1 Corinthians 15

ယေရှုခရစ်တော် ပြန်ရှင်ထမြောင့်ခြင်း

1ညီအစ်ကိုမောင်နမှရို့၊ နင်ရို့ဘားမာ ဟောပြောလီစာ သတင်းကောင်းကို ငါ ဒေဂု နင်ရို့ကို ပြန်ရို့ အတွက်ဖေါ်ပီးချင်ရေ။ ထိုသတင်းကောင်းကို နင်ရို့ လက်ခံကတ်လီရေ အရာ ထိုသတင်းကောင်း အကြောင်းန နင်ရို့ တတိုင်းမမြိုင်း ဟိကတ်တေ။ 2ထိုသတင်းကောင်းကို နင်ရို့ နနောင်းတည်းရို့ ထားကတ်တေဆိုကေ ထိုသတင်းကောင်းကနီရို့ နင်ရို့ ကယ်တင်ခြင်းကို ရကတ်လိမည်။ ယင်းပိုင် မဟုတ်ဆိုကေ နင်ရို့မာ ကျုံခြင်းတရားစာ အကျိုးမဟိ ဖြစ်လိမည်။

3ငါ ရထားစာ တရားတော်ကို နင်ရို့ဘားမာ ဟောပြောပြီးဗျာ၊ အကြောင်းကား ဒေ တရားတော်စာ အားကုံးစာထက် အရေးကြီးဆုံး ဖြစ်တေ။ အရာ ဒေ တရားတော်စာ သတင်းကောင်း ဖြစ်တေ။ ဒေ သတင်းကောင်း ဖြစ်တေကား၊ ကျမ်းစာမာ ရွီးရို့ ဟိရေအတိုင်း ခရစ်တော်စာ ငါရို့ အပြစ်အတွက် အသီခံလီရေ၊ 4အရာ သူစာ သင်္ဂြိုဟ်ခြင်းကို ခံရလီရေ အရာ ကျမ်းစာမာ ရွီးရို့ ဟိရေအတိုင်း သူစာ သုံးရက်နိမာ သီရာက ပြန်ရှင်ထမြောင့်လီရေ။ 5သူစာ ပေတရုဘားမာ အမြင်ခံပြီးရေနောက် ကိုယ့်မာ အခြားတမန်တော်ရို့ဘားမာလည်း အမြင်ခံလီရေ။ 6ယင်းနောက် သူစာ တစ်ချိန်တည်းမာ အယောက် ငါးရာကျော် ကျုံသူညီအစ်ကိုမောင်နမှရို့ဘားမာလည်း အမြင်ခံလီရေ။ သူရို့အထဲမာ တစ်ချိုးလူရို့ သီလားခကတ်ကေလည်း များကာလူ ဒေဂုလည်း အသက်အရှင် ဟိကတ်သိရေ။ 7ယင်းနောက် သူစာ ယာကုပ်ဘားမာ အမြင်ခံလီရေ၊ အရာ ယင်းနောက် ဟိသမျ တမန်တော်ရို့ဘားမာ အမြင်ခံလီရေ။ 8သူစာ နောက်ဆုံးပြီးမာ လမစိဘိုင်းန မွီးဖွားလီသူ ငါ့ဘားမာလည်း အမြင်ခံလီရေ။

9ငါစာ တမန်တော်ရို့အထဲမာ အားကုံးသူထက် အသျှေဆုံး ဖြစ်တေ၊ ယင်းထက်မက ငါစာ တမန်တော် ဟို့ အခေါ် ခံရဖို့စာ တိုင်အောင်ပင် မထိုက်တန်၊ အကြောင်းကား ငါစာ ထာဝရဘုရား၏ အသင်းတော်တိကို ညှဉ်းဆဲလီရေ။ 10ယေကေလည်း ထာဝရဘုရား၏ သနားကြင်နာခြင်း အကြောင်းန ငါ ဒေဂု ဒေပိုင် အခြေအနေတို့ ရောက်လာဗျာ။ ထာဝရဘုရား၏ သနားကြင်နာခြင်းစာ ငါ့ဘဝမာ အသီးသီးအောင် လုပ်ပီးရေ။ ငါစာ အခြားတမန်တော်ရို့ထက် ပိုရို့ ကြိုးစားအားထုတ်ရို့ အလုပ်လုပ်နီရေ။ ယေကေလည်း ငါ ကြိုးစားအားထုတ်ရို့ လုပ်ကိုင်ခြင်းစာ ငါ့အကြောင်းန မဟုတ်၊ ယင်းထက်ပင် ထာဝရဘုရား၏ သနားကြင်နာခြင်းအကြောင်းနရာ ဖြစ်တေ။ 11ယင်းအတွက်န ငါ ဖြစ်စီ၊ အခြားတမန်တော်ရို့ ဖြစ်စီ၊ ငါရို့ အားကုံးသူ တစ်ခုတည်း သတင်းကောင်းကိုရာ နင်ရို့ဘားမာ ဟောပြောကတ်လီရေ အရာ နင်ရို့စာ ထိုသတင်းကောင်းကို ကျုံကတ်လီရေ။

