Joh 15 | PON | STEP | NGAI wain melel pot, a Jam ai jaumat.

‏ John 15

1 NGAI wain melel pot, a Jam ai jaumat. 2 Ra karoj, me podidi on ia, ap jota wa, a kin lepuke jan, a karoj me wa, a kin koko, pwen wa totola. 3 Komail ari makelekel kidar padak, me I ki on komail er. 4 Komail podidi on ia onai on komail. Ra jota kak pein wa, ma a jo podidi on wain, iduen komail, ma komail jo podidi on ia. 5 Ngai wain pot, a ra kan komail. Me podidi on ia onai on i, iei i, me kin wawa toto; pwe komail jota kak wia meakot ma jotanai. 6 Meamen jo podidi on ia, pan lokidokila dueta ra, ap monedi; aramaj kin waja ir pena, kaje ir ala nani iai, ir ari pan ronala. 7 Ma komail podidi on ia, o ai padak kan podidi on komail, komail pan poeki meakot, me komail mauki, a a pan pwai on komail. 8 Nan i me Jam ai kalinana kila, omail wawa toto, o komail pan wiala ai tounpadak kan. 9 Due Jam o pok on ia er, iduen I pil pok on komail; komail podidi on ai limpok! 10 Ma komail pan peiki on ai kujoned akan, komail pan podidi on ai limpok, duen I kin peiki on en Jam ai kujoned akan, o podidi on a limpok. 11 Mepukat I padaki on komail er, pwe ai peren en podidi on komail, o omail peren en unjokela. 12 Nan iet ai kujoned: Komail en poke pena, duen i pok on komail er. 13 Jota me a limpok laude jan met, me pan mueid kila maur i kompokepa kan. 14 Komail me kompokepa i, ma komail wiawia, me I indai on komail. 15 I jolar kaadaneki komail ladu, pwe ladu jaja, me a jaumaj kin wia. A I kaadane kin komail kompokepa i kan, aki I kajale on komail er karoj, me I ronadar jan ren Jam ai. 16 Kaidin komail me pil ia dar, anai me piladar komail o kilele on komail, en kokowei kapareda wa, o omail wa en mimieta, pwe karoj, me komail pan poeki ren Jam ni ad ai, a pan kotiki on komail. 17 A iet me I panaui kin komail, komail en poke pena! 18 Ma jappa kailon kin komail, komail en aja, me a kailon kin ia mo omail. 19 Ma kijan jappa komail, jappa pan pok on me a; a komail kaidin kijan jappa, pwe I pil komail dar jan jappa, iei me jappa kailon kin komail. 20 Tamatamanda kajoi o, me I kajoia on komail er: Ladu me jota laude jan a jaumaj ma re kame ia er, re pil pan kame komail. A ma irail pan kapwaiada ai padak, re pil pan kapwaiada omail. 21 A mepukat karoj re pan wiai on komail pweki ad ai, aki ar jo aja me kadar ia dor. 22 Ma I jo kodo o padaki on irail, nan jota pan dip arail, a met jota peikid pan dip arail. 23 Me kailon kin ia, pil kin kailonki Jam ai. 24 Ma I jo wiadar dodok kan nan pun arail, me jota amen wiadar, nan jota pan dip arail. A met irail kilaner o kailon kin ia er o pil Jam ai. 25 A mepukat wiauier pwe majan o en pwaida, me intinidier nan arail kapun: Irail kailon kin ia, a jota karepa. 26 A jaunkamait lao kodoer, me I pan kadarado jan ren Jam, iei Ngen en melel, me kin kodo jan ren Jam, i me pan kadedenai. 27 A komail pil pan kadede, pwe komail ian ia er jan ni tapi o.