Job 19 | PON2006A | STEP | Dahme kumwail kapwukapwunodehkin ie mahsen pwukan?

‏ Job 19

Sohp

1 Dahme kumwail kapwukapwunodehkin ie mahsen pwukan?
3 Pak tohtohie kumwail wia kauweielahr,
oh sohte mwahn namenengki amwail kalokei ie.
4 Eri da?
Ma I sapwungalahr, ei pwukoa met.
5 Kumwail kin lemeleme me kumwail mwahusang ie;
oh kin wiahki ei apwal kadehdehpen ei dipan.
6 Kumwail sohte kak wehwehki me Koht me ketin kupwuredahr met?
E ketikidier lidip ehu pwe en ketin kalowehkiniehdi.
7 I kin weriwerki lokolok wet,
ahpw sohte mehmen rong ie;
I kin pekipeki ei pwuhng, ahpw sohte diar.
8 Koht ketin perehsang ie ahlo, I solahr kak kotehla;
e ketin kipehkidier ahlo rotorot.
9 E ketikihsang ie ei kepwe kan koaros,
oh kauwehla lingan en edei.
10 E ketin kalipwelipwehda wasa koaros en paliwereiet.
E ketin kanekehsang loalei koapworopwor koaros.
oh ketin mweidala pwe I en luwetala oh mehla.
11 Koht ketin kauwong ie sapwellime engieng,
oh ketin wiahkiniehla sapwellime imwintihti lapalap.
12 E ketin poaronehdo sapwellime karis kan pwe re en mahweniong ie;
re weirda ar wasahn pei oh kapiliepene.

13 Koht ketin kupwuredahr riei kan en keseiehla;
mehn liki men ngehi nanpwungen kompoakepahi kan;
14 kisehi kan oh kompoakepahi kan tangehrdoaui.
15 Mehn keiru kan me mi nan imwei manokeielahr;
serepein kan me kin papah ie pil wiahkinielahr mehn liki men.
16 Ni ei kin likwerih ladu men, e sohte kin sapeng ie—
ni ei pil kin peki en sewesei ie, e kin nennenlahte.
17 Ei pwoud sohte kakohng engin eweiet;
oh pein riei kan sohte kin men keidohng mpei.
18 Seri kan kin mwamwahlikin ie, oh kin kouruhrkin ie, ni ar kin kilengiehda.
19 Me keieu kompoakepahnkin ie kan kin sautkin ie;
irail kan me I kin keieu poakepoake, re pelianiedahr. ^a
20 Kiliet mwotoudier oh mwerekireklahr pohn tih kat;
metehr kis pwe ei mour en lussang ie.
21 Kumwail kompoakepahi kan, kumwail poakeiehla!
Nin limen Koht pohriedier.
22 Dahme kumwail kalokalokehkin ie, duwehte me Koht ketin wiahiong ie?
Eri da? E saikinte itar amwail kalokaloke ie?

23 I men emen en tamatamante ei lokaia kat
oh ntingihedi nan ehu pwuhken!
24 De ei lokaia kat en siseldiong pohn takai,
pwe re en mihmihte kohkohlahte.

25 Ahpw iet, I ese me mie mehmen nanleng
me pahn ketidohng sewese ie.
26 Pil mwurin kiliet eh pahn ohkihla soumwahu wet,
I pahn kilangki Koht paliwereiet.
27 I pahn kilangki pein pwoaren mesei kat,
oh e sohte pahn mwomwen mehn liki men.

Nan kapehdiet tikitingkihla amwail ketihtihki,
28 “A ia duwen atail kak kaloke?”
Kumwail kin raparapahki dahme kumwail pahn kak uhkihong ie.
29 Eri met, kumwail en masak kedlahso—
kedlahs me kin wahdo engieng en Koht pohn dihp,
pwe kumwail en esehla me mie emen me kin wia kadeik.