‏ Luke 2

1A KADEKADEO ni ran oko nanmarki Aukujtuj majani, toun jap akan pan wadawad pena. 2I wadawad kaieu, me wiauier ni muein Kireniuj kopina en Jirien. 3Amen amen koieilan udan jap we, pwen ian wadawad. 4Iojep ari pil kotila jan Najaret nan Kaliläa, kotilan Iudäa nan kanim Petleem, me udan kanim en Dawid, pwe i kijan kadaudok en Dawid, 5Pwen wadawad ianaki Maria, me kijin nin on i o me lijean. 6Kadekadeo ira lao kot waja o, a anjau ap leler pwen naitik. 7I ari naitikeda na mejeni men, ap kitimki pena likau en jeri kai, o pwilikidi on nan deun kamana man, aki im en kairu a koitalar. 8Jilepan jip kai mi nan jap o jinjila ar pwin jip ni pon. 9A kilan, tounlan en Kaun amen pwara don ir, o linan en Kaun dakar irail ada, ir ari majapwekadar kaualap. 10A tounlan o majani on irail: Komail der majak, kilan, i wa don komail ronamau, me pan kaperenda aramaj karoj. 11Pwe Jaunkamaur ipwidi on komail ran wet nan kanim en Dawid iei Kaun Krijtuj. 12A iet kilel on komail: Komail pan diar jeri o a kidikidiki pena likau en jeri o wonon nan deun kamana man. 13A madan pwin en tounlannederenia mi ren tounlan o, me kapina Kot majani: 14Kapina on Kot waja ileile o jappa en popol; o aramaj konekonelar! 15Kadekadeo tounlan kan lao kotila jan ir, kotidala nanlan, jilepan jip akan ap inda nan pun arail: Kitail pan kola Petleem pwen kilan me wiauier waja o, me Kaun o kotin kajale on kitail er. 16Irail ari madanedo, ap diaradar Maria i Iojep o jeri o, a wonon nan deun kamana man. 17Irail lao kilaner, rap kalok jili me re kajokajoi on ir duen kijin jeri o. 18A karoj, me ronadar, puriamuiki en jilepan jip oko ar kajokajoi on irail. 19A Maria nekinekid majan pukat karoj o madamadauaki nan monion i. 20O jilepa ko puredo kalinanada o kapina Kot duen karoj, me irail ronadar o kilaner, duen a loloke don irail er. 21Kadekadeo murin pon walu pon, ran en a jirkomjaij, re ki on mar a Iejuj, duen me tounlan kotiki on mon a kotin ipwidier. 22Ran akan en a kamakelekel lao daulier duen kapun en Mojej, ira ap wa don i Ierujalem, pwen mueid on Kaun o. 23Duen a intinidier nan kapun en Kaun o: Mejeni ol karoj me jaraui on Kaun o. 24O pwen kida mairon eu, duen me intinidier nan kapun en Kaun: Turtel muroi riamen de muroi pulepul riamen. 25A kilan, aramaj amen mi Ierujalem, mar a Jimeon, iei aramaj o me pun o majak Kot, o auiaui kapol pan Ijrael, o Ngen jaraui kotikot re a. 26A Ngen jaraui kotin kajale on i, me a jota pan mela, mon a pan kilan japwilim en Kaun Krijtuj. 27O Ngen jaraui kotiki on i, en kolan im en kaudok. A jam o in a lao walon on nan im en kaudok jeri o, pwen kapwaiada duen tiak en kapun o, 28I ap koledi i kapina Kot indada: 29Main, re kotin kajamo japwilim omui ladu popol duen omui majan, 30Pwe maj ai udialer omui kamaur, 31Me re kotin kauada janjal mon aramaj karoj. 32Pwen marain eu, me kamaraineki men liki kan, o kalinanada japwilim omui men Ijrael. 33A jam a o in a puriamuiki meakan, me re indinda duen i. 34Jimeon ari kapai ir ada indan Maria in a: Kom kotin mani, men et me japwile don kapupedi o kamaureda me toto ren men Ijrael, kilel eu, me re pan kaundenkoma. 35Nan kodlaj pan dokodinen omui, pwe monion en me toto en mulekiada. 36O li jaukop amen mia, mar a Ana, nain Panuel kijan kadaudok en Ajer, me likailapalar, me papaud jaunpar iju jan ni anjaun a makelekel. 37I ari li odi men jaunpar waleijok paieu tauer poa, ap jota kin pedoi jan nan im en kaudok, papa Kot kaijejol o kapakap ni ran o ni pon. 38I me pil pwarado ni klok ota, kapina Kaun o kajokajoi duen i on toun Ierujalem karoj, me auiaui jaunkamaur. 39Irail kanikiela karoj duen kapun en Kaun o, re ap purelan Kaliläa nan kanim Najaret. 40A jeri o kakairida, onenin, o dire kila erpit, o kalanan en Kot kotin ieian i. 41Ni par karoj jam a o in a kotilan Ierujalem ian kamadip en paja. 42A lao jaunpar eijokriau, irail ap kotilan Ierusalem, duen re kin wia, pwen ian kamadip en paja. 43Ran oko lao daulier, irail purelan jap arail, a jeri Iejuj kotikot eta Ierujalem, a jam o in a jota mani. 44A ira kiki on, me a kotin ian kapar o tion mo ’ra. Ira kokola ran eu, ap rapaki i nan pun en jau ’ra o ren men imp arail akan. 45Ni ara jota diaradar i, ira ap purelan Ierujalem rapaki i. 46Kadekadeo murin pon jili pon ira diaradar i nan im en kaudok, kaipokedi nan pun en jnunpadak kan, kotin mamani ir o kaikainoma irail. 47A karoj me ronadar i puriamuiki a kupurokon o a japajapen. 48Ira lao diaradar i, ap puriamuiki. In a ap majani on i: Nai jeri, da me kom wiaki on kit met? Mani, jam omui onai raparapa kin komui janejan. 49A kotin majani on ira: Menda koma rapa kin ia? Koma jota aja, me I en mimieta nan me Jam ai? 50Ira ari jota weweki a majan on ira. 51A ap kotin ian ira kotidilan Najaret papa ira, a in a nekinekid majan pukat karoj nan monion i. 52Iejuj ari kupurokon, kokoda, lalaudela, o majamaj ren Kot o aramaj akan.