1 Corinthians 10

ယုဒလူမျိုးရို့သမိုင်းက သင်ယူဖို့စာ အကြောင်း

1ငါ့ ညီအစ်ကိုမောင်နမှရို့၊ ငါရို့ အဖိုးအဖီးအစိုင်လာရို့ အားကုံးသူ မောရှေ နောက်က လိုက်လီကတ်တေခါ ဇာ ဖြစ်လီရေလည်းဆိုစာကို ငါ နင်ရို့ကို သိစီချင်ရေ။ ထာဝရဘုရားစာ သူရို့ကို မိုးရိပ်တစ်ခဲန ဆောင်ယူလားလီရေ အရာ သူရို့ အားကုံးသူ ပင်လယ်ထဲမာ မြေပြင်အသွိကနီရို့ အခြီန ကူးလားခကတ်လီရေ။ 2ဒေပိုင် ပြောနိုင်ရေ၊ သူရို့ အားကုံးသူ မောရှေ နောက်က လိုက်ရို့ မိုးရိပ်န ပင်လယ်အထဲမာ ရီနှစ်မင်္ဂလာ ခံယူကတ်လီရေ။ 3– 4အရာ သူရို့ အားကုံးသူ တစ်ချက်တည်း ဝိညာဉ်၏ အစာန ဝိညာဉ်၏ ရီကို စားသောက်ကတ်လီရေ၊ အကြောင်းကား ထာဝရဘုရားပီးစာ ဝိညာဉ်၏ ကျောက်လုံးစာ သူရို့နအတူ ပါလီရေ အရာ သူရို့စာ ထိုကျောက်လုံးက ရီသောက်ကတ်လီရေ။ ထိုကျောက်လုံးစာ ခရစ်တော် ဖြစ်တေ။ 5ယေကေလည်း ထာဝရဘုရားစာ သူရို့အထဲမာ များကာ လူရို့ကို မနှစ်သက်လီ။ ယင်းအတွက်န သူရို့စာ သဲကန္တာရတောမာ သီရို့ ဟိလိုက်ကတ်လီရေ။

6ငါရို့ သင်ယူဖို့ ရကတ်ပတ်စီအတွက် ယင်းပိုင် ဖြစ်ပျက်လာလီရေ။ သူရို့ လောဖတတ်လီကတ်စာပိုင် ငါရို့ လောဖ မတတ်ရ။ 7အရာ သူရို့အထဲက တစ်ချိုးလူရို့ ရုပ်တုကို ကိုးကွယ်လီကတ်စာပိုင် နင်ရို့လည်း ရုပ်တုကို မကိုးကွယ်ကတ်ကေ့၊ အကြောင်းကား ကျမ်းစာမာ ရွီးရို့ ဟိရေ၊ “လူရို့စာ စားသောက်ဖို့ ထိုင်ကတ်လီရေ၊ ယင်းနောက် သူရို့စာ ပျော်ပြီးကေ ထရို့ ကကတ်လီရေ။” 8အရာ သူရို့အထဲမာ တစ်ချိုးလူရို့စာ ကာမဂုဏ်ကို လိုက်စားကတ်လီရေ။ ယင်းအတွက်န တစ်ရက်တည်းမာ လူပေါင်းနှစ်ဆယ်နသုံးထောင် သီလားခကတ်လီရေ။ ငါရို့လည်း သူရို့ပိုင်တထန် ကာမဂုဏ်ကို မလိုက်စားရ။ 9သူရို့အထဲက တစ်ချိုးလူရို့စာ အသျှင်ကို စုံစမ်းလီရေအတွက်န မြိန်အကိုက် ခံရို့ သီလားခကတ်လီရေ။ ငါရို့လည်း သူရို့ပိုင်တထန် အသျှင်ကို မစုံစမ်းရ။ 10အရာ သူရို့အထဲက တစ်ချိုးလူရို့စာ မနှစ်သက်ဖြစ်ရို့ ထာဝရဘုရားကို အနှောက်သျှက် လုပ်လီကတ်တေ။ ယင်းအတွက်န သူရို့စာ ဖျက်စီးစာ ဂေါင်းခင်နတ်သား အလက်မာ ဖျက်စီးခြင်းကို ခံရကတ်လီရေ။ ငါရို့လည်း သူရို့ပိုင်တထန် မနှစ်သက်စာ စိတ်ကို မထားရ။

