1 Corinthians 14

ဝိညာဉ်၏ ဆုကျေးဇူးကို အသုံးပြုခြင်း

1ချစ်ခြင်းမေတ္တာ ထားဖို့စာရာ နင်ရို့မာ ရွယ်မှတ်ချက် ဖြစ်ရဖို့။ အရာ သန့်ရှင်းသောဝိညာဉ်တော်၏ ဆုကျေးဇူးကို ရဖို့အတွက် ကောင်းကောင်း တောင်းတကတ်။ အရေးကြီးဆုံး ဖြစ်တေကား၊ ထာဝရဘုရား၏ စကားတော်ကို ဟောပြောဖို့စာ တန်ခိုးကို ရဖို့အတွက် နင်ရို့ တောင်းတကတ်။ 2အထူးထူးအဆန်းဆန်း အသံန စကားပြောဖို့စာ ဆုကျေးဇူးကို ရသူစာ လူန စကားပြောစာ မဟုတ်၊ ယေကေလည်း ထာဝရဘုရားနရာ စကားပြောစာ ဖြစ်တေ၊ အကြောင်းကား သူစာ ဖုံးရွှက်ထားစာ အနက်စကားကို ဝိညာဉ်၏ တန်ခိုးန ပြောရေအတွက်န လူရို့ သူ့စကားကို နားမလည်နိုင်ကတ်။ 3ယေကေလည်း ထာဝရဘုရား၏ စကားတော်ကို ဟောပြောဖို့စာ တန်ခိုးကို ရသူစာ လူရို့န စကားပြောရေ။ သူစာ တိုးတက်ဖို့စာ စကား၊ အားပီးချက်စကား အရာ စိတ်ဖျော်ဖို့စာ စကားကို လူရို့ဘားမာ ပြောရေ။ 4အထူးထူးအဆန်းဆန်း အသံန စကားပြောဖို့စာ ဆုကျေးဇူးကို ရသူစာ သက်သက် ကိုယ့်ကိုရာ တိုးတက်အောင် လုပ်တေ၊ ယေကေလည်း ထာဝရဘုရား၏ စကားတော်ကို ဟောပြောဖို့စာ တန်ခိုးကို ရသူစာ အသင်းတော်ကို တိုးတက်အောင် လုပ်တေ။ 5ငါ နင်ရို့ အားကုံးသူကို အထူးထူးအဆန်းဆန်း အသံန စကားပြောဖို့စာ တန်ခိုးကို ရစီချင်ရေ၊ ယေကေလည်း ငါ နင်ရို့ကို ယင်းထက် ပိုရို့ ထာဝရဘုရား၏ စကားတော်ကို ဟောပြောဖို့စာ တန်ခိုးကို ရစီချင်ရေ။ အသင်းတော် တိုးတက်လတ်အောင် အထူးထူးအဆန်းဆန်း အသံန ပြောစာစကား အဓိပ္ပါယ်ကို အခြားတစ်ယောက် ရှင်းပြဖို့ မနိုင်ဆိုကေ ယင်းထက်ပင် ထာဝရဘုရား၏ စကားတော်ကို ဟောပြောသူစာ ပိုရို့ ကြီးမြတ်တေ။

