1 Corinthians 11

1ငါစာ ခရစ်တော်ပိုင် ဖြစ်ဖို့စာကို ကြိုးစားနီရေ၊ နင်ရို့လည်း ငါ့ပိုင် ဖြစ်ဖို့စာကို ကြိုးစားကတ်။

သတင်းဝင်ဖို့စာ အကြောင်းကို သွန်သင်ခြင်း

2နင်ရို့ အမြဲတိုင်း ငါ့ကို အောက်မိနီကတ်တေ အရာ ငါ့ သွန်သင်ချက်ကိုလည်း နင်ရို့ လိုက်နာနီကတ်တေ။ ယင်းအတွက်န ငါ နင်ရို့ကို ချီမွမ်းရေ။ 3ယေကေလည်း နင်ရို့ မှတ်ထားကတ်၊ ယောက်ျားမာ အဂေါင်းစာ ခရစ်တော် ဖြစ်တေ၊ မိန်းမမာ အဂေါင်းစာ ယောက်ျား ဖြစ်တေ အရာ ခရစ်တော်မာ အဂေါင်းစာ ထာဝရဘုရား ဖြစ်တေ။ 4ယင်းအတွက်န ဇာ ယောက်ျားမဆို အဂေါင်းကို ချုပ်ရို့ ဆုတောင်းရေဆိုကေ မဟုတ်ကေ ထာဝရဘုရား၏ စကားတော်ကို ဟောပြောရေဆိုကေ သူစာ ကိုယ့်အဂေါင်းကို အသရေရှုတ်ချရေ။ သူ့မာ အဂေါင်းစာ ခရစ်တော် ဖြစ်တေ။ 5ယေကေလည်း ဇာ မိန်းမမဆို အဂေါင်းကို မချုပ်ဘိုင်းန ဆုတောင်းရေဆိုကေ မဟုတ်ကေ ထာဝရဘုရား၏ စကားတော်ကို ဟောပြောရေဆိုကေ သူစာ ကိုယ့်အဂေါင်းကို အသရေရှုတ်ချရေ၊ အကြောင်းကား သူစာ အဂေါင်း ရိတ်စာ မိန်းမနတူရေ။ သူ့မာ အဂေါင်းစာ သူ့လင် ဖြစ်တေ။ 6ဇာ မိန်းမမဆို အဂေါင်း မချုပ်ဘိုင်းန ထားရေဆိုကေ ယင်းမိန်းမစာ ကိုယ့်ဆံပင်ကို ရိတ်ဘိုက်လိုက်။ ယေကေလည်း မိန်းမတစ်ယောက်အတွက် ဆံပင် ပိုင်းခြင်းန ဆံပင် ရိတ်ခြင်းစာ ရှက်ကောင်းဖွယ်ရာ ဖြစ်တေ။ ယင်းအတွက်န သူစာ ကိုယ့်အဂေါင်းကို ချုပ်ထား။ 7ယောက်ျားမာ အဂေါင်းကို ချုပ်ထားဖို့ မသင့်၊ အကြောင်းကား ယောက်ျားစာ ထာဝရဘုရား၏ ပုံသဏ္ဍာန်န ဘုန်းသိက္ခာ ဖြစ်တေ။ ယေကေလည်း မိန်းမစာ ယောက်ျား၏ ဘုန်းသိက္ခာ ဖြစ်တေ။ 8ယောက်ျားကို မိန်းမက ဖန်ဆင်းလီစာ မဟုတ်၊ ယေကေလည်း မိန်းမကို ယောက်ျားက ဖန်ဆင်းလီစာ ဖြစ်တေ။ 9ယောက်ျားကို မိန်းမအတွက် ထာဝရဘုရား ဖန်ဆင်းလီစာ မဟုတ်၊ ယေကေလည်း မိန်းမကို ယောက်ျားအတွက် ဖန်ဆင်းလီစာ ဖြစ်တေ။ 10ယင်းအတွက်န မိန်းမရို့စာ ကိုယ့်ရို့မာ လင် အုပ်ချုပ်ခြင်းကို ခံယူရေဆိုစာကို ဂေါင်းခင်နတ်သားရို့ကို ပြဖို့အတွက် ကိုယ့်ရို့အဂေါင်းကို ချုပ်ထားကတ်ရဖို့။ 11ယေကေလည်း ထာဝရဘုရား၏ လူရို့အထဲမာ မိန်းမစာ ယောက်ျားကို အလိုဟိရေ အရာ ယောက်ျားလည်း မိန်းမကို အလိုဟိရေ။ 12အကြောင်းကား မိန်းမစာ ယောက်ျားက ဆင်းလာစာပိုင် ယောက်ျားလည်း မိန်းမက မွီးဖွားလာရေ။ ယေကေလည်း ဟိသမျ အားကုံး ထာဝရဘုရားက ဆင်းလာစာ ဖြစ်တေ။