သီသူရို့ ပြန်ရှင်ထမြောင့်ဖို့စာ အကြောင်း

12ယေကေလည်း ခရစ်တော် သီရာက ပြန်ရှင်ထမြောင့်ခြင်း အကြောင်းကို ဟောပြောရေဆိုကေ နင်ရို့အထဲက တစ်ချိုးလူရို့စာ သီသူရို့ ပြန်ရှင်ထမြောင့်ခြင်းဆိုစာ တစ်ခုလည်း မဟိ ဟို့ ဇာဖို့ ပြောနီကတ်စာလည်း? 13သီသူရို့ ပြန်ရှင်မထမြောင့်ဆိုကေ ခရစ်တော်လည်း ပြန်ရှင်မထမြောင့်လီသိ။ 14အရာ ခရစ်တော် ပြန်ရှင်မထမြောင့်လီသိဆိုကေ ငါရို့ ဟောပြောကတ်စာ တရားလည်း အမှန် မဟုတ် အရာ နင်ရို့မာ ကျုံခြင်းတရားလည်း အမှန် မဟုတ်။ 15အရာ ငါရို့စာ ထာဝရဘုရား၏ အကြောင်းကို မုတ်သား သက်သီပီးနီရေဆိုစာကို ဖေါ်ပြကတ်တေ၊ အကြောင်းကား ထာဝရဘုရား ခရစ်တော်ကို သီရာက ပြန်ရှင်ထမြောင့်စီလီရေ ဆိုပြီးကေ ငါရို့ သက်သီ ပီးနီကတ်တေ။ ယေကေလည်း သီသူရို့ကို ပြန်ရှင်မထမြောင့်စီလီဆိုကေ ထာဝရဘုရား ခရစ်တော်ကိုလည်း ပြန်ရှင်မထမြောင့်စီလီသိ၊ 16အကြောင်းကား သီသူရို့ ပြန်ရှင်မထမြောင့်ဆိုကေ ခရစ်တော်လည်း ပြန်ရှင်မထမြောင့်လီသိ။ 17ခရစ်တော် ပြန်ရှင်မထမြောင့်လီသိဆိုကေ နင်ရို့မာ ကျုံခြင်းတရားလည်း အကျိုးမဟိ အရာ နင်ရို့ ဒေဂုလည်း အပြစ်အောက်မာ ကျရို့ ဟိကတ်သိရေ၊ 18အရာ ခရစ်တော်ကို ကျုံသူအနေန သီလားခသူရို့စာ ပျက်စီးခြင်းတို့ ရောက်လားခကတ်ပျာ! 19ငါရို့ သက်သက် ဒေ ဘဝအတွက် ခရစ်တော်ကို မျှော်လင်းနီကတ်တေဆိုကေ ဟိသမျ လူရို့အထဲမာ ငါရို့စာ အများကြီး သနားကောင်းဖွယ်ရာ ဖြစ်နီကတ်ပျာ။

