2Ch 5 | PON2006A | STEP | Ni ahnsou me Nanmwarki Solomon ketin kaimwisekala sapwellime doadoahk koaros en Tehnpas Sarawio, e ahpw ketikihong nan perehn nahk kan dipwisou koaros me seme Depit ketin kasarawihongehr KAUN-O

a 5.1 2 Sam. 8.11; 1 Kron. 18.11.

c 5.2 2 Sam. 6.12-15; 1 Kron. 15.25-28.

d 5.10 Deud. 10.5.

e 5.13 1 Kron. 16.34; 2 Kron. 7.3; Esra 3.11; Mel. 100.5; 106.1; 107.1; 118.1; 136.1; Ser. 33.11.

f 5.13-14 Eks. 40.34-35.

‏ 2 Chronicles 5

1 Ni ahnsou me Nanmwarki Solomon ketin kaimwisekala sapwellime doadoahk koaros en Tehnpas Sarawio, e ahpw ketikihong nan perehn nahk kan dipwisou koaros me seme Depit ketin kasarawihongehr KAUN-O—silper, kohl oh dipwisou teikan koaros. ^a

Kohpwahn Inowo Wisikdohng nan Tehnpaso

(1 Nanmwarki 8.1-9)

2 Nanmwarki eri ketin malipepene kaunen kadaudok kan oh kaunen peneinei kan en Israel pwe re en pokonpene Serusalem, pwe re en ketikihsang Kohpwahn Inoun KAUN-O nan Saion, Kahnimw en Depit, ^{▼▼KAHNIMW EN DEPIT: Tehk nan kawehwehpen lepin mahsen kan}. oh ketikilahng nan Tehnpas Sarawio. ^c

3 Irail koaros eri pokonpene ni ahnsoun Sarawien Impwal kan. 4 Mwurin arail pokonpenehr, mehn Lipai ko eri pwekada Kohpwahn Inowo oh 5 walahng nan Tehnpaso. Samworo ko oh mehn Lipai ko pil kasauda Impwal me KAUN-O kin ketiket loale oh dipwisawi kan koaros kasaulahng nan Tehnpaso. 6 Nanmwarki Solomon oh mehn Israel koaros eri pokonpene mwohn Kohpwahn Inowo oh meirongkihla kiden sihpw oh kou—me inenen tohto sohte me kak wadekedi. 7 Samworo ko eri patohwanlong Kohpwahn Inowo nan Tehnpaso oh koasoanediong Wasa Sarawiheo, pahn pehn kerup ko. 8 Ara pehnpihr ko ngappeseng pwaindi Kohpwao iangahki tuhkehn wisik ko. 9 Aramas kak kilang imwin tuhkehn wisik ko ma re pahn kesihnen mwohn Wasa Sarawiheo, ahpw sohte me kak kilang sang ekis wasa tohrohr. (Tuhkehn wisik ko mihmihte wasao lel rahnwet.) 10 Sohte mehkot nan Kohpwahn Inowo, ihte pelien takai riau me Moses kihdiong loale ni Nahna Sainai, ahnsou me KAUN-O ketin wiahiong mehn Israel inou ehu ni ar kohkohdo sang Isip. ^d

Lingan en KAUN-O

11 Samworo koaros iang pato wasao, sohte lipilipil mehnia pwihn me re iang towe, re ahpw kasarawihala pein irail. Oh sounkoul koaros—Asap, Eman, oh Sedudun, iangahki kisehn arail peneinei kan—re pil iang likawih likou linen. Mehn Lipai ko uh ni pengepengen pei sarawio ni palimese kol neirail simpal oh arp kan, oh samworo 120 iang irail kesekesengki sowi kan. Sounkoul kan pil iang kokoul ni ngihl pahrekiong sowi kan, simpal kan, oh soangen keseng teikan, nindokon arail kapikapinga KAUN-O, kokoulki:

“Kapinga KAUN-O, pwehki ih me kupwur mwahu,
oh sapwellime limpoak me poatopoat.”
Nindokon samworo kan arail mwesemweselsang nan Tehnpaso, ni ahnsowohte pelien depwek lingaling en KAUN-O ahpw kadirehla wasao, irail eri sohla kak usehla kaudoko. ^{e
,} ^f