1 Corinthians 12

သန့်ရှင်းသောဝိညာဉ်တော်၏ ဆုကျေးဇူး အကြောင်း

1ညီအစ်ကိုမောင်နမှရို့၊ သန့်ရှင်းသောဝိညာဉ်တော်၏ ဆုကျေးဇူးအကြောင်းနပတ်သပ်ရို့ နင်ရို့ အမှား နားလည်ဖို့စာကို ငါ မလို။ 2နင်ရို့ ထာဝရဘုရားကို မကျုံခင်အယင်က လမ်းမှားရို့ စကားပြောဖို့ မတတ်စာ ရုပ်တုကို ကိုးကွယ်ရို့ ဟိလီကတ်တေဆိုစာကို နင်ရို့ သိကတ်တေ။ 3ယင်းအတွက်န ငါ နင်ရို့ကို ပြောပြမည်၊ အသူမဆို သန့်ရှင်းသောဝိညာဉ်တော်၏ ဆောင်ယူခြင်းကို ခံရရေဆိုကေ သူစာ၊ “ယေရှု ကျိန်ဆဲခြင်းကို ခံထိုက်တေ” ဟို့ မပြောနိုင်။ အရာ သန့်ရှင်းသောဝိညာဉ်တော် မကူညီဘိုင်းန၊ “ယေရှုစာ အသျှင် ဖြစ်တေ” ဟို့ တစ်ယောက်လည်း မပြောနိုင်။

4အမျိုးမျိုးအစတ်စတ် ဆုကျေးဇူး ဟိရေ၊ ယေကေလည်း ထို ဟိသမျ ဆုကျေးဇူးစာ သန့်ရှင်းသောဝိညာဉ်တော် တစ်ပါးတည်းကရာ လာရေ။ 5အရာ ပြုဇုဖို့စာ အမျိုးမျိုးနည်းလမ်း ဟိရေ၊ ယေကေလည်း ငါရို့ အားကုံးသူ အသျှင်တစ်ပါးတည်းကိုရာ ပြုဇုကတ်တေ။ 6ထာဝရဘုရားစာ ငါရို့ အားကုံးသူကို အလုပ် အခြားအခြား ခွဲရို့ ပီးလီရေ၊ ယေကေလည်း ထာဝရဘုရား တစ်ပါးတည်း ငါရို့ အားကုံးသူဘားမာ အလုပ်လုပ်နီရေ။

7သန့်ရှင်းသောဝိညာဉ်တော်စာ အားကုံးသူ ကောင်းကျိုးရေအတွက် တစ်ယောက် တစ်ယောက်စီကို ဆုကျေးဇူး တစ်မျိုးတစ်မျိုးစီ ပီးရေ။ 8တစ်ယောက်တစ်ရီကို သန့်ရှင်းသောဝိညာဉ်တော်၏ တန်ခိုးန ညာဏ်ပညာစကားကို ပြောဖို့ ပီးရေ။ 9အရာ တစ်ယောက်တစ်ရီကို ထိုတစ်ချက်တည်း သန့်ရှင်းသောဝိညာဉ်တော်၏ တန်ခိုးန အကြီးအကျယ် ကျုံခြင်းတရား၊ ရောဂါကောင်းအောင် လုပ်ဖို့စာတန်ခိုး၊ 10အံ့ဩဖွယ်အလုပ် လုပ်ဖို့စာတန်ခိုး၊ ထာဝရဘုရား၏ စကားတော်ကို ဟောပြောဖို့စာ တန်ခိုး အရာ အကောင်း-အဆိုး ဝိညာဉ်ကို သိဖို့စာ တန်ခိုးကို ပီးရေ။ တစ်ယောက်တစ်ရီကို အထူးထူးအဆန်းဆန်း အသံန စကားပြောဖို့စာ တန်ခိုးကို ပီးရေ အရာ တစ်ယောက်တစ်ရီကို ထိုစကားအသံကို ရှင်းပြဖို့စာ တန်ခိုးကို ပီးရေ။ 11တစ်ချက်တည်း သန့်ရှင်းသောဝိညာဉ်တော်စာ ထို ဟိသမျ ဆုကျေးဇူးကို ပီးနီရေ။ သူစာ ထို ဟိသမျ ဆုကျေးဇူးကို ကိုယ့်စိတ်သဖေါအတိုင်း အားကုံးသူကို အခြားအခြား ခွဲရို့ ပီးရေ။