6ယင်းအတွက်န ညီအစ်ကိုမောင်နမှရို့၊ ငါ နင်ရို့တို့ လာရို့ သက်သက် အထူးထူးအဆန်းဆန်း အသံန စကားပြောရေဆိုကေ နင်ရို့အတွက် အကျိုး ဖြစ်ဖို့လော? ငါ ပြောစာစကားတိမာ ထာဝရဘုရား၏ မှန်ကန်စာ စကား၊ ညာဏ်ပညာ စကား၊ ထာဝရဘုရား၏ စကားတော် အရာ ဆုံးမဩဝါဒ စကား မပါဆိုကေ နင်ရို့အတွက် တစ်ခုလည်း အကျိုး ဟိဖို့ မဟုတ်။ 7ယင်းထက်မက နှဲ မဟုတ်ကေ စောင်းပိုင် အသက်မဟိစာ တီးမှုတ်ကရိယာကို ပီပီသာသ မတီးမမှုတ်ဆိုကေ ဇာ တေးခြင်းအသံလည်းဆိုစာကို တစ်ယောက်လည်း သိကတ်ဖို့ မဟုတ်။ 8အရာ ဘောလည်းသောက် ပီပီသာသ အသံမထွက်ဆိုကေ စစ်သားရို့ တစ်ယောက်လည်း စစ်တိုက်ဖို့ လားဖို့အတွက် အဆင်သင့် လုပ်ကတ်မည် မဟုတ်။ 9ယင်းပိုင်တထန် လူရို့ နားမလည်စာ အထူးထူးအဆန်းဆန်း အသံန နင်ရို့ စကားပြောရေဆိုကေ နင်ရို့ ပြောစာစကားကို တစ်ယောက်လည်း နားလည်လိမည် မဟုတ်၊ အကြောင်းကား နင်ရို့ သက်သက် လီကို ပြောကတ်စာနတူရေ။ 10ဒေ လောကမာ အမျိုးမျိုး ဘာသာစကား ဟိရေ အရာ ထိုဘာသာစကား အားကုံးမာ အဓိပ္ပါယ် ဟိရေ။ 11ယင်းအတွက်န ငါ ဇာ ဘာသာစကား အဓိပ္ပါယ်ကိုပင်မဆို နားမလည်ဆိုကေ ထိုဘာသာစကားကို ပြောသူဘားမာ ငါစာ အခြားပြည်သား တစ်ယောက်ပိုင် ဖြစ်ဖို့ အရာ သူလည်း ငါ့ဘားမာ အခြားပြည်သား တစ်ယောက်ပိုင် ဖြစ်လိမည်။ 12နင်ရို့လည်း ယင်းပိုင် ဖြစ်ကတ်ဖို့။ သန့်ရှင်းသောဝိညာဉ်တော်၏ ဆုကျေးဇူးကို ရဖို့အတွက် နင်ရို့ တောင်းတကတ်တေ။ ယင်းအတွက်န အသင်းတော်ကို တိုးတက်အောင် လုပ်ဖို့စာ ဆုကျေးဇူးတိကို ရဖို့အတွက် နင်ရို့ အရေးတကြီး တောင်းတကတ်။

13ယင်းအတွက်န အထူးထူးအဆန်းဆန်း အသံန စကားပြောသူစာ ကိုယ်ပြောစာစကား အဓိပ္ပါယ်ကို ရှင်းပြဖို့ နိုင်လတ်အောင် ဆုတောင်း။ 14အကြောင်းကား ငါ အထူးထူးအဆန်းဆန်း အသံန ဆုတောင်းရေဆိုကေ ငါ့ဝိညာဉ်စာ ဆုတောင်းရေ၊ ယေကေလည်း ငါ ဇာ ပြောရေလည်းဆိုစာကို ငါ ကိုယ်တိုင် နားမလည်။ 15ယင်းပိုင်ဆိုကေ ငါ ဇာ လုပ်သင့်ရေလည်း? ငါစာ ဝိညာဉ်န ဆုတောင်းဖို့ အရာ စိတ်နလည်း ဆုတောင်းဖို့။ ငါစာ ဝိညာဉ်န ချီမွမ်းစာ တေးခြင်းကို ဆိုဖို့ အရာ စိတ်နလည်း ချီမွမ်းစာ တေးခြင်းကို ဆိုဖို့။ 16ယင်းသျှင့်ကိုအပယ် နင်စာ ဝိညာဉ်စိတ်န ထာဝရဘုရားကို ကျေးဇူးတင်ရေဆိုကေ နင် ကျေးဇူးတင်စာကို နားထောင်သူစာ နင့် ကျေးဇူးတင်ချက်ကို နားမလည်ဘိုင်းန ဇာပိုင်ပျင်ရို့ “အာမန်” ဆိုပြီးကေ ထောက်ခံဖို့လည်း? 17ဟုတ်တေ၊ နင် အမှန် ကျေးဇူးတင်စာ ဖြစ်နိုင်ရေ၊ ယေကေလည်း နင့် ကျေးဇူးတင်ချက်စာ အခြားတစ်ယောက်ကို ဝိညာဉ်ရေးဖက်က တစ်ခုလည်း တိုးတက်အောင် မလုပ်။

18ငါ နင်ရို့ အားကုံးသူထက် ပိုရို့ အထူးထူးအဆန်းဆန်း အသံန စကားပြောဖို့ နိုင်ရေအတွက်န ထာဝရဘုရားကို ကျေးဇူးတင်ရေ။ 19ယေကေလည်း အသင်းတော်မာ လူရို့န ငါ စကားပြောရေခါ ထောင်သောင်းကို ချီရို့ အထူးထူးအဆန်းဆန်း အသံန စကားပြောဖို့စာထက် အခြားလူရို့ကို သွန်သင်ပီးဖို့အတွက် နားလည်ဖို့စာ စကားငါးခွန်းကို ငါ ပြောချင်ရေ။

