1 Corinthians 1

နှုတ်ဆက်ခြင်း

သို့၊ ကောရိန္သုမြို့ အသင်းတော်။

1– 2ငါ ပေါလု၊ ငါစာ ခရစ်တော်ယေရှု၏ တမန်တော် တစ်ယောက် ဖြစ်တေ။ ထာဝရဘုရားစာ ကိုယ့်အလိုတော်အတိုင်း ငါ့ကို တမန်တော်အရာမာ ခန့်ထားလီရေ။ ငါန ငါရို့မာ ကျုံသူညီအစ်ကို သုဿင်စာ ကောရိန္သုမြို့မာဟိစာ ထာဝရဘုရား၏ အသင်းတော်တို့ ဒေ စာစောင်ကို ပို့လိုက်တေ။ နင်ရို့စာ ခရစ်တော်ယေရှုကနီရို့ ထာဝရဘုရား၏ ရွယ်မှတ်ချက်အတိုင်း သန့်ရှင်းသူအဖြစ် အခြားခွဲထားခြင်းကို ခံရကတ်ပျာ။ နင်ရို့စာ ကမ္ဘာမာ ဟိသမျ နေရာမာ အသျှင်ယေရှုခရစ်တော်ကို ခေါ်သူရို့နအတူ ထာဝရဘုရား၏ သန့်ရှင်းသူ ဖြစ်ဖို့အတွက် ခေါ်ခြင်းကို ခံရကတ်ပျာ။ ယေရှုစာ သူရို့မာလည်း အသျှင် ဖြစ်တေ အရာ ငါရို့မာလည်း အသျှင် ဖြစ်တေ။

3ငါရို့မာ အဖထာဝရဘုရားန အသျှင်ယေရှုခရစ်တော် နင်ရို့ကို ကျေးဇူးတော်န ငြိမ်းချမ်းခြင်း ပီးပါစီ။

ထာဝရဘုရားကို ကျေးဇူးတင်ခြင်း

4နင်ရို့စာ ခရစ်တော်ယေရှုန တစ်ကိုယ်တည်း ဖြစ်ခြင်းကနီရို့ ထာဝရဘုရား၏ သနားကြင်နာခြင်းကို ခံရကတ်ပျာ။ ယင်းအတွက်န ငါ အမြဲတိုင်း ထာဝရဘုရားကို ကျေးဇူးတင်နီရေ။ 5နင်ရို့စာ ထာဝရဘုရား၏ သနားကြင်နာခြင်း အကြောင်းန ဟိသမျ ဟောပြောဖို့စာ တန်ခိုးန နားလည်ဖို့စာ ညာဏ်ပညာ အပြည့်အစုံ ရကတ်ပျာ၊ 6အကြောင်းကား ငါရို့ ဟောပြောလီစာ ခရစ်တော်၏ သတင်းကောင်းစာ နင်ရို့ စိတ်နှလုံးမာ စွဲရို့ ဟိဗျာ။ 7ယင်းအတွက်န နင်ရို့မာ ထာဝရဘုရားက ရလီကတ်စာ ဆုကျေးဇူး အားကုံး အပြည့်အစုံ ဟိရေ။ အရာ ဒေဂု နင်ရို့စာ ငါရို့မာ အသျှင်ယေရှုခရစ်တော် ပြန်ရို့ ကြွလာဖို့အတွက် အောက်မိခြင်းစိတ်န စောင့်နီကတ်တေ။ 8ငါရို့မာ အသျှင်ယေရှုခရစ်တော် ပြန်ရို့ ကြွလာရေနိမာ နင်ရို့ အပြစ်နကင်းလတ်အောင်အတွက် ထာဝရဘုရားစာ နင်ရို့ကို အဆုံးတိုင်အောင် တည်မြဲစီလိမည်။ 9အကြောင်းကား ထာဝရဘုရားစာ သစ္စာနပြည့်စုံရေ။ သူစာ ကိုယ့်သားတော်ဖြစ်သူ ငါရို့မာ အသျှင်ယေရှုခရစ်တော်န ပေါင်းဖေါ်ဆက်ဆံခြင်း ဟိပတ်စီအတွက် နင်ရို့ကို ခေါ်လီရေ။