ခန္ဓာတစ်ကိုယ်လုံးမာ အမျိုးမျိုး အင်္ဂါဟိခြင်း

12ငါ ပုံဥပမာတစ်ခု တင်ပြမည်။ ခန္ဓာတစ်ကိုယ်လုံးမာ အင်္ဂါ အများကြီး ဟိရေ။ ထိုအင်္ဂါတိ အများကြီး ဖြစ်ကေလည်း အာလုံးစာကို ပေါင်းခါရာ ကိုယ်ခန္ဓာတစ်ခု ဖြစ်တေ။ ခရစ်တော်၏ ခန္ဓာလည်း ယင်းပိုင်တထန် ဖြစ်တေ။ 13ယင်းအတွက်န ငါရို့စာ ယုဒလူမျိုး ဖြစ်စီ၊ ယုဒမဟုတ်သူ ဖြစ်စီ၊ ကျွန် ဖြစ်စီ အရာ လွတ်လပ်သူ ဖြစ်စီ၊ အားကုံးသူ တစ်ချက်တည်း သန့်ရှင်းသောဝိညာဉ်တော်ကနီရို့ တစ်ကိုယ်တည်းခန္ဓာအထဲမာ ရီနှစ်မင်္ဂလာ ခံယူလီကတ်တေ။ အရာ ထိုတစ်ချက်တည်း သန့်ရှင်းသောဝိညာဉ်တော်ကို ငါရို့ အားကုံးသူ ရကတ်ပျာ။

14လူတစ်ယောက် ခန္ဓာကို အင်္ဂါတစ်ခုတည်းန တည်စာ မဟုတ်၊ အင်္ဂါ အများကြီးန တည်စာ ဖြစ်တေ။ 15အခြီစာ၊ “ငါ အလက် မဟုတ်၊ ယင်းအတွက်န ငါစာ ခန္ဓာနလည်း မဆိုင်” ဟို့ ပြောကေလည်း ထိုအခြီစာ ကိုယ်ခန္ဓာ၏ အင်္ဂါတစ်ခု ဖြစ်တေ။ 16အရာ နားစာ၊ “ငါ မျက်စိ မဟုတ်၊ ယင်းအတွက်န ငါစာ ခန္ဓာနလည်း မဆိုင်” ဟို့ ပြောကေလည်း ထိုနားစာ ကိုယ်ခန္ဓာ၏ အင်္ဂါတစ်ခု ဖြစ်တေ။ 17ခန္ဓာတစ်ကိုယ်လုံး မျက်စိ ဖြစ်ဖို့ဆိုကေ ဇာပိုင်ပျင်ရို့ ကြားရဖို့လည်း? အရာ ခန္ဓာတစ်ကိုယ်လုံး နား ဖြစ်ဖို့ဆိုကေ ဇာပိုင်ပျင်ရို့ အနံ့ ရဖို့လည်း? 18ယေကေလည်း ထာဝရဘုရားစာ ကိုယ့်စိတ်သဖေါအတိုင်း ဟိသမျ အင်္ဂါကို တစ်ခုတစ်ခုပျင်ရို့ ခန္ဓာမာ ထည့်လီရေ။ 19ဟိသမျ အင်္ဂါ တစ်မျိုးတည်း ဖြစ်ဖို့ဆိုကေ ကိုယ်ခန္ဓာစာ ဇာပိုင် ကြည့်ဖို့ကောင်းဖို့လည်း? 20အင်္ဂါ များကေလည်း ကိုယ်ခန္ဓာစာ တစ်ခုတည်း ဖြစ်တေ။