20ယေကေလည်း ခရစ်တော်စာ အမှန် သီရာက ပြန်ရှင်ထမြောင့်လီရေ။ ယင်းအတွက်န သူကိုယ်တိုင် သီလားခသူရို့ ပြန်ရှင်ထမြောင့်ဖို့ဆိုစာ အာမခံချက် ဖြစ်တေ။ 21အကြောင်းကား သီခြင်းတရားစာ လူတစ်ယောက်အကြောင်းန ဒေ ကမ္ဘာတို့ ရောက်လာလီရေ။ ယင်းအတွက်န သီရာက ပြန်ရှင်ထမြောင့်ခြင်းလည်း လူတစ်ယောက်အကြောင်းန ရောက်လာလီရေ။ 22ဟိသမျ လူရို့စာ အာဒံ၏ အမျိုးအနွယ်သား ဖြစ်တေအတွက်န အသီ ဖြစ်ကတ်တေ။ ယင်းပိုင်တထန် ခရစ်တော်န တစ်ကိုယ်တည်း ဖြစ်သူရို့စာ သီရာက ပြန်ရှင်ထမြောင့်ခြင်းကို ခံရကတ်ဖို့။ 23ယေကေလည်း အားကုံးသူ အလှည်လှည်န ပြန်ရှင်ထမြောင့်ကတ်ဖို့စာ ဖြစ်တေ။ ခရစ်တော်စာ ပထမဆုံး ပြန်ရှင်ထမြောင့်လီရေ၊ ယင်းနောက် ခရစ်တော် ပြန်ရို့ ကြွလာရေခါ သူ၏ လူရို့ ပြန်ရှင်ထမြောင့်ကတ်ဖို့။

24ယင်းနောက် ကမ္ဘာကုန်ဆုံးဖို့စာအချိန် ရောက်လာဖို့။ ယင်းခါ ခရစ်တော်စာ ဟိသမျ အုပ်ချုပ်ခြင်း၊ အခွင့်အာဏာ အရာ တန်ခိုးကို ဖျက်စီးရို့ ကိုယ့်နိုင်ငံတော်ကို အဖထာဝရဘုရားအလက်မာ တင်အပ်ဖို့။ 25ထာဝရဘုရား ဟိသမျ ရန်သူရို့ကို ခရစ်တော်၏ တန်ခိုးအောက်မာ မထားသကြား ခရစ်တော်စာ အုပ်ချုပ်ရို့နီဖို့။ 26နောက်ဆုံး ရန်သူဆိုစာ သီခြင်းတရားလည်း ဖျက်စီးခြင်းကို ခံရဖို့၊ 27အကြောင်းကား ကျမ်းစာမာ ရွီးရို့ ဟိရေ၊ “ထာဝရဘုရားစာ ဟိသမျ အားကုံးကို ကိုယ့်တန်ခိုးအောက်မာ ချထားဗျာ။” ထာဝရဘုရားစာ ကိုယ့်ကိုအပယ် အခြား ဟိသမျ အားကုံးကို ခရစ်တော်၏ တန်ခိုးအောက်မာ ချထားဗျာဆိုစာကို ငါရို့ သိရေ။ 28ထာဝရဘုရားစာ ဟိသမျ အားကုံးကို သားတော်၏ အုပ်ချုပ်ခြင်းအောက်မာ ချထားဖို့။ ယင်းနောက် သားတော် ကိုယ်တိုင်လည်း ထာဝရဘုရား၏ အုပ်ချုပ်ခြင်းကို ခံယူဖို့။ ယင်းပိုင်ဆိုကေ ထာဝရဘုရားစာ ဟိသမျ အားကုံးကို အုပ်ချုပ်ဖို့။

