Lev 18 | PON2006A | STEP | KAUN-O ketin mahsanihong Moses

a 18.5 Neh. 9.29; Esek. 18.9; 20.11-13; Luk 10.28; Rom 10.5; Kal. 3.12.

b 18.8 Lip. 20.11; Deud. 22.30; 27.20.

c 18.9 Lip. 20.17; Deud. 27.22.

d 18.12-14 Lip. 20.19-20.

e 18.15 Lip. 20.12.

f 18.16 Lip. 20.21.

g 18.17 Lip. 20.14; Deud. 27.23.

h 18.19 Lip. 20.18.

i 18.20 Lip. 20.10.

j 18.21 Lip. 20.1-5.

k 18.22 Lip. 20.13.

l 18.23 Eks. 22.19; Lip. 20.15-16; Deud. 27.21.

‏ Leviticus 18

Tiahk Keinepwi kan Nanpwungen Ohl oh Lih

1 KAUN-O ketin mahsanihong Moses 2 en padahkihong mehn Israel kan, “Ngehi, KAUN-O amwail Koht. 3 Kumwail dehr idawehn tiahk en mehn Isip kan, wasa kumwail kousoan ie mahso, de mehn Kenan kan, wasa I kahkahrekumwaillahng ie. 4 Kumwail kapwaiada ei kosonned akan oh kapwaiada dahme I koasoanedier. Ngehi KAUN-O, amwail Koht. 5 Kumwail idawehn tiahk oh kosonned akan me I kihong kumwail; kumwail ahpw pahn mourla. Ngehi KAUN-O.” ^a

6 KAUN-O ketikihda kosonned pwukat. Dehr wia nsenen pwopwoud ong emen me kisehn omw peneinei. 7 Dehr kanamenekihala omw pahpa ni omw pahn wia nsenen pwopwoud ong omw nohno. Ke dehr pil kanamenekihala pein omw nohno. 8 Dehr kanamenekihala omw pahpa ni omw pahn wia nsenen pwopwoud ong eh pwoud teikan. ^b 9 Dehr wia nsenen pwopwoud ong riomw serepein, de serepein men me eh nohno pwoudiki omw pahpa, de serepein men me eh pahpa pwoudiki omw nohno, mehnda ma kumwa tikida wasa kis de soh. ^c 10 Dehr wia nsenen pwopwoud ong nein noumw seri kan nair seri; pwe met pahn kanamenekihukala. 11 Dehr wia nsenen pwopwoud ong serepein men me amwa nohno tehmen de pahpa tehmen; pwe serepeino pil uhdahn riomw. 12 Dehr wia nsenen pwopwoud ong rien omw pahpa lih de rien omw nohno lih. ^d 14 Dehr wia nsenen pwopwoud ong rien en omw pahpa ohl eh pwoud; pwe liho pil pahn wiahla omw nohno. 15 Dehr wia nsenen pwopwoud ong en noumw pwutak eh pwoud ^e 16 de ong en riomw eh pwoud. ^f 17 Ma ke wiahiongehr nsenen pwopwoud ong lih emen, a ke dehr pil wiahiong nsenen pwopwoud ong nein liho serepein de nah serepein; pwe ira kakete wia kisehmw, oh met tiahk en kilikileng suwed ehu. ^g 18 Dehr pwoudikihda rien omw pwoud serepein, erein omw pwoudo eh momour.

19 Dehr wia nsenen pwopwoud ong lih emen nindokon eh wiewia eh soumwahu en lih, pwe liho me samin ong kaudok. ^h 20 Dehr wia nsenen pwopwoud ong en emen ohl eh pwoud, pwe met pahn kasamineiukala. ⁱ 21 Dehr mweidohng emen noumw seri kan en wia mehn meirong ong koht likamw Molek, pwehki met pahn kasaminehla mwar en Koht, me iei KAUN-O. ^j 22 Sohte ohl emen pahn eng rehn emen ohl, pwe Koht kin ketin kalahdeki tiahk wet. ^k 23 Sohte ohl emen de lih emen pahn eng rehn mahn emen; pwe e pahn saminkihla. ^l

24 Dehr kasaminehkinkumwailla tiahk pwukat, pwe iei met me kahrehda me rotorot akan ar kin saminla, irail me rotorot akan me kin kousoan wasa me I kahkahreikumwailwohng ie. 25 Ar tiahk kan kasaminelahr sapwarailo, iei me KAUN-O ketin kalokalokehki sahpwo, oh towe kan kin lekdeksang loale. 26 Re kin wia tiahk saut pwukat koaros oh kin kasaminehkihla sahpwo, eri kumwail dehpa iang wia tiahk pwukat. Kumwail koaros me pwilidak kan oh mehn liki kan me kin kousoan rehmwail, kumwail pahn kapwaiada sapwellimen KAUN-O koasoandi oh kosonned akan, 28 eri kumwail sohte pahn lekdeksang nan sahpwo, duwehte eh keselahr me rotorot akan me kin kousoan wasao mwohmwail. 29 Pwe aramas koaros me pahn kin wiahda soangen tiahk saut pwukat solahr pahn wia kisehn sapwellimen Koht aramas akan.

30 KAUN-O pil mahsanih, “Kumwail kapwaiada koasoandi kan me I kihong kumwail oh dehr idawehn tiahk en aramas ako me kousoanehr nan sahpwo mwohmwail, oh dehr kasamineikumwailla ni amwail pahn wiahda ekei soahng pwukat. Ngehi KAUN-O, amwail Koht.”