13မိန်းမရို့မာ အဂေါင်း မချုပ်ဘိုင်းန ဆုတောင်းဖို့ သင့်လော မသင့်လောဆိုစာကို နင်ရို့ ကိုယ်တိုင် စဉ်းစားရို့ ကြည့်ကတ်။ 14ယောက်ျားမာ ဆံပင်အရှည် ထားရေဆိုကေ သူ့အတွက် ရှက်ကောင်းဖွယ်ရာ ဖြစ်တေဆိုစာကို ပကတိညာဏ်န သိရရေ။ 15ယေကေလည်း မိန်းမတစ်ယောက်မာ ဆံပင်အရှည် ထားရေဆိုကေ သူ့အတွက် လှပတင့်တယ်ရေ။ မိန်းမစာ ကိုယ့်အဂေါင်းကို ဖုံးထားဖို့အတွက်နရာ ထာဝရဘုရား သူ့ကို ဆံပင်အရှည် ပီးလီရေ။ 16အသူမဆို ဒေ အကြောင်းနပတ်သပ်ရို့ အငြင်းအခုံ လုပ်ချင်ရေဆိုကေ ငါ သူ့ကို ဒေပိုင် ပြောဖို့၊ ဒေ စည်းကမ်းကို ပယ်ရို့ ငါရို့အထဲမာ အခြားတစ်ခုစည်းကမ်းလည်း မဟိ အရာ ထာဝရဘုရား၏ အသင်းတော်တိုင်းမာလည်း မဟိ။

အသျှင်၏ ပွဲတော်မင်္ဂလာ အကြောင်းကို သွန်သင်ခြင်း

(မဿဲ ၂၆:၁၇-၃၀၊ မာကု ၁၄:၁၂-၂၆၊ လုကာ ၂၂:၇-၂၃)

17ယေကေလည်း ငါ ဒေဂု ပညှတ်ချက် ပီးဖို့စာ အကြောင်းမာ ငါ နင်ရို့ကို မချီမွမ်း၊ အကြောင်းကား နင်ရို့ အသင်းတော်လူအနေန သတင်းဝင်ဖို့အတွက် စုကတ်တေခါ နင်ရို့ကို အကျိုး ပီးဖို့စာထက်ပင် ဘေးအန္တရာယ်ကို ပီးရေ။ 18ပထမဆုံး နင်ရို့ အသင်းတော်လူအနေန သတင်းဝင်ဖို့အတွက် စုကတ်တေခါ နင်ရို့အထဲမာ မသင့်မတင် ဖြစ်နီကတ်တေဆိုစာကို ငါ ကြားရရေ။ အရာ ယင်းအကြောင်းကို ငါ တစ်ဖဲ့ ကျုံဖို့ ရရေ။ 19အမှန် နင်ရို့အထဲမာ မသင့်မတင် ဖြစ်နီကတ်ဖို့။ ယင်းခါရာ ထာဝရဘုရား၏ ရှိက အသူ ရိုးသားရေလည်းဆိုစာကို သိရဖို့။ 20အသင်းတော်လူအနေန နင်ရို့ အားကုံးသူ တစ်စုတည်း စုကတ်တေခါ နင်ရို့ အမှန် အသျှင်၏ ပွဲတော်မင်္ဂလာကို စားကတ်စာ မဟုတ်၊ 21အကြောင်းကား နင်ရို့ တစ်ယောက်ကို တစ်ယောက် မစောင့်ဘိုင်းန စားဘိုက်လိုက်ကတ်တေ။ ယင်းအတွက်န တစ်ယောက် တစ်ခုလည်း မစားရဘိုင်းန အဝမ်းဆာရို့ နီရရေ အရာ အခြားတစ်ယောက် ဝအောင် စားရို့သောက်ရို့ ယစ်လားခရေ။ 22ဇာ ဖြစ်နီကတ်စာလည်း! စားသောက်ဖို့အတွက် နင်ရို့မာ အိမ် မဟိလော? မဟုတ်ကေ နင်ရို့ ထာဝရဘုရား၏ အသင်းတော်ကို အားမနာ လုပ်ကတ်စာလော? မဟုတ်ကေ ဆင်းရဲသူရို့ကို အရှက်ချကတ်စာလော? ငါ နင်ရို့ကို ဇာ ပြောဖို့စာလည်း? ငါ ယင်းအကြောင်းမာ နင်ရို့ကို ချီမွမ်းဖို့စာလော? ယင်းအကြောင်းနပတ်သပ်ရို့ ငါ နင်ရို့ကို တစ်ခုပိုင်လည်း မချီမွမ်းနိုင်!