21မျက်စိစာ အလက်ကို၊ “ငါ နင့်ကို အလို မဟိ” ဟို့ မပြောနိုင်။ အရာ အဂေါင်းစာ အခြီနှစ်ဖက်ကို၊ “ငါ နင်ရို့ကို အလို မဟိ” ဟို့ မပြောနိုင်။ 22ယင်းထက်ပင် ကိုယ်ခန္ဓာမာ အားနည်းရေ ဟို့ ချထားစာ အင်္ဂါတိကို ပိုရို့ အလိုဟိရေ။ 23ကိုယ်ခန္ဓာမာ အရေးမစိုက်ဘိုင်းန ထားစာ အင်္ဂါတိကို ငါရို့ အများ အရေးစိုက်ရဖို့။ ပြင်က မမြင်ရစာ အင်္ဂါတိကို ငါရို့ အရေးစိုက်ရို့ ဖုံးထားရဖို့။ 24– 25ယေကေလည်း ပြင်က မြင်ရစာ အင်္ဂါတိကို အရေးစိုက်ရို့ သုတ်သင်ဖို့ မလို။ ထာဝရဘုရားစာ ကိုယ်ခန္ဓာမာ အရေးမစိုက်စာ အင်္ဂါတိကို အများ အရေးစိုက်လီရေ။ အရာ ကိုယ်ခန္ဓာစာ မကွဲဘိုင်းန ဟိသမျ အင်္ဂါတိ အချင်းချင်း တစ်ခုကို တစ်ခု တွယ်တာလတ်အောင် ထာဝရဘုရားစာ ဟိသမျ အားကုံးကို တစ်နေရာတည်းမာ ပေါင်းပီးလီရေ။ 26အင်္ဂါတစ်ခု ဒုက္ခ ရရေဆိုကေ ဟိသမျ အင်္ဂါတိလည်း သူနအတူ ဒုက္ခ ရကတ်တေ။ အရာ အင်္ဂါတစ်ခု ရိုသေခြင်းကို ရရေဆိုကေ ဟိသမျ အင်္ဂါတိလည်း သူနအတူ ပျော်ကတ်တေ။

27နင်ရို့စာ ခရစ်တော်၏ ကိုယ်ခန္ဓာ ဖြစ်ကတ်တေ အရာ တစ်ယောက် တစ်ယောက်စီ ထိုကိုယ်ခန္ဓာ၏ အင်္ဂါတစ်ခုစီ ဖြစ်ကတ်တေ။ 28ထာဝရဘုရားစာ အသင်းတော်မာ ပထမဆုံး တမန်တော်ရို့ကို၊ ဒုတိယမာ တရားဟောပြောသူရို့ကို၊ အရာ တတိယမာ ဆရာရို့ကို ခန့်ထားလီရေ။ ယင်းနောက် ထာဝရဘုရားစာ အံ့ဩဖွယ်အလုပ် လုပ်ဖို့စာတန်ခိုး ရသူရို့ကို၊ ရောဂါကောင်းအောင် လုပ်ဖို့စာတန်ခိုး ရသူရို့ကို၊ အကူညီ ပီးဖို့စာတန်ခိုး ရသူရို့ကို၊ ဦးဆောင်ဖို့စာတန်ခိုး ရသူရို့ကို အရာ အထူးထူးအဆန်းဆန်း အသံန စကားပြောဖို့စာတန်ခိုး ရသူရို့ကို ခန့်ထားလီရေ။ 29ထိုသူရို့ အားကုံးသူ တမန်တော်လော? ထိုသူရို့ အားကုံးသူ ဘုရားသတင်းပို့သူလော? ထိုသူရို့ အားကုံးသူ ဆရာလော? ထိုသူရို့ အားကုံးသူမာ အံ့ဩဖွယ်အလုပ် လုပ်ဖို့စာတန်ခိုး ဟိရေလော? 30ထိုသူရို့ အားကုံးသူမာ ရောဂါကောင်းအောင် လုပ်ဖို့စာတန်ခိုး ဟိရေလော? ထိုသူရို့ အားကုံးသူ အမျိုးမျိုး ဘာသာစကား ပြောကတ်တေလော? ထိုသူရို့ အားကုံးသူ ဘာသာစကားကို နားလည်ပြနိုင်ကတ်တေလော? 31ယေကေလည်း ငါ ပြောမည်၊ နင်ရို့ အားကုံးစာထက် အရေးကြီးစာ ဆုကျေးဇူးကို ရဖို့အတွက် ကြိုးစားကတ်။

ဒေဂု ငါ နင်ရို့ကို အရာလည်း အကောင်းမြတ်ဆုံး လမ်းတစ်လမ်းကို ပြမည်။