‏ Mark 14

1KADEKADEO pon ria pon mon paja o kamadip en prot jomut, Jamero lapalap akan o jaunkawewe kan jojon duen widinadi i kamatala. 2Pwe irail inda: Iermen ni ran en kamadip, pwe de kamoronada aramaj akan. 3Ari, ni a kotikot Petanien nan im en Jimon tuketuk, ni a kotin kaipokedi ni tepel, li amen ap potodo, wa kijin kopa alapajta audaud en men kei, inen en pil en narde, me kajampwal. A ap kawela kopa o keiedi on tapwi. 4Akai re irail ap juedeki, monemoneloleki: Menda men kei wet ola mal? 5Pwe a pan netila kareda laude jan denar jilipuki, ap pan ko on me jamama. Re ap lipelipanede li o. 6Iejuj ap kotin majani: Komail ko jan! Menda komail kainjenjued i? Dok mau on ia, me a wiada et. 7Pwe jamama kin mi re omail anjau karoj. Ari, anjau me komail mauki, komail kak kadek on. Anai jota kin ieian komail anjau karoj. 8A wiaer me a kak on. A kaonopedier a keie war ai ni jaredi. 9Melel I indai on komail: Waja karoj me ronamau wet pan kalok ia panada jappa u, re pil pan lokolokaia duen me a wiadar, pwen katamanpa. 10Iudaj Ijkariot, amen ekriamen oko, ap kolan ren jamero lapalap akan, pwen pan on irail i. 11Irail lao ron, re ap peren kida, ap inauki, me re pan ki on moni. I ari jon duen a pan monai on en panala i, 12Ni kaieu en ran en prot jomut, ni ar kin kamela jippul en paja, japwilim a tounpadak kan ap potoan on i: Ia waja re kotin men, jen potolan kaonopada, pwe re en kotin konot paja? 13A ap kotin poronela japwilim a tounpadak riamen majani on ira: Koma ko on nan kanim o; aramaj amen ap pan tu on komail, wa men deun pil eu. Idauen i! 14Waja a pan pedelon on, koma indai on kaun en im: Jaunpadak o majani, ia pera en men kairu kan, waja me I pan tunole paja ia ian ai tounpadak kan? 15A ap pan kajale on koma pera laud poa kajonjoner o onoper. Iei waja koma onop on kitail. 16Japwilim a tounpadak kan ap kola, lel don kanim o, o diaradar duen me a kotin majani on ira ko; ira ari kaonopada paja. 17A lao jautik penaer, a ap kotido ian ekriamen ko. 18A ni arail kotidi ni tepel konokonot, Iejuj ap kotin majani: Melel I indai on komail, amen komail me ian ia manamana et, pan pan ia la. 19Re ap tapiada injenola ap potoan on i amen amen: Ngai i? A pil amen inda: Ngai i? 20A ap kotin japen majani on irail: Amen ekriamen oko me ian ia kadukadu nan dal et. 21Ari jo, Nain aramaj kokola duen a intinidi on er; o non juede on aramaj o, me Nain aramaj panpanala re a. Me mau on, ma aramaj men et jota ipwidi. 22Ari, ni arail konokonot, Iejuj ap kotikida prot o laolaoki, ap pilitiki pajan kotiki on irail majani: Ale, tunole! War ai metet, 23A ap kotikida dal o murin a kotin laolaoki; a ap kotiki on irail; irail karoj ap nim. 24A ap kotin majani on irail: Nt’ ai metet, ntan inau kap, me kapwilipwilikidi me toto. 25Melel I indai on komail, I jolar pan nim jan wan wain, lao ran en ai pil pan nim nan wein Kot. 26Murin arail kauleki kaul pot, re ap kotilan dol Oliwe. 27Iejuj ap kotin majani on irail: Komail karoj pan makarada; pwe a intinidi: I pan kame jilepa, ari pwin jip ap pan muei pajan. 28A murin ai pan maureda, I pan tion wei mo ’mail on Kaliläa. 29A Petruj potoan on i: Karujia pan makar kila, anai jo. 30Iejuj ap kotin majani on i: Melel I indai on uk, ran wet, ponpon wet, mon malek a pan kakorot pan riapak, koe pan kamam kin ia pan jilipak. 31I ari kalaudela a japen: Ma i ian komui matala i jota pan man kamam kin komui. Irail karoj pil inda dueta. 32Irail ap kotilan waja, me ad a Ketjemane, a ap kotin majani on japwilim a tounpadak kan: Komail mondi on met, ni ai pan wia kapakap. 33A ap kotin ukada Petruj, o Iakopuj, o Ioanej, ap kotin laualoda kaualap o pataula. 34A ap kotin majani on irail: Ngen i ap injenjuedela kaualap on mela. Komail mimi met o majamajan. 