29ယေကေလည်း သီလားခသူရို့အတွက် ရီနှစ်မင်္ဂလာကို ခံယူသူရို့ ဇာ ဖြစ်ကတ်ဖို့လည်း? သီလားခသူရို့ကို ပြန်ရှင်မထမြောင့်စီဆိုကေ သူရို့ ဇာဖို့ သီသူရို့အတွက် ရီနှစ်မင်္ဂလာကို ခံယူကတ်စာလည်း? 30အရာ ငါရို့ ဇာဖို့ အမြဲတိုင်း ဖီးဒုက္ခန တွိကြုံနီရကတ်စာလည်း? 31ညီအစ်ကိုမောင်နမှရို့၊ ငါ ခရစ်တော်ယေရှု၏ လူအနေန နင်ရို့အတွက် ငါ့မာ ဘော်ကြော့ကြင်းခြင်းစာ မှန်ရေ။ ယင်းပိုင်တထန် ငါ နိတိုင်း သီခြင်းတရားန ရင်ဆိုင်နီရရေဆိုစာလည်း မှန်ရေ။ 32ဧဖက်မြို့မာဟိစာ တောတိရစ္ဆာန်တိန ငါ တိုက်ဆိုင်ရခြင်းစာ သက်သက် ဒေ လောကအတွက် ဖြစ်တေဆိုကေ ငါ့မာ တစ်ခုလည်း အမြတ် မဟိ။ သီလားခသူရို့ ပြန်ရှင်မထမြောင့်ဆိုကေ၊ “လာကတ်၊ ငါရို့ စားသောက်ကတ်မည်၊ အကြောင်းကား ငါရို့ နှက်ဖြန်ခါ သီလားကတ်ဖို့ဗျာ” ဟို့ ပြောထားစာ စကားဌာပိုင် ငါရို့ နီထိုင်နိုင်ရေ။ 33ဒေပိုင် စကားဌာ ပြောသူရို့ဘားမာ အလိမ်မခံကတ်ကေ့၊ အကြောင်းကား ငါရို့မာ ဒေပိုင် စကားဌာ ဟိရေ၊ “အပေါင်းအဖေါ် မကောင်းဆိုကေ လူကောင်းလည်း ပျက်လားနိုင်ရေ။” 34ယင်းအတွက်န နင်ရို့ နောင်တရကတ် အရာ အပြစ် မလုပ်နီကတ်ကေ့ဖိ။ နင်ရို့အထဲမာ တစ်ချိုးလူရို့ ထာဝရဘုရားကို မသိကတ်။ ငါ နင်ရို့ကို အရှက်ချဖို့အတွက် ဒေ စကားကို ပြောစာ ဖြစ်တေ။

ပြန်ရှင်ထမြောင့်ပြီးရေနောက် ရဖို့စာ ခန္ဓာ

35ယေကေလည်း တစ်ချိုးလူရို့ ပြောနိုင်စရာ ဟိရေ၊ “သီလားခသူရို့ ဇာပိုင်ပျင်ရို့ ပြန်ရှင်ထမြောင့်ကတ်ဖို့စာလည်း? အရာ သူရို့ ဇာပိုင်ဇတ် ခန္ဓာန ပြန်ရှင်ထမြောင့်ကတ်ဖို့စာလည်း?” 36ဇာပိုင် ပညာတုံးစာ မီးခွန်းလည်း! နင် စိုက်ပျိုးစာ မျိုးစိစာ မပျက်စီးဆိုကေ ပျိုးပင်သျှေတိ မပေါက်နိုင်။ 37အရာ နင် ပျိုးပင်သျှေကို စိုက်ပျိုးစာ မဟုတ်၊ မျိုးစိကို စိုက်ပျိုးစာ ဖြစ်တေ။ စပါးစိ ဖြစ်စီ မဟုတ်ကေ အခြားမျိုးစိ ဖြစ်စီ၊ မျိုးစိတစ်စိတည်းရာ စိုက်ပျိုးခြင်းကို ခံရရေ။ 38ယေကေလည်း ထာဝရဘုရားစာ ကိုယ့်အလိုတော်အတိုင်း ထိုမျိုးစိကို ကိုယ်ခန္ဓာ ပီးရေ။ မျိုးစိတိုင်းက အခြား အခြားပျင်ရို့ တင့်တယ်စာ ပျိုးပင်သျှေ ပေါက်လာရေ။ 39ဟိသမျ အသား တစ်မျိုးတည်း မဟုတ်။ လူအသား တစ်မျိုး၊ သတ္တဝါအသား တစ်မျိုး၊ ငှက်အသား တစ်မျိုး အရာ ငါးအသား တစ်မျိုး ဖြစ်တေ။ 40ဂေါင်းခင်ဘုံမာ ကိုယ်ခန္ဓာ အများကြီး ဟိရေ၊ လောကမာလည်း ကိုယ်ခန္ဓာ အများကြီး ဟိရေ၊ ယေကေလည်း ဂေါင်းခင်ဘုံမာဟိစာ ကိုယ်ခန္ဓာတိမာ ဘုန်းသိက္ခာ တစ်မျိုး အရာ လောကမာဟိစာ ကိုယ်ခန္ဓာတိမာ ဘုန်းသိက္ခာ တစ်မျိုး ဖြစ်တေ။ 41နီမာ လှပခြင်း တစ်မျိုး၊ လမာ လှပခြင်း တစ်မျိုး အရာ ကြယ်တိမာ လှပခြင်း တစ်မျိုး ဖြစ်တေ။ ယင်းထက်မက ကြယ်တိမာ လှပခြင်း တစ်ခုန တစ်ခုမတူ။