11အခြားလူရို့ သင်ယူဖို့ ရကတ်ပတ်စီအတွက် ယင်းပိုင် ဖြစ်ပျက်လီရေ။ ငါရို့စာ ခိုက်ကာလ ကုန်ဆုံးဖို့စာအချိန်တို့ ရောက်နီကတ်ပျာ။ ယင်းအတွက်န ငါရို့ကို သတိပီးဖို့အတွက် ထိုစကားတိကို ရွီးထားခလီစာ ဖြစ်တေ။ 12ယင်းအတွက်န အသူမဆို ကိုယ့်ကိုကိုယ် တတိုင်းမမြိုင်း ရပ်ရို့ ဟိရေ ဟို့ မှတ်တေဆိုကေ သူစာ မလဲရအောင် သတိပြု။ 13နင်ရို့ ခံရနီကတ်စာ တစ်ချက်တည်း အပြစ်သွေးဆောင်ခြင်းကို ဟိသမျ အားကုံးသူ ခံရနီကတ်တေ။ ထာဝရဘုရားစာ သစ္စာနပြည့်စုံရေ။ သူစာ နင်ရို့ မခံနိုင်စာ အပြစ်သွေးဆောင်ခြင်းကို နင်ရို့ကို ခံရစီလိမည် မဟုတ်။ ယေကေလည်း သူစာ နင်ရို့ အပြစ်သွေးဆောင်ခြင်းကို ခံရကတ်တေခါ နင်ရို့အတွက် ထွက်လာဖို့စာလမ်းကို ပြပီးလိမည်။ ယင်းပိုင်ဆိုကေ နင်ရို့ အပြစ်သွေးဆောင်ခြင်းကို ခံနိုင်ကတ်လိမည်။

14ယင်းအတွက်န ငါ ချစ်ခင်စာ မိတ်ဆွေရို့၊ နင်ရို့ ရုပ်တု ကိုးကွယ်ဖို့စာကို ရှောင်ကတ်။ 15နင်ရို့ လိမ္မာကတ်တေဆိုစာကို သိရို့ ငါ ဒေ စကားတိကို ပြောစာ ဖြစ်တေ။ ငါ ပြောစာစကားတိ မှန်လောမမှန်လောဆိုစာကို နင်ရို့ ကိုယ်တိုင် စစ်ဆေးရို့ ကြည့်ကတ်။ 16ငါရို့ အသျှင်၏ ပွဲတော်မင်္ဂလာကို စားရေခါ ထာဝရဘုရား၏ ကျေးဇူးတော် ခွက်ကို ယူရို့ ကျေးဇူးတင်ကတ်တေ။ ယင်းသျှင့်စာ ခရစ်တော်၏ သွီးကို ဝီမျှကတ်စာနတူရေ မဟုတ်လော? အရာ ငါရို့ ပေါင်မုန့်ကို အတိုက် အတိုက် ဖဲ့ရို့ စားကတ်တေ။ ယင်းသျှင့်လည်း ခရစ်တော်၏ ခန္ဓာကို ဝီမျှကတ်စာနတူရေ မဟုတ်လော? 17ပေါင်မုန့်စာ တစ်သျှက်တည်း ဖြစ်တေ၊ ယေကေလည်း ငါရို့ အားကုံးသူ ထိုပေါင်မုန့် တစ်သျှက်တည်းကို ဝီမျှရို့ စားကတ်တေ။ ယင်းအတွက်န ငါရို့စာ လူအများကြီး ဖြစ်ကတ်ကေလည်းသောက် တစ်ကိုယ်တည်း ဖြစ်တေ။ 18ဣသရေလလူမျိုး အကြောင်းကို စဉ်းစားကြည့်ကတ်။ သူရို့အထဲက ယဇ်ကောင်ကို စားသူရို့စာ ယဇ်ပလ္လင်ထက်မာ ပူဇော်စာတိမာ ပါဝင်ရေ မဟုတ်လော? 19ယင်းပိုင်ဆိုကေ ငါ ဇာ ပြောစာလည်း? ရုပ်တု မဟုတ်ကေ ရုပ်တုဘားမာ ပူဇော်စာ အစားအစာ အရေးကြီးရေ ဟို့ ငါ ပြောစာလော? 20ငါ ယင်းပိုင် ပြောစာ မဟုတ်၊ ယေကေလည်း ငါ ပြောချင်စာကား၊ ယုဒမဟုတ်သူရို့ ပူဇော်စာတိစာ ထာဝရဘုရားဘားမာ ပူဇော်စာ မဟုတ်၊ နတ်ဆိုးရို့ဘားမာ ပူဇော်စာ ဖြစ်တေ။ အရာ ငါ နင်ရို့ကို နတ်ဆိုးရို့န အဆက်ဆံ မထားစီချင်။ 21အသျှင်၏ ခွက်က သောက်သူရို့စာ နတ်ဆိုးရို့ ခွက်က မသောက်နိုင်။ အရာ အသျှင်၏ စားပွဲမာ စားသူရို့စာ နတ်ဆိုးရို့ စားပွဲမာ မစားနိုင်။ 22ငါရို့ ထိုအလုပ်တိကို လုပ်ရို့ အသျှင်ကို မန်မြှောင့်ပီးကတ်စာလော? အရာ ငါရို့စာ ထာဝရဘုရားထက် တန်ခိုးကြီးကတ်တေလော?