35A ap kotila ekij, ap pupedi on nan pwel, ap laolaoki, ma a kak auer en dauliela. 36A ap kotin majani: Apa Jam ai, meakaroj me kak pa omui! Kotikiwei jan ia dal wet! Ari jo, kaidik me I men, a me komui men. 37I ari kotido diar ir ar mamair, ap kotin majani on Petruj: Jimon koe men mair, koe jota kak majamajan auer eu? 38Komail majamajan o kapakap, pwe komail de ko on nan jonejon. Ngen me okok, a uduk me luet. 39A ap pil kotila o laolao pil majani majan ko ota. 40A ni a kotin japaledo, pil diar ar mamair, pwe maj arail me toutou; irail jaja, me re en japenki. 41A ap kotido ni kajilepak, majani on irail: Komail kananata omail mair en o kamola? Arier, auer leler! Kilan, Nain aramaj panapanalaner ni pa en me dipan akan! 42Paurida! Kitail kokola! Kilan, me pan ia la me korendor. 43Madan ni a kotin mamajan, ari, Iudaj kodo, amen ekriamen oko; pokon kalaimunia eu ian, wado kodlaj o jokon, kodo jan ren jamero lapalap akan o jaunkawewe kan o jaumaj akan. 44A me panala i, ki on irail kilel eu inda: Meamen i metik, iei i. Ale, kaluawei, kanai on! 45A pwarado eta ap madan inen don Iejuj inda: Rapi, Rapi, ap metik i. 46Irail ari por pena on ale. 47Amen ir, me u waja o, ujada na kodlaj, ap pale ladu en jamero lapalap amen, ap lepuka jan jalon a. 48Iejuj ap kotin japen majani on irail: Komail ko don ia due lipirap amen, wado kodlaj o jokon, pwen koledi ia. 49I kin ieian komail ta ran karoj nan im en kaudok o kaukawewe. A komail jota ale ia. A pwe kijin likau kan en punala. 50Irail karoj ap pededi, tana jan. 51Manakap amen ap idauen i, pineki pena war a likau linen kajelel eu. Manakap akai ap parokidi. 52I ari kajela a likau linen kajelel o, ap jopola kilijo. 53Re ap kalualan Iejuj ren jamero lapalap o. Jamero lapalap akan, o jaumaj akan, o jaunkawewe kan, karoj pokon don re a. 54Petruj idauendo i doowei jan lao lel nan tanpaj en jamero lapalap. A ap mondi on ren ladu ko, wia raneran. 55Jamero lapalap akan o pwin en kadeik roporop kadede, pwen kine on Iejuj, pwen kamela. Ari, jota me re diar. 56Pwe me toto me kine on i mal. Ari, ar kinakin jota dupeneta. 57Akai uda, kine on i mal inda: 58Je ron, a inda: I pan kawela im en kaudok wet, me pa wiadar, ap id kauada eu ni ran jilu, me jota pa wiada. 59Ari, ar kinekin jota pil kon pena. 60Jamero lapalap ap kajinenda nan pun ar ap idok ren Iejuj, majani: Kom jota japenki meakot, me mepukat kine on komui? 61A a kotin nenenlata, jota japen. Jamero lapalap ap pil idok majani on i: Komui Krijtuj japwilim en men Kapin kaualap? 62Iejuj ap kotin majani: Ngai i! Komail pan kilan Nain aramaj a kaipokedi ni pali maun en me rojon o kokido dapok en lan. 63Jamero lapalap ap ter pajan a likau ap inda: Menda re atail pil eu kinakin? 64Komail roner a lalaue. Da me komail lamelame? A irail karoj ap kadeikada, me a war on kamela. 65Akai tapi on kondipi on i o pwaindi jilan i, ap pikir, ap indai on i: Kopada! Papa ko pil pikir i. 66Ni en Petruj a mimi panakepir en tanpaj, lidu en jamero lapalap amen ap kodo. 67Ni a kilan Petruj a wiawia raneran, a ap kankakil i o ari, inda: Koe me pil ian Iejuj, men Najaret! 68A a kamama kida inda: I jaja. I pil jota dedeki, me koe indinda en! I ari koieilan nan katipar; malek ap kakorot. 69A lidu lao kilan i, ap pil indan irail, me mimi waja o: Amen irail met et. 70A ap pil kamama kida. Mur ekij irail me u impa ko; pil indan Petruj: Melel me amen irail koe, pwe koe pil men Kaliläa amen. 71I ari lalaue o kaula: I jaja aramaj men et, me komail indinda en! 72Ap kariapak en malek a kakorot. Petruj ap tamanda en Iejuj a kotin majani on i: Mon malek a pan kakorot pan riapak, koe pan kamam kin ia pan jilipak; ni a lamelamela a ap janejan.