‏ Luke 24

1A NIN tapin wik, nin joran kaualap re pwara don joujou o, wado potik kai me re kaonopadar; 2Irail ari diaradar, me takai o kadapura jan joujou o, 3O irail lao pedelon on lole, ap jota diarada kalep en Kaun Iejuj. 4Kadekadeo irail lao injenjued kidar, kilan, ol riamen, me likau kida likau linan, ap pwara don irail. 5Irail lao majapwekadar o ikiokidi nan pwel, ira ap majani on irail: Da me komail raparapaki me maur amen ren me melar akan? 6A joer kotikot met, a iajadar. Tamanda, me a kotin majani on komail ni a kotikoteta Kaliläa, 7Mamajani: Nain aramaj pan panalan ni pa en me dipan akan, o lopuela, o ni ran kajilu a pan iajada. 8Ir ari tamanda a majan akan. 9O purodo jan nin joujou o, ap kaireki mepukat on ekamen ko o on me tei kan karoj. 10Maria men Makdala, o Ioana, o Maria in en Iokopuj, o me tei ko me ian irail, me kaireki mepukat on wanporon akan. 11A arail kajoi likamata kajoi likam pot re ’rail, ap jota kamelele. 12Petruj ap uda tanalan joujou o, rukedi on lole, ap diarada, me likau linen akan ta wonon waja kij, ap purodo jan o puriamui kida me wiauier. 13A kilan ni ran ota riamen re ’rail momaitelan kijin kanim eu ad a Emauj; a doo jan Ierusalem mail wonu de iju. 14Ira ari kajokajoi penaer duen mepukat karoj. 15Kadekadeo ni ara kajokajoi o idedok pena, pein Iejuj ap kotin pwara don ira o ian ira kotila. 16A maj ara me atiat, pwe re de aja i. 17I ari kotin majani on ira: Da me koma kajokajoi pena ni oma alialu, o da me koma injenjued kila? 18Amen ira, me ad a Kleopaj, ap japen indan i: Koe men wai ta men nan Ierusalem, me jaja, me wiauier waja o ni ran pukat? 19A kotin majani on ira: Pwe dakot? Ira ap indan i: Duen Iejuj en Najaret, me jaukop manaman amen ni a wiawia o majan akan mon Kot o aramaj karoj. 20O duen jamero lapalap o atail jaumaj akan ar panala i pwen pakadeikada on matala o kalopuela i. 21A je kiki on, me a pan kotin kamaioda wein Ijrael. Ari ran wet pon jili pon murin mepukat wiauier. 22O pil kij at li akai kamajak kin kit ar pwaralan joujou o jankonai. 23Ni ar jota diar kalep a, rap puredo indada, me re diaradar janjal en tounlan kai, me katitiki, me a iajadar, 24O kij at kai kolan joujou o, ap diaradar, duen li oko kajokajoida, a i me re jota diarada. 25A kotin majani on ira: O koma meid lolepon o pwand nan monion omail, en kamelele meakan, me jaukop akan kopadar. 26Kaidin i, me udan Krijtuj en kalokolok ap kodalan a linan? 27A ap kotin kawewe on ira kijin likau kan duen pein i, tapiada ni Mojej kokodo lel jaukop akan. 28Irail ap koren ion kanim, me irail koko on. I ari kajonejon ira, dene a pan kotin daulul. 29Ira apnidinidiki i potoan on: Kom kotikoteta re at, pwe a pan waja ponier o ran wet koren ion imwijokela. A ap kotilon on nan im o, pwen mimieta re ra. 30Kadekadeo ni a kotin ian ira ni tepel o, a kotin limada prot, laolaoki, a lao pilitiki pena, a kotiki on ira. 31Maj ara ap pad pajaner, ira ap aja i. A ap kotin joredi jan mo ’ra. 32Ira ap inda nan pun ara: Monion ata jota mokimokid ni a kotin mamajani on kita pon al o, ni a kotin kawewe on kita kijin likau kan? 33Ira ari uda ni auer ota o purelan Ierusalem, o diarada ekamen ko, o me ian ir, kot pena waja takij, 34Katitiki: Nan melel Kaun o kotin iajadar o pwara don Jimon, 35Ira ap kajokajoi, me wiauier nani al o, o duen ara ajaki i a pilitiki pajan prot. 36A ni ar majan pena mepukat, pein Iejuj ap kotin pwara don nan pun arail majani on ir: Komail popol! 37Irail ari majapwekadar o wapondar, o re kiki on, me ani men, me re udial. 38A kotin majani on irail: Da me komail majak ki? O menda lamelam pukat mi nan monion omail? 39Komail kilan pa i kat o na i kat, pwe peinnai ta. Doke ia o kilan, pwe ani jota kin uduk o ti, duen omail kilan ia. 40A lao majani mepukat, ap kajale on irail lim a o aluwilu a kan. 41A ni ar jota non kamelele pweki ar peren o puriamuiki, ap kotin majani on irail: Jota kan omail met? 42Rap ki on i kijan mam inin o onik. 43I ari konot mo ’rail. 44A kotin majani on irail: I majan akan, me I ki on komail er, ni ai mimieta re omail, pwe karoj en pwaida, me intinidier duennai nan kapun en Mojej, o jaukop akan, o pjalm akan. 45I ap kotin kalolikoni irail, pwe ren dedeki kijin likau kai. 46O kotin majani on irail iduen a intinidier, o iduen udan kalokolok en Krijtuj, ap maureda jan ren me melar akan ni ran kajilu, 47O padapadaki on wei karoj ni mar a, ren kalula, pwe dip akan en lapwada, a pan tapida nan Ierujalem. 48A komail me jaunkadede en mepukat. 49A kilan, I pan kadara don komail, me Jam ai inaukidar. A komail pan mimieta nan kanim o, komail lao audaudekier manaman jan poa. 50A kotin kalua ir alan Petanien, kotikida lim a, kapai irail ada. 51Kadekadeo ni a kotin kapal ir ada, a kotiwei jan irail, kotidala nanlan. 52Irail ari kaudok on i, ap pure don Ierujalem perenda kaualap; 53O re potopot nan im en kaudok kapina o kaudok on Kot.