ကျုံသူရို့ လွတ်လပ်ခြင်း

23တစ်ချိုးလူရို့ ပြောနီကတ်တေ၊ “ဟိသမျ အားကုံးကို ငါ့မာ လုပ်ပိုင်ခွင့် ဟိရေ။” ဟုတ်တေ၊ ယေကေလည်း ဟိသမျ အားကုံးစာ လူကို အကျိုး မပီး။ ဟိသမျ အားကုံးကို ငါ့မာ လုပ်ပိုင်ခွင့် ဟိကေလည်း ဟိသမျ အားကုံးစာ လူကို တိုးတက်အောင် မလုပ်။ 24တစ်ယောက်လည်း ကိုယ့်ကောင်းကျိုးရေးအတွက် ကြိုးစားဖို့ မသင့်။ ယင်းထက်ပင် အခြားတစ်ယောက် ကောင်းကျိုးရေးအတွက် ကြိုးစားဖို့ သင့်ရေ။ 25ဈီးမာ ရောင်းစာ ဟိသမျ အသားကို နင်ရို့ စားနိုင်ကတ်တေ။ အရာ ထိုအသား ဇာက လာရေမလာဆိုစာကို နင်ရို့ မီးဖို့ အလိုမဟိ။ ယင်းပိုင်ဆိုကေ နင်ရို့မာ အသိညာဏ်ကို ထိခိုက်လိမည် မဟုတ်၊ 26အကြောင်းကား ကျမ်းစာမာ ရွီးရို့ ဟိရေ၊ “ကမ္ဘာမြေကြီးန ကမ္ဘာမြေကြီးအထဲမာ ဟိသမျ အားကုံးကို အသျှင် ပိုင်ရေ။”

27မကျုံသူတစ်ယောက် နင်ရို့ကို စားပွဲမာ ဖိတ်ခေါ်ရေဆိုကေ အရာ နင်ရို့စာ စားဖို့ လားချင်ရေဆိုကေ နင်ရို့ ရှိက ချပီးစာ အသား အားကုံးကို စားဘိုက်ခကတ်။ ထိုအသား ဇာက ဝယ်ရေလည်းဆိုစာကို မီးဖို့ အလိုမဟိ။ ယင်းပိုင်ဆိုကေ နင်ရို့မာ အသိညာဏ်ကို ထိခိုက်လိမည် မဟုတ်။ 28(ယေကေလည်း အသူမဆို နင်ရို့ကို၊ “ဒေ အသားစာ ရုပ်တုဘားမာ ပူဇော်စာ အသား” ဟို့ ပြောရေဆိုကေ ပြောသူန သူ့အသိညာဏ်ကို ထောက်ရို့ ထိုအသားကို မစားလီကတ်ကေ့။ 29နင်ရို့အတွက် အသိညာဏ်နမဆိုင်ကေလည်း အခြားတစ်ယောက်အတွက် အသိညာဏ်နဆိုင်နိုင်ရေ)။ အကြောင်းကား အခြားတစ်ယောက် အသိညာဏ်စာ ငါ့လွတ်လပ်ခြင်း အခွင့်ကို ဇာဖို့ စစ်ဆေးရဖို့လည်း? 30ငါ ထာဝရဘုရားကို ကျေးဇူးတင်ရို့ စားသောက်တေဆိုကေ ထိုကျေးဇူးတင်စာ အစားအစာအကြောင်းန ငါ ဇာဖို့ ပုတ်ခတ်ရို့ စကားအပြော ခံရဖို့လည်း? 31ယင်းအတွက်န နင်ရို့ စားသောက်ဖို့ပင် ဖြစ်စီ၊ ဇာ အလုပ်ကိုမဆို လုပ်ဖို့ပင် ဖြစ်စီ၊ ဟိသမျ အားကုံးကို ထာဝရဘုရား၏ ဘုန်းတန်ခိုးအတွက် လုပ်ကတ်။ 32ယုဒလူမျိုးရို့၊ မဟုတ်ကေ ယုဒမဟုတ်သူရို့၊ မဟုတ်ကေ ထာဝရဘုရား၏ အသင်းတော် လူရို့ သိက္ခာကျလတ်အောင် နင်ရို့ အလုပ်တစ်ခုကိုလည်း မလုပ်လီကတ်ကေ့။ 33ငါစာ ဟိသမျ လူရို့ကို ဟိသမျ နည်းလမ်းန နှစ်သက်အောင် လုပ်ဖို့ ကြိုးစားရေ။ ငါ ကိုယ့်ကောင်းကျိုးရေးအတွက်ကို မကြိုးစားဘိုင်းန အခြားလူရို့ ကောင်းကျိုးရေးအတွက်ကို ကြိုးစားနီရေ၊ အကြောင်းကား ငါ အားကုံးသူကို ကယ်တင်ခြင်း ရစီချင်ရေ။