42သီသူရို့ ပြန်ရှင်ထမြောင့်ခြင်းလည်း ယင်းပိုင် ဖြစ်ဖို့။ အမြှုတ်ခံရစာ ကိုယ်ခန္ဓာစာ ပျက်လားခရေ၊ ယေကေလည်း ပြန်ရှင်ထမြောင့်ဖို့စာ ကိုယ်ခန္ဓာစာ တစ်ခါလည်း ပျက်လိမည် မဟုတ်။ 43ငါရို့မာ ကိုယ်ခန္ဓာစာ ရုပ်နံအပျက်န မြေပြင်မာ အမြှုတ်ခံရရေ၊ ယေကေလည်း ဘုန်းသိက္ခာန ပြန်ရှင်ထမြောင့်ခြင်းကို ခံရဖို့။ အရာ ငါရို့မာ ကိုယ်ခန္ဓာစာ အားမဟိဘိုင်းန မြေပြင်မာ အမြှုတ်ခံရရေ၊ ယေကေလည်း အားခွန်န ပြန်ရှင်ထမြောင့်ခြင်းကို ခံရဖို့။ 44မြေပြင်မာ အမြှုတ်ခံရစာ ကိုယ်ခန္ဓာစာ ပကတိ ကိုယ်ခန္ဓာ ဖြစ်တေ၊ ယေကေလည်း ပြန်ရှင်ထမြောင့်ခြင်းကို ခံရဖို့စာ ကိုယ်ခန္ဓာစာ ဝိညာဉ်၏ ကိုယ်ခန္ဓာ ဖြစ်တေ။ အကြောင်းကား ပကတိ ကိုယ်ခန္ဓာ ဟိရေဆိုကေ ဝိညာဉ်၏ ကိုယ်ခန္ဓာလည်း ဟိရေ။ 45ကျမ်းစာမာ ရွီးရို့ ဟိရေ၊ “ပထမ လူအာဒံစာ အသက်ဟိစာ သတ္တဝါ ဖြစ်လာလီရေ။” အရာ နောက်ဆုံး အာဒံစာ ▼

▼နောက်ဆုံး အာဒံဆိုစာ ယေရှုခရစ်တော်၏ အကြောင်းကို ပြောစာ ဖြစ်ပါရေ။

အသက်ပီးစာ ဝိညာဉ်တော် ဖြစ်လာလီရေ။ 46ယေကေလည်း ဝိညာဉ်၏ ကိုယ်ခန္ဓာစာ ပထမ ဖြစ်ပေါ်လာစာ မဟုတ်။ ယင်းထက်ပင် ပကတိ ကိုယ်ခန္ဓာစာ ပထမ ဖြစ်ပေါ်လာစာ ဖြစ်တေ။ ယင်းနောက် ဝိညာဉ်၏ ကိုယ်ခန္ဓာ ဖြစ်ပေါ်လာလီရေ။ 47ပထမ လူစာ မြေမုန့်က ဖန်ဆင်းခြင်းကို ခံရလီရေ၊ ယေကေလည်း ဒုတိယ လူစာ ဂေါင်းခင်ဘုံက ဆင်းလာလီရေ။ 48ကမ္ဘာနဆိုင်စာ လူရို့စာ မြေမုန့်က ဖန်ဆင်းခြင်းကို ခံရသူနတူရေ၊ ယေကေလည်း ဂေါင်းခင်ဘုံနဆိုင်စာ လူရို့စာ ဂေါင်းခင်ဘုံသားနတူရေ။ 49ငါရို့ ဒေဂု မြေမုန့်က ဖန်ဆင်းခြင်းကို ခံရသူနတူကတ်တေ၊ ယေကေလည်း ငါရို့ နောက်က ဂေါင်းခင်ဘုံသားနတူကတ်ဖို့။

