‏ John 9

1IEJUJ lao kotin daulul, ap majani aramaj amen me majkun jan a ipwidi. 2Japwilim a tounpadak kan ap idok re a potoan on: Rapi, ij me wiadar dip, i de jam a in a, pweki a ipwidi majkun? 3Iejuj kotin japen: Kaidik i me wiadar dip, pil kaidik in a de jam a, a pwe en Kot a wiawia kan en kajanjal kida i. 4I en kapwaiada wiawia kan en me kadar ia do arain anjaun ran, pwe pon pan kodo, i anjau jolar amen kak dodok. 5Arain ai mi jappa,nai marain en jappa. 6A lao kotin majanier met, ap likidi nani pwel, wiakida pwel madak irijki maj a. 7Majani on i: Kolan pil en Jiloa (iet wewe: Pakadarado), opinok ia! I ari kola opinok, ap puredo kilanada waja. 8A men imp a kan, o me ian kilanadar, me a men poekipoek amen maj o, rap indada: Kaidik i, me wonon poekipoeki? 9Akai me inda: I met; a akai me inda: Likamata i, a pein i indada: Ngai i. 10Irail ari indan i: Iaduen por en maj om akan a kapad pajan? 11A japen indada: Aramaj amen me adaneki Iejuj, me wiadar pwel madak, irijki maj ai, majani on ia: Kolan pil en Jiloa, opinok ia! I ari kola opinok, ap kilanada waja. 12Irail ap idok re a: Ia i? A japen: I jaja. 13Irail ap kalualan ren Parijär akan me majkun maj. 14Ari, ni ran en japat, me Iejuj kotin wiadar pwel, kapad pajan por en maj a kan. 15Parijär akan pil idok duen me a kilan kida waja. A japen irail: A ki on pwel ni por en maj ai, i ap opinok,nai ari kilanada waja. 16Parijär kai ap inda: Aramaj men et kaidik men ren Kot, aki a jota apwali ran en japat. Akai indada: Daduen, aramaj dipan amen kak wia kilel pukat? Irail ari liak toror pajan. 17Irail pil kalelapok ren me majkun o: Da me koe lamelame duen i? Pwe a kapad pajan maj om? A japen: Jaukop amen i. 18Men Juj oko ap jota kamelele, me a ipwiki wei majkun, ap kilanada waja. Irail lao ekeredo jam o in en me kilanada waja. 19Irail idok re ’ra: Nouma ol men et, me komail indinda, me a ipwiki wei majkun? Iaduen anarada waja anjau wet? 20Jam a in a japen ir indada: Je aja, me nait ol et, me ipwiki wei majkun. 21A je jaja duen anarada waja o me kapad pajan por en maj a. A malar, kainoma re a, a pan pein jakaraki i. 22Jam o in a inda mepukat, pweki ar majak Juj oko. Pwe Juj oko inauki pena, ma meamen pan kadede me i Krijtuj a pan lokidokila jan nan jinakoke. 23I me jam o in a indada kida: A malar, kainoma re a. 24Irail ap eker aramaj majkun kariapak indai on i: Wauneki Kot, je aja, me aramaj men et me dipan amen, 25A japen ir indada: I jaja, ma i me dipan amen de jo. I eta me i aja, menai me majkun maj o, i ap potoannaradar waja. 26Irail ap pil idok re a: Da me a wiai on uk? Iaduen a kapad pajan maj om? 27A japen irail: I indai on komail er, a komail jota ron? Da me komail pil men ronki? Komail pil pan a tounpadak ala? 28Irail kaurureki indada: A tounpadak amen koe, a kit tounpadak en Mojej akan. 29Kit aja, me Kot majani on Mojej. A lap o je jaja, waja a ko jan ia. 30Aramaj o japen indan irail: Meid kapuriamui! I me kapad pajan maj ai kat, a komail jaja, waja a koti jan ia. 31Kitail aja, me Kot jota kin mani me dipan akan. A meamen, me lan Kot, o dadaurata kupur a, iei me a kin kotin mani. 32Jan maj kokodo jota me ronadar, me meamen kapad pajan maj en me ipwiki wei majkun. 33Ma men et jota me ren Kot, a jota pan kak wia meakot. 34Irail japen indan i: Koe me ipwiki wei dip akan a koe ap padaki on kit? Irail ari kajela i. 35Iejuj lao kotin manidar, me re kajela i, a lao majani i, ap kotin majani on i: Koe kin pojon Nain Kot? 36A japen potoan on: Main, ij i pwe i en pojon i? 37Iejuj kotin majani on i: Koe me kilan i. A iet i, me kajokajoi on uk. 38A japen i: Main, i pojonlar, i ari kaudok on i. 39Iejuj kotin majani: I kodon kadeik nan jappa et, pwe me jo kilan waja, en kilanada, a me kilan waja, en majkunla. 40A Parijär akan, me mi re a, ronadar a majan pukat, re ap peidok re a: Da, kit me pil majkun? 41Iejuj kotin majani on irail: Ma komail majkun, jota pan dip omail. A komail indada: Je kilekilan waja, iei me omail dip pan mimietaki.