1Cor 16 | PltULB | STEP | Ary mahakasika ny fanangonam-bola ho an’ireo mpino, araka ny nanoroako lalana ny fiangonan’i Galatia, dia toy izany koa no tokony ataonareo.

‏ 1 Corinthians 16

1 Ary mahakasika ny fanangonam-bola ho an’ireo mpino, araka ny nanoroako lalana ny fiangonan’i Galatia, dia toy izany koa no tokony ataonareo. 2 Amin’ny andro voalohan’ny herinandro, dia tokony hanokana zavatra ny tsirairay aminareo ary hitahiry izany araka izay vitanareo. Manaova izany mba tsy hisian’ny fanangonam-bola rehefa tonga aho.

3 Rehefa tonga aho, na iza na iza ekenareo, dia alefako miaraka amin’ny taratasy mba hanolorako ny fanatitrareo ho an’i Jerosalema. 4 Raha toa ka mety amiko ihany koa ny mandeha, dia handeha hiaraka amiko izy ireo.

5 Fa ho avy any aminareo aho rehefa mandalo an’i Makedonia. Fa handalo an’i Makedonia aho. 6 Mety afaka hijanona miaraka aminareo aho na mandritra ny ririnina mihitsy aza, mba hahafahanareo manampy ahy amin’ny diako, na aiza na aiza alehako.

7 Fa tsy maniry ny hahita anareo mandritra ny fotoana fohy aho izao. Fa manantena ny hitoetra maharitraritra miaraka aminareo, raha avelan’ny Tompo. 8 Fa hijanona ao Efesaosy aho mandra-pahatongan’ny Pentekosta, 9 fa efa varavarana malalaka no nisokatra ho ahy, ary misy fahavalo maro.

10 Ary rehefa tonga Timoty, dia ezaho mba tsy hatahotra izy miaraka aminareo, fa manao ny asan’ny Tompo izy, tahaka ny ataoko. 11 Aza avela hisy olona hanao tsinontsinona azy. Ampio izy amin’ny lalany amin’ny fiadanana, mba hafahany mankeo amiko. Fa manantena azy mba ho tonga hiaraka amin’ireo rahalahy aho. 12 Ary mahakasika an’i Apolosy rahalahintsika, dia nampirisika azy mafy aho mba hamangy anareo miaraka amin’ireo rahalahy. Fa mbola tsy vonona tanteraka ny ho avy izy izao. Na izany aza, ho tonga izy rehefa mety ny fotoana.

13 Miambena, mijoroa tsara amin’ny finoana, miasà tahaka ny lehilahy, mahereza. 14 Aoka ho atao am- pitiavana izay ataonao rehetra.

15 Fantatrareo ny ankohonan’i Stefanasy, fa izy ireo no niova fo voalohany tao Asaia, ary izy ireo nametraka ny tenan’izy ireo ho amin’ny fanompoana ireo mpino. Ary mamporisika anareo aho, ry rahalahy, 16 mba hanaiky ny olona toy izany sy amin’ny olona rehetra izay manampy amin’ny asa sy miasa miaraka aminay.

17 Mifaly amin’ny fahatongavan’i Stefanasy, Fortinatasy, ary Akaiosy aho. Nameno ny tsy naha-teo anareo izy ireo. 18 Fa namelombelona ny fanahiko sy ny anareo izy ireo. Ka noho izany, fantaro ny olona toy izany.

19 Ireo fiangonan’i Asia dia manao veloma anareo. Akila sy Pritsila dia manao veloma anareo ao amin’ny Tompo, miaraka amin’ny fiangonana izay ao amin’ny fonenan’izy ireo. 20 Ny rahalahy rehetra manao veloma anareo. Mifanaova veloma amin’ny oroka masina.

21 Izaho, Paoly, manoratra ity amin’ny tanako. 22 Raha misy olona tsy tia ny Tompo, enga anie mba ho voaozona izy. Ho tonga, ny Tompontsika! 23 Ho aminareo anie ny fahasoavan’ny Jesosy Tompo. 24 Ho aminareo rehetra ny fitiavako ao amin’i Jesosy Kristy. [Fanamarihana: Ny dikan-teny taloha dia manampy hoe: “Amena.” Fa ny vaovao maro hafa, ao anatin’izany ny ULB sy ny UDB, dia manala izany.]