Psa 59 | PONPDN | STEP | AI Kot, kom kotin dore ia la sang ai imwintiti kan, o kotin pera sang ia mon me palian ia.

‏ Psalms 59

1 AI Kot, kom kotin dore ia la sang ai imwintiti kan, o kotin pera sang ia mon me palian ia.
2 Dore ia la sang me morsued akan, o kotin sauasa ia sang me inong iong nta.
3 Irail kin masamasan maur i, me kelail akan pokon pena ong ia, a sota dip ai, o sota me sued kot, me i wiadar, Maing leowa.
4 Irail tang pena o kaonopada a sota dip ai. Kom kotin opada wasa, o kotin ieiang ia, o irerong mepukat.
5 Maing leowa, Kot Sepaot, Kot en Israel, kotin opada wasa, o kotin kadeikada men liki kan karos. Kom der maki ong amen ir, me kin wia dip ni ar aklapalap.
6 Nin sautik re kin puredo ngungung dueta kidi kan, o re kin tangatang sili nan kanim o.
7 Kom kotin mangi, re kin lidelidu mongin; kodlas kan mi pan kilin au arail: Is me pan rong?
8 A komui, Maing leowa, pan kotin kiparamat kin irail, o kom pan kotin kalis irail la.
9 Kele pa i, i pan rukila re omui. Pwe Kot pere pa i.
10 Kot kin kotin kasale ong ia melel a kalangan; Kot kin kotin wiai ong ia, i en peren kida ai imwintiti.
11 Kom der kotin kame ir ala, pwe nai aramas akan pan monokela, a kotin kamueit ir pasang ki omui mana, leowa pere pat, kasapoke ir ala.
12 Dip eta lokaia en kilin au arail; i me re pan lokidi ni ar aklapalap; pwe re kin lokaia lalaue o likam eta.
13 Kom kotin kawe ir ala o der maki ong ir; kawe ir ala, pwe ren solar meakot, ap asa, me Kot kotin kaunda kadaudok en Iakop o sap karos.
14 Nin sautik re kin puredo ngunung dueta kidi kan, o re kin tangatang sili nan kanim o.
15 Re kin tangatang sili rapaki kan ar manga, ap lipaned, ma re sota pan medila.
16 A i pan kauleki duen omui manaman, o ni i mansan i pan kapinga omui kalangan, pwe komui pere pa i o ai paip ni ran en ai apwal.
17 I pan kauli ong komui ai paip, pwe Kot pere pa i o ai Kot kalangan.