‏ Luke 11

1KADEKADEO ni a kotikot waja kij pwen laolao, a lao kotin erelar, amen japwilim a tounpadak kan ap potoan on i: Main re kotin padaki on kit kapakap, dueta Ioanej kin padaki on a tounpadak kan. 2A ap kotin majani on irail: Komail lao wia kapakap, ap inda: Jam at, mar omui en jaraui, wei ’mui en pwaida, 3Kotikido ran wet at tunol kaukaule. 4Lapwa jan kit dip at, dueta kit, me kin lapwada karoj, me wia dipi on kit, eder kaluan kit ren me katikatiamau kan. 5I ap kotin majani on irail: Ij re omail, me a kompok amen mia o me pan kola re a ni ailep en pon indan i: Kompoke pai, ki on ia lopon prot jilu, 6Pwe kompoke pai men pwarado jan a jailok o, ap jota, me i pan kak ki on i. 7A me mi nan im o pan japen inda: Koe der kadiropa ia, pwe wanim ritidier, o nai jeri ko ian ia nan wajan mair; i jo kak paurida o ki on uk meakot. 8I indai on komail, ma a jota pan paurida o ki on i aki kompokepa a, nan a pan paurida o ki on, me itar on i aki anidinid. 9I indai on komail, poeki, a komail pan tunole; rapaki, a komail pan diarada; letelet, a a pan ritida mo ’mail. 10Pwe karoj me poekipoeki, kin tunole; o me kin rapaki, kin diarada; o me kin letelet, nan a pan ritida mo a. 11De ij jam amen nan pun omail, ma na putak pan poeki na kijin prot, pan ki on i takai eu? De ma a poeki mam, pan ki on i jerpent amen? 12De ma a pan poeki kitor eu, pan ki on i jkorpion amen? 13Ma komail, me jon jued, aja duen kijakij mau on noumail jeri kan, nan melel kaualap. Jam omail nanlan pan ki on Ngen jaraui ren me poeki re a. 14A ap kotin kauje wei tewil amen, me loton. A kadekadeo tewil lao koiei janer, me loton o ap lokelokaia, a aramaj puriamuiki. 15A akai ir katitiki: Nan Peeljepup, jaumaj en tewil akan, me a kaujeki jan tewil akan. 16A akai kajonejon i, poekipoeki kilel eu jan nanlan. 17A ap kotin ani ar lamelam, majani on irail: Wei karoj ma a pan u pena nan pun a, a pan ola; o ma toun im eu pan u pena nan pun a, a jota pan pwaida. 18A iaduen, ma Jatan u on pein i, a wei pan kak pwaida? Aki komail indinda me denenai kauje wei tewil akan ki Peeljepup. 19Ma I kin kaujeki wei Peeljepup tewil akan, a ij me noumail ol akan kin kauje kin irail? Irail ari pan omail jaunkapun. 20A ma I kaujeki wei lim en Kot tewil akan, nan wein Kot lel on komail er. 21Ma me kelail o, me audeki kapwa en pei, pan jinjila im a, nan a kapwa nekinekid mau. 22A ma amen, me kelail jan i, pan palian i o kaloedi i, ap pan atia jan a kapwa en pei, me a kelekier, o nek pajan kapwa en kul. 23Meamen, me jota ian ia, iei me palian ia, o me jota kin dolun penan ia, iei me kin kajapoka pajan. 24Ngen jaut lao kowei jan ren aramaj, a kin tanatan jili nan jap tan akan, rapaki wajan kamol, a jota, me a diarada, i ap kin inda: I ap pan purelon on nan im ai, me i pedoi janer. 25A lao puredo, a diar, me a kokok o kapwater, 26I ari koieila, ale on inen ijimen, me jued jan pein i. Irail ap pedelon on lole, rap kakaujon ia; a aramaj pan jued jan maj. 27A kadekadeo ni a kotin mamajani mepukat, li amen, kijan pokon o, ap potoan on i: Meid pai kupur o, me wia ir adar, o didi kan, me re kotiki! 