1 Corinthians 13
အမြတ်ဆုံး ချစ်ခြင်းမေတ္တာ
1ငါစာ အမျိုးမျိုး ဘာသာစကားန ဂေါင်းခင်နတ်သားရို့ စကားကို ပြောနိုင်ရေဆိုကေ၊ ယေကေလည်း ငါ့မာ ချစ်ခြင်းမေတ္တာ မဟိဆိုကေ ငါစာ သက်သက် အားန တီးရို့မြည်စာ မောင်း မဟုတ်ကေ ဇွင်းဇွင်း တီးရို့မြည်စာ စဲနတူရေ။ 2အရာ ငါ့မာ ထာဝရဘုရား၏ စကားတော်ကို ဟောပြောဖို့စာ တန်ခိုး ဟိရေဆိုကေ၊ ဟိသမျ အနက်စကား အဓိပ္ပါယ်ကို နားလည်ဖို့စာတန်ခိုး ဟိရေဆိုကေ အရာ ဟိသမျ အတတ်ပညာ ဟိရေဆိုကေ၊ ယင်းထက်မက တောင်ကိုတိုင်အောင်ပင် တစ်နေရာကနီရို့ အခြားတစ်နေရာတို့ ရွှိဖို့စာလှောက် အပြည့်အစုံ ကျုံခြင်းတရား ဟိရေဆိုကေ၊ ယေကေလည်း ငါ့မာ ချစ်ခြင်းမေတ္တာ မဟိဆိုကေ ငါ့မာ တစ်ခုလည်း တန်ဖိုး မဟိ။ 3ငါစာ ကိုယ့်မာ ဟိသမျ ပစ္စည်း-ဥစ္စာကို ဆင်းရဲသားရို့ကို လှူရေဆိုကေ၊ ယင်းထက်မက ငါစာ ကိုယ့်ခန္ဓာကိုတိုင်အောင်ပင် မီးမာ ဖုတ်ရို့ ယဇ်ပူဇော်ရေဆိုကေ၊ ယေကေလည်း ငါ့မာ ချစ်ခြင်းမေတ္တာ မဟိဆိုကေ ငါ့မာ တစ်ခုလည်း အမြတ် မဟိ။ 4ချစ်ခြင်းမေတ္တာစာ အမြဲတိုင်း စိတ်အရှည် ထားရေ၊ သနားကြင်နာခြင်းကို ထားရေ။ ချစ်ခြင်းမေတ္တာစာ မနာလိုစိတ်ကို မထား၊ ဘော်ကြော့မကြင်း။ 5ချစ်ခြင်းမေတ္တာစာ ရိုင်းစိုင်းခြင်းကို မထား၊ ကိုယ့်အကျိုးကို မရှာ၊ ဒေါသ မထွက်၊ အခြားတစ်ယောက် မတရားလုပ်ခြင်းကို မှတ်ရို့ မထား၊ 6အရာ ချစ်ခြင်းမေတ္တာစာ မတရားစာ အလုပ်တိမာ မပျော်၊ ယေကေလည်း မှန်ကန်ခြင်းတရားတိမာ ပျော်ရေ။ 7ချစ်ခြင်းမေတ္တာစာ အဆုံးတိုင်အောင် တည်မြဲနီရေ၊ အမြဲတိုင်း ကျုံခြင်းတရားကို ထားရေ၊ အမြဲတိုင်း မျှော်လင်းချက်ကို ထားရေ အရာ ဟိသမျ အားကုံးစာမာ သည်းခံရို့ နီရေ။ 8ဒေ ချစ်ခြင်းမေတ္တာစာ တစ်ခါလည်း ကုန်ဆုံးခြင်း မဟိ။ ယေကေလည်း ထာဝရဘုရား၏ စကားတော်ကို ဟောပြောဖို့စာ ကုန်ဆုံးလိမည်၊ အထူးထူးအဆန်းဆန်း အသံန စကားပြောဖို့စာ ကုန်ဆုံးလိမည် အရာ အတတ်ပညာလည်း ကုန်ဆုံးလိမည်။ 9အကြောင်းကား ငါရို့ ဟိသမျ အကြောင်းအရာကို အပြည့်အစုံ မသိနိုင် အရာ ထာဝရဘုရား၏ စကားတော်ကိုလည်း အပြည့်အစုံ မဟောပြောနိုင်။ 10ယေကေလည်း ပြည့်စုံခြင်း ရောက်လာရေခါ ပြည့်စုံခြင်း မဟိစာတိ ပျောက်ကွယ်လိမည်။ 11ငါ အသျှေခါ အသျှေပိုင် စကား ပြောလီရေ၊ အသျှေပိုင် စဉ်းစားလီရေ အရာ အသျှေပိုင် တရားလည်း စစ်ဆေးလီရေ။ ယေကေလည်း ဒေဂု ငါ့မာ အသက်အရွှယ် ကြီးလာဗျာ။ ယင်းအတွက်န အသျှေ အကျင့်သီလတိကို ငါ စွန့်ဘိုက်လိုက်ပျာ။ 12ငါရို့ ဒေဂု မှန်မာ ကြည့်ကေ အရုပ်ကို မွဲရို့ မြင်ရစာနတူရေ၊ ယေကေလည်း ပြည့်စုံခြင်း ရောက်လာရေခါ ရှိဆိုင် မြင်ရဖို့။ ငါ ဒေဂု အပြည့်အစုံ မသိရသိ၊ ယေကေလည်း ထာဝရဘုရား ငါ့ကို အပြည့်အစုံ သိစာပိုင် ငါလည်း ယင်းခါ အပြည့်အစုံ သိရဖို့။ 13ဒေဂု ကျုံခြင်းတရား၊ မျှော်လင်းချက် အရာ ချစ်ခြင်းမေတ္တာ ထိုသုံးခု အဆုံးတိုင်အောင် တည်မြဲနီရေဆိုစာကို မြင်ရရေ။ ယေကေလည်း ထိုသုံးခုအထဲမာ ချစ်ခြင်းမေတ္တာစာ အကြီးမြတ်ဆုံး ဖြစ်တေ။
Copyright information for
RmzSC