Luk 13 | PON | STEP | NI anjau o akai mia, me potoan o n i duen men Kaliläa kai, me Pilatuj doleki nt’ arail ar mairo n .

‏ Luke 13

1 NI anjau o akai mia, me potoan on i duen men Kaliläa kai, me Pilatuj doleki nt’ arail ar mairon. 2 A kotin japen majani on irail: Komail kiki on, me men Kaliläa pukat me dipan akan mon men Kaliläa tei kan, pweki ar kalokolok o? 3 Ngai, me indai on komail: Jo! A ma komail jota pan kalula, komail karoj pan mela dueta. 4 De irail ekwalemen ko, me im en ruk en Jiloa pupedi on poa, kame ir ala, komail kiki on, me irail me jued jan aramaj akan, me kaukaujon Ierujalem? 5 Ngai me indai on komail: Jo! A ma komail jota pan kalula, komail karoj pan mela dueta. 6 A kotin karajeraj on irail majani: Aramaj amen mia, me a tuka pik apot padedi nan a mat en wain, ap kodon rapaki wa, a jota me a diarada. 7 A ap indai on jaumat en wain: Kilan, par jilu i kodon rapaki wan pik pot et, a jota, me i diarada; paledi, da me a pinaki mal waja o! 8 A a japen indan i: Main, pui jan pil par wet, pwe i en weirada ni tapi, o ki on pwel mau. 9 A ma a pan wa, ari me mau, a ma jo, komui ap pan paledi jan. 10 A kotin padapadak nan jinakoke eu ni ran en japat. 11 A kilan, li amen mia, menen en jomau ti poa parnaulwalu, a koj pena o jota man kak uda. 12 Iejuj lao kotin majani i, ap molipei won i majani on i: Li, koe en maioda jan om jomau! 13 I ap kotin pwil po a lim a kan, i ari madan kajinenda, kapikapina Kot. 14 A jaumaj en jinakoke o makara kida pan Iejuj a kakelada i ni ran en japat, ap japen indan pokon o: Ran wonu, aramaj en dodok, i anjau me komail kodon kakelada, a iermen ni ran en japat! 15 Kaun o ap kotin japen i majani: Malaun koe, kaidin komail karoj kin lapwada kau o ejel jan deu a kalualan nim pil ni ran en japat? 16 A li men et, me nain Apraam jeripein, me Jatan jaliedi parnaulwalu, me jo mau, en lapwada ni ran en japat? 17 Ni a kotin majani mepukat, karoj me palian i, ap namenokala o aramaj karoj peren kida wiawia mau kan karoj, me wiauier pa a. 18 A a kotin majani: Wein Kot rajon da? O da me I en karajai on i? 19 A rajon wantuka eu, me aramaj amen kajela nan matuel ap wojada, wiala tuka kalaimun pot, o manpir en pan lan kaukaujon nan ra kan. 20 A pil kotin majani: Da me I en karajai on wein Kot? 21 A rajon kalep kij, me li amen ale, okila nan kajak en plaua jilu, karoj lao mutala. 22 Ni a kotilan Ierujalem, a kotin padapadak jili nan kanim laud o tikitik kan. 23 Amen ap potoan on i: Main, me malaulau pan maurela? A kotin majani on irail: 24 Ngiani en pedelon on nan wanim tätik, pwe I indai on komail, me toto pan jojon pedelon on, a jota pan kak. 25 A kaun pan im o lao udar ritinidier wanim o, komail ap pan pikikidi letelet ni wanim o indada: Main, ritinida jan kit! A ap pan japen indan komail: I jaja komail, o waja me komail ko jan ia. 26 Komail ap pan pikikidi indada: Kit me mana o nim imp omui, o komui pil kaukawewe nan atail al akan. 27 A i me pan inda: I indai on komail, I jaja komail o waja komail ko jan ia, ko wei jan ia, komail karoj me wiawia jued. 28 Janejan o teterok ap pan wiaui, komail lao kilan Apraam, o Ijaak, o Iakop, o jaukop akan karoj nan wein Kot, a komail pijikonla jan. 29 Nan re pan kodo jan nan maj en lan, o jan nan kapin lan, o jan nan apan, o jan air en lan, o re pan mondi ni tepel nan wein Kot. 30 A kilan, me pwand akai mia, me pan madan, o me madan kai mia, me pan pwand. 31 Ni auer ota Parijär akai kodo indai on i: Koti wei jan met, pwe Erod pan kame komui la. 32 A kotin majani on irail: Komail u kowei, indai on pokj ota: Kilan I kin kauje wei tewil oko o kamakamaureda ran wet o lakap, a ni kajilu en ran I pan imwijokela. 33 I en kokola ran wet, pil lakap, pil pali, pwe jota jaukop amen me pan kamela likin Ierusalem. 34 Ierusalem, Ierusalem, me kin kamela jaukop akan o kajuk, me pakadara don uk, pan pak toto I men kapokon pena noum jeri kan dueta lituk amen kin kompwal pena na kan pan pa a, a komail kaner, 35 Kilan, im omail pan tanla, pwe I indai on komail, komail jolar pan kilan ia, lao a pan pwaida omail pan inda: Kapina on me kotido ni mar en Kaun!