Job 10 | PON2006A | STEP | I pwangadahr momour. Komwi ketin karonge ei kaulim ni lingeringer.

a 10.7 Kupw. 16.15.

b 10.10 Kupw. 7.1-2.

‏ Job 10

1 I pwangadahr momour.
Komwi ketin karonge ei kaulim ni lingeringer.
2 Maing Koht, komwi dehr ketin kadeikiehda.
Komwi mahsanihong ie! Dihp dah me I wiadahr?
3 Me pwung ong komwi omwi kupwur loallapen?
En sautikihla mehkot me pein komwi ketin wiadahr?
Oh mwuhr kiparamatki koasoandien me suwed kan?
4 Komwi kin ketin mahsanih soahng kan duwen me kiht aramas kin patohwan?
5 Sapwellimomwi ieias pil mwotomwot duwehte en kiht aramas akan?
6 Eri, dahme komwi kin ketin kilelehkihdi dipei kan koaros
oh ketin rapahkihki ei sapwung kan koaros?
7 Komwi mwahngih me sohte dipei,
me sohte emen kak doareiehsang nin limomwien. ^a

8 Nin limomwi kan me ketin wiaiehda,
oh met nin limomwi kan me pil kauweiehla.
9 Komwi ketin tamataman me komwi ketin kapikiehda sang pwehl;
eri, komwi pahn ketin kapwureiehla pwe I en pil wiahla pwelpar?
10 Komwi ketin karosonehda semeio pwehn wiaiehda;
komwi ketin kakairiehda nan kapehd en inei. ^b
11 Komwi ketikihong tih oh uduk en paliwerei
oh kidimkihla tih kat uduk oh kili.
12 Komwi ketikihongieier mour oh limpoak poatopoat,
oh sapwellimomwi epwel me kolokol ie.
13 Ahpw met I dehdehkiher me sang ni ahnsowo kohdo
komwi ketin koasoakoasone ni rir en kauweiehla.
14 Komwi ketin mwasamwasahn ma I pahn wiahda dihp,
pwe komwi en dehr ketin mahkikihong ie.
15 Ni ei dipadahr, I diarehr apwal sang rehmwi,
ahpw ni ei wia me pwung, sohte kaping sang rehmwi.
I paisuwedlahr oh nameneklahr kowahlap.
16 Ma I pahn pweida mwahu pak ehu,
komwi kin ketin pwakih ie duwehte laion emen;
komwi pil ketin wia sapwellimomwi manaman akan pwe komwi en kauwehkiniehla.
17 Ahnsou koaros komwi ketin sapwellimaniki sounkadehde me pahn uhwong ie;
omwi engieng pahi kin lalaudla ahnsou koaros;
komwi kin ketin koasoakoasoane ahnsou koaros ehu soahng tohrohr me komwi pahn ketin kauwehkiniehla.

18 Maing Koht, dahme komwi ketin mweidikihong ie I en ipwidi?
E konehngete I en kapilsalehdala mwohn aramas eh pahn kilang ie.
19 Ei inensangete nan kapehd en inei kolahng nan sousou
mwahusang ei ipwidi.
20 Ei mour saikinte pahn imwisekla? Komwi ketin piseksang ie!
Komwi ketin mweidohng ie I en pereperenki mahs ahnsou me luhwehdi nan ei mour.
21 I nektehn mweselda oh sohte pahn pwurodo—
kohkolahng nan sahpw ehu me rotorot oh kansensuwed,
22 sahpw rotorot, mwetehn, oh pingiping,
wasa me marain wia rotorot.