Job 5 | PON2006A | STEP | Eri, maing Sohp, komw likwer, oh kilang ma mie me pahn sapeng. Mie tohnleng men me komw pahn kak sohpeiong?

a 5.9 Sir. 43.32.

b 5.13 1 Kor. 3.19.

c 5.17 Lep. Pad. 3.11-12; Ipru 12.5-6.

d 5.18 Os. 6.1.

‏ Job 5

1 Eri, maing Sohp, komw likwer, oh kilang ma mie me pahn sapeng.
Mie tohnleng men me komw pahn kak sohpeiong?
2 Ma komw pahn mehkihla pwunod oh nsensuwed,
met wiewiahn pweipwei me sohte katepe.
3 I kilangehr me pweipwei kei me mwomwen sohte perki mehkot,
a I ahpw mwadang peki Koht en ketin keriahla dewerail.
4 Nair seri kan kin mihmi nan apwal ahnsou koaros,
pwe sohte me kin uhki nan mwoalen kopwung oh doareirailla.
5 Me duhpeklahr akan pahn kin tungoalehla wahnsapwen me pweipwei kan—
pil iangahki werentuhke me kin keirda nanpwungen dihpw tekatek—
oh me kin men nimpildahr akan pahn peirinki ar kepwe kan.
6 Suwed sohte kin keirda nan pwehl,
de apwal kin keirda sang nanpwel.
7 Soh! Pwe aramas kin ipwidiong nan apwal,
duwehte mpwulen kisiniei eh kin lulluda.

8 Ma ngehi komwi, I pahn sohpeiong Koht,
oh peki en ketin sewese ie.
9 Kitail sohte kak dehdehki soahng kapwuriamwei kan en nin lime,
oh sohte me kak wadekada sapwellime manaman akan. ^a
10 E kin ketin kamwerehdi keteu pohn sahpw
oh kin ketin kalamwur mwaht akan.
11 Ei, iei Koht me kin ketin kasapwilada me aktikitik kan,
oh kin ketin kansenamwahwihala koaros me kin nsensuwed.
12 E kin ketin kasapwungehla koasoandien me mwersuwed kan,
oh lidipihkihdi me loalokong kan pein arail koasoandi kan,
pwe re en dehr kin pweida mwahu ni ar wiewia kan; ^b
14 pil nin souwas, likamwete re kin alialuseli nan rotorot.
15 A Koht kin ketin kapitala me semwehmwe kan sang mehla,
oh e kin ketin doareirailla sang apwal.
16 E kin ketikihong me semwehmwe kan koapworopwor, oh ketin kanennenihala me suwed akan.

17 Meid pai aramas me Koht kin ketin kapwungala!
Eri, dehr soikeweisang rehmw sapwellime kopwung. ^c
18 Koht kin ketin kamwahwihala ohla kan me pein ih kin ketikihda;
nin lime me kin kauwehla, nin lime me kin kamwahwihala. ^d
19 Pak tohto e pahn ketin kasile sang komwi me suwed;
20 ni ahnsoun lehk, e pahn ketin doarehla omwi mour;
oh pil ni ahnsoun mahwen, e pahn ketin kapitasang komwi mehla.
21 Koht pahn ketin doarehsang komwi likamw oh karaun mwahl;
oh pahn ketin kapituhkala ni ahnsoun kamwomwla eh pahn leledo.
22 Ni ahnsoun mahwen oh lehk lapalap, komw pahn kokouruhr;
komw sohte pahn masak mahn lawalo kan.
23 Sohte takai pahn mie nan sahpw akan me komw kin koadoahki;
sohte mahn kommwad pahn peiong komwi.
24 Komwi eri pahn popohl koukousoan nan imwomwi impwal;
ni omwi pahn apwahpwalih noumwi pelin sihpw, komw sohte pahn perki mehkot.
25 Noumwi seri kan pahn ngeder,
rasehng dipwen nansapw akan.
26 Rasehng wihd me nektehn pahn dundoal,
komw pahn mour lel omwi pahn likeilapala.
27 Maing Sohp, padahk wet se aleier ahnsou reirehie.
Padahk mehlel pwoat met; eri, ale oh doadoahngki.