23– 24အသျှင်က ရလီစာ သွန်သင်ချက်ကို ငါ နင်ရို့ကို ပီးလီရေ။ အသျှင်ယေရှုကို ရန်သူရို့အလက်မာ ဖမ်းပီးလီစာ ညဉ့်မာ အသျှင်ယေရှုစာ ပေါင်မုန့်ကို ယူရို့ ထာဝရဘုရားကို ကျေးဇူးတင်လီရေ။ ယင်းနောက် သူစာ ထိုပေါင်မုန့်ကို ဖဲ့ရို့ ပြောလီရေ၊ “ဒေ ပေါင်မုန့်စာ ငါ့အသား ဖြစ်တေ အရာ ဒေ ပေါင်မုန့် နင်ရို့အတွက် ဖြစ်တေ။ ငါ့ကို အောက်မိဖို့အတွက် ဒေပိုင် လုပ်လီကတ်။” 25စားပြီးရေခါ ယင်းပိုင် သူစာ စပျစ်ရည် ခွက်ကို ယူရို့ ပြောလီရေ၊ “ဒေ ခွက်စာ ထာဝရဘုရား၏ စာချုပ်အသစ် အမှတ်တရ ဖြစ်တေ။ ထာဝရဘုရား၏ စာချုပ်အသစ်ကို ငါ့သွီးန ထိုးရေ။ နင်ရို့ ဒေ ခွက်က သောက်တိုင်း ငါ့ကို အောက်မိဖို့အတွက် ဒေပိုင် လုပ်လီကတ်။” 26အကြောင်းကား သူပြန်ရို့ ကြွမလာသကြား နင်ရို့ ဒေ ပေါင်မုန့်န ဒေ ခွက်က စားသောက်တိုင်း အသျှင် အသီခံရလီစာ အကြောင်းကို ကျော်ညာနီကတ်တေ။

27ယင်းအတွက်န အသူမဆို မထိုက်တန်ဘိုင်း ဒေ ပေါင်မုန့်န အသျှင်၏ ခွက်က စားသောက်တေဆိုကေ သူစာ အသျှင်၏ ခန္ဓာန သွီးကို ဆန့်ကျင်ရို့ ပြစ်မှားရေ။ 28ယင်းအတွက်န လူရို့စာ အယင်ဆုံး ကိုယ့်ကိုကိုယ် စစ်ဆေးရို့ ကြည့်လီကတ်။ ယင်းပြီးခါရာ ဒေ ပေါင်မုန့်န ဒေ ခွက်က စားသောက်လီကတ်။ 29အကြောင်းကား အသူမဆို နားမလည်ဘိုင်းန ဒေ ပေါင်မုန့်န ဒေ ခွက်က စားသောက်တေဆိုကေ သူစာ ကိုယ့်ကိုကိုယ် အပြစ်ဒါဏ်မာ ချရေ။ 30ယင်းအတွက်န နင်ရို့အထဲမာ တစ်ချိုးလူရို့စာ အားနည်းရို့ မကျန်းမာ ဖြစ်ကတ်လီရေ အရာ တစ်ချိုးလူရို့စာ သီလားခကတ်လီရေ။ 31ယေကေလည်း ငါရို့စာ ကိုယ့်ကိုကိုယ် စစ်ဆေးရို့ ကြည့်ရေဆိုကေ အသျှင်၏ စစ်ဆေးခြင်းက ရွတ်ကတ်ဖို့။ 32ကမ္ဘာကုန်ဆုံးရေနိမာ ငါရို့ ဒေ လောကသားရို့နအတူ အပြစ်ဒါဏ်ကို မခံရအောင်အတွက် အသျှင်စာ ဒေဂု ငါရို့ကို တရားစစ်ဆေးရေ အရာ ဆုံးမရေ။

33ယင်းအတွက်န ငါ့ ညီအစ်ကိုမောင်နမှရို့၊ နင်ရို့ အသင်းတော်လူအနေန အသျှင်၏ ပွဲတော်မင်္ဂလာကို စားသောက်ဖို့အတွက် စုကတ်တေခါ နင်ရို့ တစ်ယောက်ကို တစ်ယောက် စောင့်နီလီကတ်။ 34အသူမဆို အဝမ်း ဆာရေဆိုကေ သူစာ ကိုယ့်အိမ်က စားရို့ လာလတ်။ ယင်းပိုင်ဆိုကေ နင်ရို့ အသင်းတော်လူအနေန စုကတ်တေခါ ထာဝရဘုရား၏ အပြစ်ဒါဏ်က ရွတ်ကတ်လိမည်။ အခြား ဟိသမျ အကြောင်းတိကို ငါ လာရို့ ဖြေရှင်းမည်။