Job 30 | PON2006A | STEP | Ahpw me pwulopwul sang ie kan kouruhr kin ie met! Arail pahpa ko ohl soh katepe kei; ihme I sohte kak mweidikihong re en iang nei kidi kan sile nei sihpw kan.

‏ Job 30

1 Ahpw me pwulopwul sang ie kan kouruhr kin ie met!
Arail pahpa ko ohl soh katepe kei;
ihme I sohte kak mweidikihong re en iang nei kidi kan sile nei sihpw kan.
2 Irail pwihn sakanakan oh soh katepe kei,
inenen luwet en iang wia ei doadoahk.
3 Re inenen semwehmwe oh kin men mwenge;
re pil kak kangada kalowen tuhke meng—
nipwong, nan sapwtehn, nan sahpw me sohte mehkot loale.
4 Re usada dipwen nan sapwtehn oh kang,
re pil kang kalowen tuhke me sohte nemeneme!
5 Aramas akan wering irail oh pwakihirailla,
rasehng ma re weriwering sounpirap akan.
6 Re kin kousoan nan pwoaren paip akan,
nan pwoahr me weiweida ni keilen paip akan.
7 Re weriwer duwehte mahn en nanwel akan
oh wendi kospene pahn dihpw kan!
8 Pwihn soh katepe oh sohte wadarail!
Re peukeussang nan sahpwo.

9 Eri, met re kodohn kouruhrkin ie;
sohte ngehi mehkot, ahpw ihte arail mehn kepit.
10 Re sautikin ie;
re medemedewe me re mwahu sang ie,
oh re pil kin kendipiong ni mesei.
11 Pwehki Koht eh ketin kaluweteiehla oh kapaisuwedihiehla,
re uhkihong ie arail lingeringer.
12 Pwihn wet kin uhwong ie wasa koaros me I kin kohla ie;
re kin pwakih ie; re onopadahr soahng suwed me re pahn wiahiong ie.
13 Re sopukiehla oh song en kauweiehla;
oh sohte emen me pahn katokihiraildi.
14 Re duwallong nan pwoahr me perepere ie
oh tangodohng pohi;
15 I rerrerki ei masepwehk;
ei wahu sohralahr rasehng tumwenieng ehu,
oh ei pai sohrala rasehng pelien depwek pali.

16 Eri, met I nektehn mehla;
sohte maiauda en ei lokolok.
17 Tih kat koaros kin medek nipwong;
medek me kin doakoadoako ie sohte tokedi.
18 Koht ketin koledier tepinwereiet
oh waikpesengier ei likou kan.
19 E ketin keseiedier nan pwelmatak;
I sohte siksang pwehl.

20 Maing Koht, I patohwan likweriong komwi, komwi ahpw sohte ketin sapeng;
oh ni ei kapakap, komwi kin ketin pohnsehse.
21 Komwi ketin wiakauweielahr;
komwi ketin kalokehkin ie sapwellimomwi manaman unsek.
22 Komwi ketin mweidohng kisinieng en ipiriehla;
komwi ketin keseieseli nan melimel laud.
23 I patohwan ese me komwi pahn ketin pangielahr ong mehla,
imwilahn mehkoaros me momour.
24 Dahme komwi mahwenkihong aramas emen me ohlahr,
me sohte kin wia mehkot pwe ihte peki kupwurkalahngan?
25 I seu kin iang aramas akan sengiseng ni ahnsou apwal,
de nsensuwedkihla irail kan me paisuwedlahr?
26 I koapworopworki peren oh marain,
ahpw apwal oh rotorot me lelohng ie.
27 I ohkilahr kowahlap pwunod oh medek;
rahn koaros I kin wie lokolok.
28 I kin kohkohseli diren nsensuwed, sohte kamarainpei;
I kin uh nan pokon oh pekipeki sawas.
29 Ngilei me diren pahtou oh sangat
rasehng ngilen kidi en wel oh osris.
30 Kiliet toantoallahr; I mwasingkilahr soumwahu karakar.
31 Mahs I kin rongorong ngilen keseng kaperen,
ahpw met I kin rongorongete ngilen mwahiei oh sengiseng.