paeijok. 37I Mojej, me majani on men Ijrael: Kot pan kotiki on komail jaukop amen jan nan ipwin ri omail ol akan duetanai, i me komail en peiki on! 38Iei i, me mi nan momodijou nan jap tan ren tounlan o, me kotin mamajani on i pon nana Jinai, o me kotin ieian jam atail akan me kotin aleer majan en kamaur, pwen uje don kit. 39Me jam atail akan kan peiki on, ap jiken wei jan irail i, o nan monion arail re men japalan Äkipten, 40Potoan on Aron: Wiai on kit at kot akan, me pan tion mo at, pwe je jaja, da me wiaui on Mojej, me kalua kit jan nan Äkipten! 41Irail ari wiadar dikedik en kaupul amen ni ran oko, o mairon on kilel en ani mal o, o perenki, wiawia kan en pa arail. 42Kot ap kotin jaupei jan irail o kotin mueid on irail ren kaudok on uju pan lan akan duen a intinidier nan puk en jaukop akan: Iaduen komail men Ijrael, komail maironki on ia man akan nan jap tan ni par paeijok? 43Melel komail waroki on mol on en Molok, o uju en omail kot Rempan, dikedik kai, me komail wiadar, pwen poni; a I pan kajapoke komail la palila jan Papilon. 44Mol en kadede mi ren jam atail akan nan jap tan duen majan en i, me kotin mamajani on Mojej, me ren wiada duen kilel o, me a kotin udialer. 45Me jam atail akan pil aleer, ap ian Iojua wala ni ar japaneki jap en men liki kan me Kot kotin koko wei mon jilan en jam atail akan lao lel muein Dawid. 46Me konekon ren Kot o kotin anane kauadan Kot en Iakop mol eu. 47A Jalomo me kotin kauada tanpaj eu. 48A Waja lapalap jota kin kotikot nan mol, me pa en aramaj wiadar duen jaukop o kin katitiki: 49Nanlan deu i, o jappa utipa i, me Kaun o kotin majani. A im da, me komail men kauadan ia, de ia waja, I en kamol ia? 50Kaidin pa i, me wiadar mepukat karoj? 51Komail me katiwo o jo jirkomjaij nan monion o jalon omail, komail kin kaokaoe Ngen jaraui anjau karoj, komail kin dueta jam omail akan. 52Ij ren jaukop akan me jam omail akan jota kaloke? O re kamata ir ala, me kopador Pun men et, me komail panalar o kamatalar. 53Komail me aleer kapun ren tounlan kan, ap jota kapwaiada. 54Irail ronadar mepukat, ap olar nan monion arail o re teterokni on i. 55A Jtepanuj dir en Ngen jaraui kankakil nanlan o udial en Kot a linan o Iejuj a kotikot ni pali maun en Kot, 56Ap katitiki: Kilan, i ududial nanlan kan ar ritida, o Nain aramaj a kotikot ni pali maun en Kot. 57Irail ap weriwereda o pinale jalon arail o wiaki eu tana don i. 58Irail lao jikenewei jan nan kanim o, rap kate i. A jaunkadede kan pwilikidier ar likau ni nä en manakap amen, me ad a Jauluj. 59Irail ari kate Jtepanuj ni a kapakap o inda: Main Iejuj, re kotin kajamonen i! 60I ari kelepuki onil laudeda: Main re der kapokon on irail dip wet. A inda met, ap mairedi o ari.