20ညီအစ်ကိုမောင်နမှရို့၊ နင်ရို့ အသျှေပိုင် မစဉ်းစားကတ်ကေ့။ ဆိုးယုတ်စာ အကြောင်းတိမာ နင်ရို့ အသျှေပိုင် ဖြစ်ကတ်၊ ယေကေလည်း နင်ရို့ အသက်အရွှယ်ကြီးသူပိုင် စဉ်းစားချက်ကို ထားကတ်။ 21မောရှေ၏ ပညှတ်တရားမာ ထာဝရဘုရား ပြောလီရေ၊ “အခြားဘာသာစကားကို ပြောသူရို့ကို အသုံးပြုရို့ ငါ ဒေ လူမျိုးဘားမာ စကားပြောဖို့ အရာ အခြားပြည်သားရို့ ပစကို အသုံးပြုရို့ ငါ ဒေ လူမျိုးန စကားပြောဖို့၊ ယေကေလည်း သူရို့စာ ငါ့စကားကို နားထောင်ကတ်လိမည် မဟုတ်။” 22ယင်းပိုင်ဆိုကေ မြင်ရစာကား၊ အထူးထူးအဆန်းဆန်း အသံန စကားပြောခြင်းစာ ကျုံသူရို့အတွက် နိမိတ်လက္ခဏာ မဟုတ်၊ မကျုံသူရို့အတွက် နိမိတ်လက္ခဏာ ဖြစ်တေ။ ယေကေလည်း ထာဝရဘုရား၏ စကားတော်ကို ဟောပြောခြင်းစာ မကျုံသူရို့အတွက် နိမိတ်လက္ခဏာ မဟုတ်၊ ကျုံသူရို့အတွက် နိမိတ်လက္ခဏာ ဖြစ်တေ။

23အသင်းတော်မာ ဟိသမျ လူရို့ စုကတ်တေခါ အထူးထူးအဆန်းဆန်း အသံန စကားပြောနီကတ်တေဆိုကေ အရာ အသင်းတော်မာ မပါဝင်သူရို့န မကျုံသူရို့စာ အထဲတို့ ဝင်လာကတ်တေဆိုကေ သူရို့စာ နင်ရို့ကို အရူး ဟို့ မပြောကတ်ပျာလော? 24ယေကေလည်း အားကုံးသူ ထာဝရဘုရား၏ စကားတော်ကို ဟောပြောကတ်တေခါ မကျုံသူရို့ မဟုတ်ကေ အသင်းတော်မာ မပါဝင်သူရို့စာ အထဲတို့ ဝင်လာရေဆိုကေ သူရို့ ဟောပြောရေအတွက်န ထိုသူရို့စာ ကိုယ်ရို့အပြစ် အကြောင်းကို နောင်တရကတ်လိမည် အရာ သူရို့ စိတ်နှလုံးမာ စစ်ဆေးခြင်းကို ခံရကတ်လိမည်။ 25ယင်းအတွက်န သူရို့ စိတ်နှလုံးမာ ဖုံးရွှက်ခြင်းတိ ပေါ်လာလိမည်၊ အရာ သူရို့စာ ဒူးထောက်ပြီးကေ ထာဝရဘုရားကို ချီမွမ်းရို့ ပြောကတ်လိမည်၊ “ထာဝရဘုရား အမှန် ကိုယ်ဘင်ရို့နအတူ ဟိရေ။”

