Psa 77 | PONPDN | STEP | I KIN likwirki ngil ai ong Kot, ong Kot, me i pan likwir ong, o i me kotin mangi ia.

‏ Psalms 77

1 I KIN likwirki ngil ai ong Kot, ong Kot, me i pan likwir ong, o i me kotin mangi ia.
2 Ni ai ansau apwal, i kin rapaki leowa; ni pong pa i kin u wei o sota kin dukedi, pwe wen I sota kak insenemaula.
3 Ni ai tamanda Kot, i kin asenokida, ni ai madamadaua, ngen i kin luetala.
4 Kom kin kotin kolekol por en mas ai, pwe ira en papat; ngai inen en luet, solar itar ong lokaia.
5 I kin lamelame duen ran en mas akan, duen par akan me samalar.
6 Ni pong i kin lamelame duen ai kasang arp, o mongiong i kin madamadaua; ngen i kin raparapaki.
7 Kalelapok, leowa pan kotin ongiong kokolata, o a sota pan kotin maki ong?
8 A kalangan roselar melel, o a inau imwisokalar kokolata?
9 Kot kotin malielar a mak ong kit, o a karirikilar ongiong a kalangan?
10 Ari so, i indadar: Mepukat me mau ong ia; pali maun en lim en me Lapalap pan kak dorela meakaros.
11 I me i kin taman kida wiawian leowa; melel i kin tamanda omui manaman akan sang mas o,
12 O madamadaua duen omui wiawia kan karos, o kilekilang duen omui dodok.
13 Maing Kot, al omui me pung. Ia wasa amen Kot manaman mia dueta Kaun o?
14 Komui ta Kot me kin wia manaman akan. Komui kotin kasansaledar omui manaman nan pung en wei kan.
15 Komui kotin dore kila sapwilim omui kan omui manaman, iei seri en Iakop o Iosep akan.
16 Pil akan ariri komui, Maing Kot, pil akan ariri komui, rap masapwekadar, o wasa lol rererdar.
17 Tapok kalaimun akan kamoredier pil, tapok kan wiadar nansapwe, o liol piripir sili.
18 Nansapwe wiauier nanlang; sapwilim omui liol akan kamaraini sappa; sappa mokieda o rerer.
19 Al omui mi nan madau, al omui tatik nan pil kalaimun akan, o sota me kaan aluwilu omui.
20 Kom kotin kalua sapwilim omui kan dueta pwin eu ren Moses o Aron.