ကောရိန္သုမြို့ အသင်းတော်မာ စိတ်သဖေါကွဲခြင်း

10ယင်းအတွက်န ငါ့ ညီအစ်ကိုမောင်နမှရို့၊ ငါရို့မာ အသျှင်ယေရှုခရစ်တော်နာမည်န ငါ နင်ရို့ကို အရေးတကြီး တောင်းပန်ချင်စာကား၊ နင်ရို့ အားကုံးသူ တစ်ညီတစ်ညွန့်တည်း ဖြစ်ကတ်။ နင်ရို့အထဲမာ တစ်ယောက်န တစ်ယောက် စိတ်သဖေါ မကွဲစီကတ်ကေ့။ ယင်းထက်ပင် နင်ရို့ တစ်စိတ်တည်း ဖြစ်ကတ် အရာ နင်ရို့မာ ရွယ်မှတ်ချက် တစ်ခုတည်း ထားကတ်။ 11ငါ့ ညီအစ်ကိုမောင်နမှရို့၊ နင်ရို့အထဲမာ ရန်ဖြစ်နီကတ်တေဆိုစာကို ခလောဣ အိမ်သားရို့က ငါ သတင်း ရလီရေ။ 12ငါ ပြောချင်စာကား၊ နင်ရို့အထဲမာ တစ်ယောက်တစ်ရီ၊ “ငါ ပေါလု တပည့်” ဟို့ ပြောနီရေ။ တစ်ယောက်တစ်ရီ၊ “ငါ အာပေါလု တပည့်” ဟို့ ပြောနီရေ။ တစ်ယောက်တစ်ရီ၊ “ငါ ပေတရု တပည့်” ဟို့ ပြောနီရေ။ အရာ တစ်ယောက်တစ်ရီ၊ “ငါ ခရစ်တော် တပည့်” ဟို့ ပြောနီရေ။

13ယင်းပိုင်ဆိုကေ ခရစ်တော်ကို ခွဲရို့ ရရေလော? နင်ရို့အတွက် ပေါလု ကားတိုင်မာ အသီခံလီရေလော? နင်ရို့ ပေါလုနာမည်န ရီနှစ်မင်္ဂလာ ခံယူလီကတ်တေလော? 14ကရိပ္ပုန ဂါယုကို ပယ်ရို့ နင်ရို့အထဲက ငါ အရာ တစ်ယောက်ကိုလည်း ရီနှစ်မင်္ဂလာ မပီးလီ။ ယင်းအတွက်န ငါ ထာဝရဘုရားကို ကောင်းကောင်း ကျေးဇူးတင်ရေ။ 15အကြောင်းကား နင်ရို့ ငါ့နာမည်န ရီနှစ်မင်္ဂလာ ခံယူလီရေ ဟို့ တစ်ယောက်လည်း ပြောဖို့ ရကတ်လိမည် မဟုတ်။ 16ဟုတ်တေ၊ သတေဖန် အိမ်သားရို့ကိုလည်း ငါ ရီနှစ်မင်္ဂလာ ပီးလီရေ၊ ယေကေလည်း ငါ အရာ မှည်သူတစ်ယောက်ကို ရီနှစ်မင်္ဂလာ ပီးလီရေ ဟို့ ငါ မတွက်ရ။ 17ခရစ်တော် ငါ့ကို ရီနှစ်မင်္ဂလာ ပီးဖို့အတွက် ရွှတ်လိုက်လီစာ မဟုတ်၊ ယေကေလည်း သတင်းကောင်းကို ဟောပြောဖို့အတွက် ရွှတ်လိုက်လီစာ ဖြစ်တေ။ သူစာ ကားတိုင်မာ ကိုယ်အသီခံခြင်း၏ တန်ခိုးကို ဘောရီးမုတ်သား မဖြစ်စီချင်။ ယင်းအတွက်န သူစာ လောကသားရို့ ညာဏ်ပညာကို အသုံးပြုရို့ ထိုသတင်းကောင်းကို ဟောပြောဖို့အတွက် ငါ့ကို ရွှတ်လိုက်လီစာ မဟုတ်။

ခရစ်တော်ရာ ထာဝရဘုရား၏ တန်ခိုးန ညာဏ်ပညာ ဖြစ်တေ

18ကားတိုင်မာ ခရစ်တော် အသီခံခြင်း၏ တရားတော်စာ ပျက်စီးခြင်းလမ်းမာ လားနီသူရို့ဘားမာ တစ်ခုလည်း အဓိပ္ပါယ် မဟိ။ ယေကေလည်း ထိုတရားတော်စာ ငါရို့ ကယ်တင်ခြင်းကို ရသူရို့ဘားမာ ထာဝရဘုရား၏ တန်ခိုး ဖြစ်တေ။ 19အကြောင်းကား ကျမ်းစာမာ ရွီးရို့ ဟိရေ၊
“ငါ ပညာသျှင်ရို့မာ ပညာတိကို ဖျက်စီးဖို့၊
အရာ ညာဏ်သျှင်ရို့မာ ညာဏ်တိကို အသုံးမဝင်ရအောင် လုပ်ဖို့။”