သီခြင်းတရားကို အောင်မြင်ခြင်း

50ညီအစ်ကိုမောင်နမှရို့၊ နင်ရို့ကို ငါ ပြောရေ၊ ငါရို့မာ ဒေ သွီးသားခန္ဓာန ထာဝရဘုရား၏ နိုင်ငံတော်ကို မပိုင်နိုင်။ သီနိုင်စာတိစာ မသီနိုင်စာတိကို မပိုင်နိုင်။ 51နားထောင်ကတ်၊ ငါ နင်ရို့ဘားမာ ဖုံးရွှက်စာ အနက်စကားတစ်ခွန်း ပြောမည်။ ငါရို့ အားကုံးသူ သီလားကတ်ဖို့စာ မဟုတ်၊ ပြောင်းလှဲလားကတ်ဖို့စာ ဖြစ်တေ။ 52နောက်ဆုံး ဘောမှုတ်တေခါ တစ်စက္ကန်မာ၊ မျက်စိတစ်ခတ်မာ ငါရို့ အားကုံးသူ ပြောင်းလှဲလားလီကတ်ဖို့။ နောက်ဆုံး ဘောမှုတ်တေခါ သီလားခသူရို့ ပြန်ရှင်ထမြောင့်ကတ်ဖို့ အရာ သူရို့ တစ်ခါလည်း ပျက်စီးခြင်းတို့ ရောက်ကတ်ဖို့ မဟုတ်ပျာ။ ယင်းခါ ငါရို့ အရှင်ဟိသူရို့လည်း ပြောင်းလှဲလားလီကတ်ဖို့။ 53အကြောင်းကား ငါရို့မာ ဒေ ပျက်နိုင်စာ ကိုယ်ခန္ဓာစာ မပျက်နိုင်စာ ကိုယ်ခန္ဓာ ဖြစ်လားလီဖို့။ အရာ ဒေ သီနိုင်စာ ကိုယ်ခန္ဓာစာ မသီနိုင်စာ ကိုယ်ခန္ဓာ ဖြစ်လားလီဖို့။ 54ယင်းပိုင် ပြောင်းလှဲရေခါ ကျမ်းစာမာ ရွီးရို့ဟိစာ စကား ပြည့်စုံလာဖို့။ ကျမ်းစာမာ ရွီးရို့ ဟိရေ၊
“ထာဝရဘုရားစာ သီခြင်းတရားကို အနိုင်ယူဗျာ။
55အဝေး သီခြင်းတရား၊ နင့်မာ အောင်မြင်ခြင်း ဇာမာလည်း?
အဝေး သီခြင်းတရား၊ နင့်မာ အစွယ် ဇာမာလည်း?”

56ထိုအစွယ်စာ အပြစ် ဖြစ်တေ။ အပြစ်စာ သီခြင်းတရားကို ယူလာရေ။ မောရှေ၏ ပညှတ်တရားစာ အပြစ်ကို တန်ခိုး ပီးရေ။ 57ယေကေလည်း ထာဝရဘုရားကို ကျေးဇူးတင်ရေ၊ အကြောင်းကား ငါရို့မာ အသျှင်ယေရှုခရစ်တော်ကနီရို့ ငါရို့စာ အပြစ်န သီခြင်းကို အနိုင်ယူနိုင်ရေ။ 58ယင်းအတွက်န ငါ ချစ်ခင်စာ ညီအစ်ကိုမောင်နမှရို့၊ နင်ရို့ကို တစ်ခုလည်း လှုတ်ဖို့ မနိုင်လတ်အောင် နင်ရို့ တတိုင်းမမြိုင်းနီကတ်။ နင်ရို့ အမြဲတိုင်း အသျှင်၏ အလုပ်မာ ကိုယ်ရို့ကို အပြည့်အစုံ တင်အပ်ကတ်၊ အကြောင်းကား အသျှင်အတွက် နင်ရို့ လုပ်ကတ်စာ အလုပ်တိစာ အကျိုးမဟိ ဖြစ်ဖို့ မဟုတ်ဆိုစာကို နင်ရို့ သိကတ်တေ။