‏ Mark 4

1KADEKADEO a pil kotin tapiada kawewe liman jed o. Pokon kalaimun eu ap ko pena re a. A ap kotidan pon jop pot kotikot pon jed o. A pokon o mi nan jap pon oror. 2A kotin kawewe on irail me toto ni i karajeraj akan, majani on irail ni a padak: 3Ron! Kilan, jaunkamor o kolan kamorok. 4Ni a kamokamorok akai ap moridi on pon kailan al, manpir ap pirido nam ir ala. 5A akai moredi on waja takain, waja pwel petepet; irail ari madan wojada, pweki jota pwel lole. 6Ni en katipin dakarada, re ap monela o mela pweki jota kalau ar. 7A akai moredi nan tuka teketek; o tuka teketek wojada, kajokiala, re ap jota wa. 8A akai moredi nan pwel mau o pwaida wa; akai pan me jileijok; a akai me woneijok, a akai me epuki. 9A kotin majani: Me jalon a mia men ron, i en ron! 10A lao kotin kalapukela, men imp a ianaki ekriamen ap kalelapok re a duen karajeraj pukat. 11A ap kotin majani on irail: A muei on komail, en aja duen me rir en wein Kot. A men liki re pan aja meakaroj jan ni karajeraj akan. 12Pwe re kilan, ari jota kilan, o roneron, ap jota dedeki; pwe re de pan wukila o dip ar lapwa jan irail. 13A ap kotin majani on irail: Komail jota dedeki karajeraj pot et? A iaduen, omail pan aja karajeraj tei ko? 14Jaunkamor me kamorok jili majan. 15A mepukat me mi pon kailan al, waja majan moredi on, a re lao ronadar, Jatan ap madanado, ki jan majan, me kamoremoredi on nan monion arail. 16O mepukat me moredi on wajan takain, re lao ronadar majan o ap madan peren kida ale. 17A jota kalaua re ’rail ap dadaur eta ekij, lao jonejon o kamekam wiaui pweki majan o, re ap madan makar kida. 18A mepukat me moredi on nan tuka teketek, me ronada majan. 19A anan en pai en jappa o inon kapwa, o norok en okotme pwaida, kajokela majan, ap jota wa. 20A mepukat irail, me moredi on nan pwel mau, me ronada majan o, ale o wa, akai pan me jileijok, a akai me woneijok, a akai me epuki. 21A kotin majani on irail: Kandel pan wijikedo, pwen ko on pan kajak de pan men wendi? A jote koda won nin deun kandel? 22Pwe jota me rir kot, me jo pan janjalada, pil jota me okiok kot, me jo pan lok jili. 23Meamen me jalon a mia men ron, i en ron! 24A ap kotin majani on irail: Komail kalaka, me komail ron! Pwe men jon, me komail jonki iduen a pil pan jon, on komail. O omail tunol pan laud. 25Pwe me a mia, ekij pan ko on; a me jota a mia, me ekij mi re a, pan katia jan. 26A kotin majani: Iet duen wein Kot, raj on aramaj amen, me kamoredi on nan pwel war en tuka. 27Ap mairela, pirida, pon ran; a war o wojada ap kakairida a ap jota aja due. 28Pwe pwel kin pein kawojada tuka. Maj katoka, mur mpok, mur war en korn nan mpok ap pwarada. 29A ni wa ma, a ap madan ki on men lepukedi, pwe rak mier. 30A pil kotin majani: Da me kitail en karajai on wein Kot? De da me kitail en kajojon on? 31A rajon wan tuka, me pan kamoremoredi on nan pwel, me tikitik jan war karoj, me mi nan jap. 32A lao kamoredi, ap wojada laude jan dip karoj, ap kajan pajan laud; manpir en pan lan ap kin wendi pan mot a. 33I jon en karajeraj akan toto a kotiki on irail ni a kawewe on irail majan o duen ar weweki. 34Jota a majan, ma jo karajeraj. Ni arail kelepala, a ap kotin kadede on japwilim a tounpadak kan meakan. 35Ni ran ota, lao jautik penaer, a kotin majani on irail: Kitail daulul won palio! 36Ari, ni ar kadar pajan pokon o, re kamajalada nin jop o. Pil akai kijin jop mi re a. 37Melimel ap koda, iluk ap punedi on nan jop o kadirela. 38A a kotikot nan murin jop o, jaijaimok pon uluna. Irail ap kaopada potoan on i: Jaunpadak, kom jota kupurai kit, pweki at pan mela? 39I ari kotin kipada, anianida melimel, o kotin majani on jed o: Moledi! An ap dukedi o molela kaualap. 40A ap kotin majani on irail: Da me komail majapwekeki? Iadue, jota omail pojon? 41Irail majapwekada kaualap, ap indada nan pun arail: Iaduen ol men et, me an o jed peiki on?