1 Corinthians 16

အလှူတန်းကား ကောက်ထားဖို့စာ အကြောင်း

1ဒေဂု ထာဝရဘုရား၏ လူရို့ကို ကူညီဖို့အတွက် အလှူတန်းကား ကောက်ဖို့စာ အကြောင်းကို ငါ ပြောမည်။ ဂါလာတိပြည်နယ်မာဟိစာ အသင်းတော်တိကို ငါ မှာလိုက်စာပိုင် နင်ရို့လည်း လုပ်ကတ်။ 2ငါ ရောက်လာရေခါ အလှူတန်းကား ကောက်ဖို့ မကျလတ်အောင် တလင်္ဂနွီနိတိုင်း နင်ရို့ အားကုံးသူ ကိုယ်ရို့ နိုင်အားသလှောက်ကို အလှူတန်းကား ကောက်ရို့ စုထားလီကတ်။ 3ငါ နင်ရို့တို့ ရောက်တေခါ ထိုအလှူတန်းကားတိကို နင်ရို့ စိတ်ကျုံရစာ လူရို့အလက်မာ အပ်ရို့ ယေရုရှလင်မြို့တို့ ပို့လိုက်ဖို့။ အရာ ငါ ထောက်ခံစာ တစ်ရွက် ရွီးရို့ သူရို့အလက်မာ အပ်လိုက်ဖို့။ 4အရာ ငါ ကိုယ်တိုင် လားဖို့ သင့်ရေ ဟို့ မှတ်တေဆိုကေ သူရို့ ငါနအတူ လိုက်ဖို့ ရကတ်မည်။

ပေါလု၏ ခရီးထွက်ဖို့ စီစဉ်ချက်

5ငါ မာကေဒေါနိပြည်နယ်တို့ လားဖို့ စီစဉ်ရို့ ဟိရေ။ ယင်းအတွက်န ငါ နင်ရို့တို့ လာရေခါ မာကေဒေါနိပြည်နယ်ထဲက ဝင်ရို့ လာဖို့။ 6ဖြစ်နိုင်ရေဆိုကေ ငါ နင်ရို့နအတူ လိုင်းကေရက် နီခရဖို့လော မသိ၊ မဟုတ်ကေ ဆောင်းရာသီပွဲအောင် ငါ နင်ရို့နအတူ နီခရဖို့လော မသိ။ ယင်းပိုင်ဆိုကေ ငါ ရှိတို့ ဆက်ရို့ လားဖို့စာ လမ်းခရီးအတွက် နင်ရို့ ငါ့ကို ကူညီဖို့ ရကတ်ဖို့။ 7ဒေဂု လားဖို့စာလမ်းမာ တစ်နားသျှေအတွက် ငါ နင်ရို့န အတွိမခံချင်၊ ယင်းထက်ပင် အသျှင် ငါ့ကို အခွင့်ပီးရေဆိုကေ ငါ နင်ရို့နအတူ ရက်တာရှည် နီခဖို့ ဟို့ ငါ မျှော်လင်းရို့ ဟိရေ။ 8ရက်ပေါင်းငါးဆယ်ပွဲနိ တိုင်အောင် ငါ ဧဖက်မြို့မာ နီခဖို့၊ 9အကြောင်းကား ဒေမြို့မာ ငါ့ကို တားဆီးဖို့သူ အများကြီး ဟိကတ်ကေလည်း အကျိုးအများ ရဖို့စာအလုပ်ကို လုပ်ဖို့အတွက် ကောင်းကောင်း ကြီးကျယ်စာ အခွင့်ရေးတစ်ခု ငါ့ ရှိက အဆင်သင့် ဟိရေ။

10 တိမောသေ နင်ရို့တို့ လာနိုင်စရာ ဟိရေ။ သူစာ နင်ရို့တို့ လာရေဆိုကေ မကြောက်မလန့်ဘိုင်း နင်ရို့နအတူ နီဖို့ရလတ်အောင် နင်ရို့ သူ့ကို ကြည့်ရှုစောင်မရို့ ထားလီကတ်၊ အကြောင်းကား ငါ့ပိုင်တထန် သူလည်း အသျှင်၏ အလုပ်ကို လုပ်နီရေ။ 11ယင်းအတွက်န သူ့ကို တစ်ယောက်ကိုလည်း အားမနာ မလုပ်စီကတ်ကေ့။ သူစာ ငါ့တို့ စိတ်အီးချမ်းသာန ပြန်လာဖို့ ရလတ်အောင် နင်ရို့ သူ့ကို ပဿိပီးရို့ ရွှတ်လိုက်ကတ်။ သူစာ အခြားကျုံသူညီအစ်ကိုရို့နအတူ ပြန်လာဖို့ ဟို့ ငါ ထင်ရေ။