စည်းကမ်းန ဝတ်ပြုကိုးကွယ်ခြင်း

26ညီအစ်ကိုမောင်နမှရို့၊ နင်ရို့ကို ငါ ပြောချင်စာကား၊ နင်ရို့ အသင်းတော်လူအနေန စုကတ်တေခါ နင်ရို့အထဲက တစ်ယောက်တစ်ရီ ချီမွမ်းစာ တေးခြင်းကို ဆိုရေ၊ တစ်ယောက်တစ်ရီ သွန်သင်ပီးရေ၊ တစ်ယောက်တစ်ရီ ထာဝရဘုရား၏ စကားတော်ကို ဟောပြောရေ၊ တစ်ယောက်တစ်ရီ အထူးထူးအဆန်းဆန်း အသံန စကားပြောရေ အရာ တစ်ယောက်တစ်ရီ ထိုစကား အဓိပ္ပါယ်ကို ရှင်းပြရေ။ ယေကေလည်း ဇာလူ-ဇာမဆို လုပ်လုပ် အသင်းတော် တိုးတက်ဖို့အတွက် လုပ်ကတ်။ 27နင်ရို့အထဲမာ အထူးထူးအဆန်းဆန်း အသံန စကားပြောဖို့သူ ဟိရေဆိုကေ အများဆုံး နှစ်ယောက် မဟုတ်ကေ သုံးယောက် အလှည်လှည်န စကားပြောကတ်။ အရာ အခြားတစ်ယောက် ထိုစကား အဓိပ္ပါယ်ကို ရှင်းပြ။ 28ယေကေလည်း ထိုစကား အဓိပ္ပါယ်ကို ရှင်းပြဖို့သူ တစ်ယောက်လည်း မဟိဆိုကေ သူရို့စာ အသင်းတော်မာ စကားမပြောဘိုင်းန တိန်းရို့နီကတ်။ သူရို့ ကိုယ့်မာကိုယ် ပြောကတ် အရာ ထာဝရဘုရားန ပြောကတ်။ 29ထာဝရဘုရား၏ စကားတော်ကို ဟောပြောသူရို့အထဲက နှစ်ယောက် မဟုတ်ကေ သုံးယောက် ဟောပြောကတ် အရာ အခြားလူရို့စာ သူရို့ ဟောပြောစာ စကားတိကို စစ်ဆေးရို့ ကြည့်ကတ်။ 30ယေကေလည်း ထာဝရဘုရား၏ စကားတော်ကို ဟောပြောရေခါ နားထောင်သူရို့အထဲက တစ်ယောက်ဘားမာ ထာဝရဘုရား တစ်ခုတစ်ခု ဖေါ်ပြရေဆိုကေ သူစာ ထရို့ ဟောပြောပတ်စီ။ ယင်းခါ ထာဝရဘုရား၏ စကားတော်ကို ဟောပြောနီသူစာ စကားမပြောဘိုင်းန တိန်းရို့နီ၊ 31အကြောင်းကား အားကုံးသူ သွန်သင်ချက်န စိတ်အား ရကတ်ပတ်စီအတွက် နင်ရို့ အားကုံးသူ အလှည်လှည်န ထာဝရဘုရား၏ စကားတော်ကို ဟောပြောနိုင်ကတ်တေ။ 32အရာ ထာဝရဘုရား၏ စကားတော်ကို ဟောပြောသူစာ ကိုယ့်ဆုကျေးဇူးကို အသုံးပြုဖို့ တတ်ရဖို့။ 33အကြောင်းကား ထာဝရဘုရားစာ ရောင်းရင်းသပ်ခြင်းကို မနှစ်သက်။ သူစာ ငြိမ်းချမ်းခြင်း၏ ထာဝရဘုရား ဖြစ်တေ။

ဒေသျှင့်စာ ထာဝရဘုရား၏ ဟိသမျ သန့်ရှင်းသူရို့အတွက် စည်းကမ်း ဖြစ်တေ။ 34မိန်းမရို့ အသင်းတော်မာ သတင်းဝင်ကတ်တေခါ စကားမပြောဘိုင်းန တိန်းရို့နီကတ်၊ အကြောင်းကား သူရို့မာ စကားပြောဖို့အခွင့် မဟိ။ မောရှေ၏ ပညှတ်တရားအတိုင်း သူရို့စာ အသင်းတော် ဂေါင်းဆောင်အကြီးရို့ အုပ်ချုပ်ခြင်းကို ခံယူကတ်။ 35သူရို့စာ ဇာမဆိုတစ်ခု သိချင်ရေဆိုကေ အိမ်မာ ကိုယ်ရို့မာ လင်ကို မီးကြည့်ကတ်၊ အကြောင်းကား အသင်းတော်မာ စကားပြောဖို့စာ မိန်းမတစ်ယောက်အတွက် ရှက်ကောင်းဖွယ်ရာ ဖြစ်တေ။

36ထာဝရဘုရား၏ စကားတော် နင်ရို့အထဲက ထွက်လာလီစာလော၊ မဟုတ်ကေ ထိုစကားတော် သက်သက် နင်ရို့ဘားမာ ဆင်းလာလီစာလော? 37အသူမဆို ကိုယ့်ကိုကိုယ် ဘုရားသတင်းပို့သူ မဟုတ်ကေ ဝိညာဉ်၏ ဆုကျေးဇူးကို ခံရသူတစ်ယောက် ဖြစ်တေ ဟို့ မှတ်တေဆိုကေ သူစာ ငါ နင်ရို့တို့ ရွီးလိုက်စာ ဟိသမျ အားကုံးကို အသျှင်၏ ပညှတ်ချက် ဖြစ်တေ ဟို့ ဝန်ခံယူ။ 38အရာ အသူမဆို ထိုပညှတ်ချက်ကို ငြင်းပယ်ရေဆိုကေ သူ့ကို တစ်ယောက်လည်း အသိအမှတ်မပြုကေ့။ 39ယင်းအတွက်န ငါ့ ညီအစ်ကိုမောင်နမှရို့၊ ထာဝရဘုရား၏ စကားတော်ကို ဟောပြောဖို့အတွက် နင်ရို့ အရေးတကြီး တောင်းတကတ် အရာ အထူးထူးအဆန်းဆန်း အသံန စကားပြောဖို့စာကိုလည်း မဟန့်ကတ်ကေ့။ 40ဟိသမျ အလုပ်ကို လှပတင့်တယ်ခြင်းန စည်းကမ်းကို ထားရို့ လုပ်ကတ်။