28A i kotin majani: Ei, meid pai, me kin ron majan en Kot ap kapwaiada. 29A pokon o lao teneten pena, a kotin majani: Di wet meid jued! Re kin rapaki kilel eu, a jota kilel pan janjal on ir, pwe kilel en Iona eta. 30Pwe duen Iona kilel eu on men Niniwe, iduen Nain aramaj on di wet. 31Li nanmarki en pali air amen pan u on ol akan en di wet ni kadeik o pan kari ir ala, pwe a pwrarado jan ni imwin jappa, pwen ron lolekon en Jalomo. A kilan, me laude jan Jalomo mi met. 32Ol en Niniwe kan pan u on di wet ni kadeik, o pan kariala i, pwe re kalula ni ar ronadar padak en Iona. A kilan, me laude jan Iona mi met. 33Jota me kin ijikeda lamp, ap kila waja rir, pil jo pan kopa, a pon deu a, pwe me pan pedelon on, en kilan marain o. 34Por en maj marain en pali war. Ma maj om makelekel, war om karoj pan dir en marain. A ma maj om me jued, war om karoj me pil dir en rotorot. 35En kalaka, pwe marain mi lol om, der rotorot! 36Ma war om dir en marain kaualap, o jota kijan rotorot mia, karoj pan dir en marain dueta linan en lamp, me kin jenjere uk ada. 37A ni a kotin kaparok, Parijär amen luke i, en konot re a. I ari kotilon kotidi nin tepel. 38A Parijär lao udial, ap puriamuiki, me a jota kotin omiom mon konot. 39A Kaun o kotin majani on i: Nan komail Parijär akan kin widen likin dal o plet, a lol omail me dir en me re kuliada o me jued. 40Nan pweipwei komail, kaidin i me wiadar pali liki, pil wiadar pali lole? 41A kijakij weita duen komail kak on! A kilan, karoj pan makelekel on komail. 42Juedi on komail Parijär akan, pwe komail, kin maironki eijokkij eu en minje, o raute o jon en kijin tan tuka kai, ap jota injenoki kadeik o limpok en Kot! Wiada mepukat ap pil kapwaiada me tei kan. 43Juedi on komail Parijär akan, pwe komail men mondi leppantam nan jinakoke kan o mauki, ren ranamau on komail nan waja en netinet akan. 44Juedi on komail, pwe komail rajon joujou kan, me jo janjal, o aramaj alialu poa, ap jaja ir! 45Jaunkawewe men ap japen potoan on i: Jaunpadak, komui pil kin juede kin kit majan pukat. 46A i kotin majani: Pil juedi on komail jaunkawewe! Pwe komail kin katoutou kila kapwa en wijik toutou aramaj akan, ap jota jairki jondin pa omail. 47Juedi on komail! Pwe komail kin apapwali joujou en jaukop akan, a jam omail akan kame ir ala. 48Komail ari kin kadede o peren kida wiawia en jam omail akan. Pwe re kame ir ala, a komail apapwali ar joujou kan. 49I me erpit en Kot indada: I pan kadar won irail jaukop o wanporon akan, a akai irail re pan kamela o pwaki irail jili. 50Pwe ntan jaukop akan, me kapwilipwili weier jan ni tapin kaua kokodo, en kapokon on di wet. 51Jan ntan Apel lel ntan Jakariaj, me kamelar nan pun en pei jaraui o im en kaudok, ei I indai on komail, a pan kapokon on di wet. 52Juedi on komail jaunkawewe! Pwe komail atia jan men kapir pan lolekon. Komail jota pan pedelon, ap inapwiedi, me men pedelon on. 53A ni a kotin mamajani on irail mepukat, jaunkawewe o Parijär akan ap tapiada palian i kaualap, kalekalelapok re a jon toto, 54O re majamajan i, o raparapaki, ma re jota kak diar meakot jan ni a majan akan, pwe ren kadipa i.