20ယေကေလည်း ပညာသျှင် ဇာမာလည်း? ကျမ်းတတ်-ပီတတ် ဇာမာလည်း? ဒေခိုက်မာ အငြင်းအခုံ လုပ်ဖို့နိုင်သူ ဇာမာလည်း? ဒေ လောကသားရို့ ပညာကို ထာဝရဘုရား အသုံးမဝင်ရအောင် လုပ်လီရေ မဟုတ်လော? 21အကြောင်းကား လောကသားရို့စာ ကိုယ့်ရို့ ပညာန ထာဝရဘုရားကို မသိရအောင် ထာဝရဘုရားစာ ဒေ လောကကို ကိုယ့်ညာဏ်ပညာန တည်မြဲအောင် လုပ်လီရေ။ ယင်းထက်ပင် ထာဝရဘုရားစာ သတင်းကောင်း၏ မိုက်မဲခြင်းကို အသုံးပြုရို့ ကျုံသူရို့ကို ကယ်တင်ဖို့ ကောင်းရေ ဟို့ မှတ်လီရေ။ 22ယုဒလူမျိုးရို့စာ နိမိတ်လက္ခဏာကို ကြည့်ဖို့ တောင်းကတ်တေ အရာ ဂရိလူမျိုးရို့စာ ပညာကို လိုက်ရို့ ရှာကတ်တေ၊ 23ယေကေလည်း ငါရို့စာ ကားတိုင်မာ အသီခံရစာ ခရစ်တော်၏ တရားတော်ကို ဟောပြောနီကတ်တေ။ ထိုတရားတော်စာ ယုဒလူမျိုးရို့ဘားမာ ဆန့်ကျင်စရာ အကြောင်း အရာ ယုဒမဟုတ်သူရို့ဘားမာ အဓိပ္ပါယ် မဟိစာ အကြောင်း ဖြစ်တေ။ 24ယေကေလည်း ယုဒလူမျိုး ဖြစ်စီ၊ ဂရိလူမျိုး ဖြစ်စီ၊ ထာဝရဘုရား၏ ကယ်တင်ခြင်းကို ရဖို့အတွက် အခေါ်ခံရသူရို့ဘားမာ ထိုခရစ်တော်စာ ထာဝရဘုရား၏ တန်ခိုးန ညာဏ်ပညာ ဖြစ်တေ။ 25ထာဝရဘုရား၏ မျက်စိမာ မိုက်မဲခြင်းစာ လူရို့ ညာဏ်ပညာထက် ပိုရို့ ညာဏ်ပညာနပြည့်စုံရေ အရာ ထာဝရဘုရား၏ မျက်စိမာ အားနည်းခြင်းစာ လူရို့ အားခွန်ထက် ပိုရို့ အားခွန်နပြည့်စုံရေ။

26ငါ့ ညီအစ်ကိုမောင်နမှရို့၊ နင်ရို့ ထာဝရဘုရား၏ ခေါ်ခြင်းကို မခံရခင်အယင်က ဇာပိုင်ဇတ်လူ ဟိကတ်လီရေလည်းဆိုစာကို နင်ရို့ စဉ်းစားကြည့်ကတ်။ နင်ရို့အထဲက များကာလူရို့စာ လောကသားရို့ မျက်စိမာ ပညာသျှင်၊ အာဏာသျှင် အရာ လူကြီးအစိုင် မဟိလီကတ်။ 27ယေကေလည်း ထာဝရဘုရားစာ ပညာသျှင်ရို့ကို အရှက် ချဖို့အတွက် လောကသားရို့ မျက်စိမာ လူဘောရို့ကို ရွီးကောက်ယူလီရေ။ အရာ ထာဝရဘုရားစာ အားသျှင်ရို့ကို အရှက် ချဖို့အတွက် လောကသားရို့ မျက်စိမာ အားနည်းသူရို့ကို ရွီးကောက်ယူလီရေ။ 28အရာ ထာဝရဘုရားစာ ဟိသမျ အရေးကြီးသူရို့ကို ဖျက်စီးဖို့အတွက် လောကသားရို့ မျက်စိမာ နိနွမ်းသူရို့၊ ရွန်ဖို့ကောင်းသူရို့ အရာ အသုံးမကျသူရို့ကို ရွီးကောက်ယူလီရေ။ 29ကိုယ့်ရှိက လူရို့ ဘော်ကြော့ကြင်းဖို့ မရလတ်အောင် ထို ဟိသမျ လူရို့ကို ထာဝရဘုရား ရွီးကောက်ယူလီရေ။ 30ထာဝရဘုရားစာ နင်ရို့ကို ခရစ်တော်ယေရှုန ပေါင်းပီးလီရေ။ အရာ ထိုခရစ်တော်စာ ငါရို့မာ ထာဝရဘုရားပီးစာ ညာဏ်ပညာ ဖြစ်တေ။ သူစာ ငါရို့ကို သူတော်ကောင်းအဖြစ် လက်ခံလီရေ၊ သန့်ရှင်းအောင် လုပ်လီရေ အရာ လွတ်မြောင့်ခြင်း ပီးလီရေ။ 31ယင်းအတွက်န ကျမ်းစာမာ ရွီးရို့ ဟိရေ၊ “ဘော်ကြော့ကြင်းချင်သူစာ အသျှင်၏ အကြောင်းကို ယူရို့ ဘော်ကြော့ကြင်း။”