12ငါ ဒေဂု ကျုံသူညီအစ်ကို အာပေါလု အကြောင်းကို ပြောမည်။ ကျုံသူညီအစ်ကိုရို့နအတူ နင်ရို့တို့ လားပတ်စီအတွက် ငါ သူ့ကို ကောင်းကောင်း တောင်းပန်လီရေ၊ ယေကေလည်း သူစာ ဒေဂု မလားချင်။ နောက်က အခွင့်သာရေဆိုကေ သူစာ နင်ရို့တို့ ရောက်လာလိမည်။

အဆုံး အမှာစကား

13နင်ရို့ သတိန နီကတ်။ နင်ရို့မာ ကျုံခြင်းတရားကို တတိုင်းမမြိုင်း ထားကတ်၊ ရဲဝံ့သတ္တိကို ထားကတ် အရာ အားခွန်နပြည့်စုံကတ်။ 14နင်ရို့ ဇာမဆို လုပ်လုပ် ချစ်ခြင်းမေတ္တာစိတ်န လုပ်ကတ်။

15ညီအစ်ကိုမောင်နမှရို့၊ သတေဖန်န သူ့အိမ်သားရို့စာ အာခါယပြည်နယ်မာ ပထမ ကျုံသူ ဖြစ်ကတ်တေဆိုစာကို နင်ရို့ သိကတ်တေ။ သူရို့စာ ထာဝရဘုရား၏ လူရို့ကို ပြုဇုဖို့အတွက် ကိုယ်ရို့ကို ထာဝရဘုရားဘားမာ တင်အပ်လီကတ်တေ။ 16ယင်းပိုင်ဇတ် လူရို့ အုပ်ချုပ်ခြင်းကို ခံယူဖို့အတွက် ငါ နင်ရို့ကို တောင်းပန်ရေ။ အရာ ဒေ အလုပ်မာ သူရို့နအတူ ကြိုးစားအားထုတ်ရို့ လုပ်သူရို့ အုပ်ချုပ်ခြင်းကိုလည်း ခံယူကတ်။ 17သတေဖန်၊ ဖော်တုနတ် အရာ အခါယကု လာလီကတ်တေအတွက်န ငါ ကောင်းကောင်း ပျော်လီရေ၊ အကြောင်းကား နင်ရို့ မဟိရေခါ နင်ရို့တက်စား သူရို့ ရောက်လာကတ်လီရေ။ 18အရာ သူရို့ နင်ရို့ကို အားပီးလီကတ်စာပိုင် ငါ့ကိုလည်း အားပီးလီကတ်တေ။ ဒေပိုင်ဇတ် လူရို့ကို နင်ရို့ ရိုသေကတ်။

အဆုံးခေါက် နှုတ်ဆက်ခြင်း

19အာရှိပြည်နယ်မာဟိစာ အသင်းတော်တိ နင်ရို့ကို နှုတ်ဆက်ကတ်တေ။ အရာ အာကုလန ပြစ်ကိလ အရာ သူရို့ အိမ်မာ စုရို့ သတင်းဝင်နီသူရို့လည်း အသျှင်၏ ချစ်ခြင်းမေတ္တာအကြောင်းန နင်ရို့ကို နှုတ်ဆက်ကတ်တေ။ 20အရာ ဒေမာ ဟိကတ်စာ ဟိသမျ ကျုံသူညီအစ်ကိုမောင်နမှရို့လည်း နင်ရို့ကို နှုတ်ဆက်ကတ်တေ။ ချစ်ခြင်းမေတ္တာစိတ်န နင်ရို့ တစ်ယောက်ကို တစ်ယောက် နှုတ်ဆက်လီကတ်။

21ဒေ နှုတ်ဆက်ခြင်း စကားကို ငါ ပေါလု ကိုယ်တိုင် ရွီးလိုက်တေ။ 22အသူမဆို အသျှင်ကို မချစ်ဆိုကေ သူ့ဘားမာ ကျိန်ဆဲကျလီစီ။ အကျွန်ရို့ အသျှင် ကြွလာပါ။ 23အသျှင်ယေရှု၏ ကျေးဇူးတော် နင်ရို့နအတူ ဟိပါစီ။ 24ခရစ်တော်ယေရှုကနီရို့ နင်ရို့ အားကုံးသူကို ငါ ချစ်ခြင်းမေတ္တာ ထားရေ။ အာမန်။