1 Corinthians 2
ခရစ်တော် ကားတိုင်မာ အသီခံခြင်း၏ သတင်းကောင်း
1ငါ့ ညီအစ်ကိုမောင်နမှရို့၊ ငါ နင်ရို့တို့ လားရို့ ထာဝရဘုရား၏ မှန်ကန်ခြင်းတရားကို ဟောပြောလီရေခါ လှပစာ စကားန ညာဏ်ပညာနပြည့်စုံစာ စကားတိကို အသုံးမပြုလီ။ 2အကြောင်းကား နင်ရို့နအတူ နီလီရေခါ ကားတိုင်မာ အသီခံရလီစာ ယေရှုခရစ်တော်ကို ပယ်ရို့ ငါ အခြားတစ်ခု အကြောင်းကိုလည်း မသိ ဟို့ ဆုံးဖြတ်လီရေ။ 3အရာ ငါ နင်ရို့နအတူ ဟိလီရေခါ ငါ ကိုယ့်ကိုကိုယ် အားနည်းရေ ဟို့ မှတ်လီရေ အရာ အကြောက်အားကြီးရို့ ကောင်းကောင်း တုန်လီရေ။ 4– 5ငါ နင်ရို့မာ ကျုံခြင်းတရားကို လူ၏ ညာဏ်ပညာထက်မာ မတည်ဘိုင်းန ထာဝရဘုရား၏ တန်ခိုးထက်မာ တည်စီချင်လီရေ။ ယင်းအတွက်န ညာဏ်ပညာနပြည့်စုံစာ လိမ်လှည့်စရာ စကားတိကို အသုံးပြုရို့ ငါ နင်ရို့ကို သွန်သင် မပီးလီ အရာ တရားလည်း မဟောပြောလီ။ ယင်းထက်ပင် သန့်ရှင်းသောဝိညာဉ်တော်၏ တန်ခိုးနရာ ငါ သွန်သင်ပီးလီရေ။ထာဝရဘုရား၏ ညာဏ်ပညာ
6ယေကေလည်း ဝိညာဉ်ရေးဖက်က ပြည့်စုံခြင်းဟိသူရို့ဘားမာ ညာဏ်ပညာ စကားကို ငါရို့ ဟောပြောကတ်တေ။ ယင်းညာဏ်ပညာစာ ဒေ လောက၏ ညာဏ်ပညာ မဟုတ် အရာ ဒေ လောကကို အုပ်ချုပ်သူရို့ ညာဏ်ပညာလည်း မဟုတ်။ ဒေ လောကကို အုပ်ချုပ်သူရို့မာကား တန်ခိုးအာဏာ နည်းလားနီဗျာ။ 7ယေကေလည်း ငါရို့စာ ထာဝရဘုရား၏ ဖုံးရွှက်စာ ညာဏ်ပညာ စကားတိကိုရာ ဟောပြောကတ်တေ။ ထိုညာဏ်ပညာစာ တစ်ချိန်ခါ ဖုံးရွှက်ရို့ ဟိလီရေ။ ထာဝရဘုရားစာ ကိုယ့်ဘုန်းတန်ခိုးကို ငါရို့ကို ပီးဖို့အတွက် ကမ္ဘာကို မဖန်ဆင်းခင်အယင်ကပင် ဒေ ညာဏ်ပညာကို အဆင်သင့် လုပ်ထားလီရေ။ 8ဒေခိုက်မာ အုပ်ချုပ်သူရို့အထဲက တစ်ယောက်လည်း ထိုညာဏ်ပညာ အကြောင်းကို နားမလည်လီကတ်။ သူရို့ နားလည်လီကတ်ဖို့ဆိုကေ ဘုန်းတန်ခိုးနပြည့်စုံစာ အသျှင်ကို ကားတိုင်မာ တင်ရို့ အသီသတ်လီကတ်ဖို့ မဟုတ်။ 9ယေကေလည်း ကျမ်းစာမာ ရွီးရို့ ဟိရေ၊“သူ့ကို ချစ်သူရို့အတွက် ထာဝရဘုရား အဆင်သင့် လုပ်ထားစာတိကို
တစ်ယောက်လည်း မျက်စိကလည်း မမြင်ဖူးကတ်၊
နားကလည်း မကြားဖူးကတ်၊
အရာ စိတ်မာလည်း မမှတ်ဖူးကတ်။” 10ယေကေလည်း ထာဝရဘုရားစာ ကိုယ့်ဝိညာဉ်တော်ကနီရို့ ထိုညာဏ်ပညာတိကို ငါရို့ဘားမာ ဖေါ်ပြလီရေ၊ အကြောင်းကား သန့်ရှင်းသောဝိညာဉ်တော် မသိစာ တစ်ခုလည်း မဟိ။ သူစာ ထာဝရဘုရား၏ ဖုံးရွှက်စာ အကြောင်းကိုလည်း သိရေ။ 11လူရို့စာ ကိုယ်ရို့အချင်းချင်း တစ်ယောက် စဉ်းစားချက်ကို တစ်ယောက် မသိနိုင်ကတ်။ သက်သက် လူအထဲမာဟိစာ ဝိညာဉ်ရာ ကိုယ့်စိတ်နှလုံးမာ စဉ်းစားချက်ကို သိရေ။ ယင်းပိုင်တထန် ထာဝရဘုရား၏ စိတ်နှလုံးမာ စဉ်းစားချက်ကို အခြားတစ်ယောက်လည်း မသိနိုင်ကတ်၊ သက်သက် ထာဝရဘုရား၏ ဝိညာဉ်တော်ရာ သိရေ။ 12ငါရို့ ဒေ လောက၏ ဝိညာဉ်ကို ရလီကတ်စာ မဟုတ်၊ ယေကေလည်း ထာဝရဘုရား၏ ဝိညာဉ်တော်ကို ရလီကတ်စာ ဖြစ်တေ၊ အကြောင်းကား ငါရို့ကို ထာဝရဘုရားပီးစာ ဟိသမျ ဝိညာဉ်၏ ဆုကျေးဇူး အကြောင်းကို နားလည်ကတ်ပတ်စီအတွက် ဖြစ်တေ။ 13ယင်းအတွက်န ထိုဆုကျေးဇူး အကြောင်းကိုရာ ငါရို့ ဟောပြောနီကတ်တေ။ ယေကေလည်း ငါရို့ ထိုဆုကျေးဇူး အကြောင်းကို ဟောပြောရေခါ လူရို့ပီးစာ သွန်သင်ချက်ကို အသုံးပြုရို့ ဟောပြောကတ်စာ မဟုတ်။ ယင်းထက်ပင် သန့်ရှင်းသောဝိညာဉ်တော်ပီးစာ သွန်သင်ချက်ကို အသုံးပြုရို့ ဟောပြောကတ်စာ ဖြစ်တေ။ အရာ ဝိညာဉ်နဆိုင်စာ အကြောင်းတိကို ရှင်းပြဖို့အတွက် ငါရို့စာ သန့်ရှင်းသောဝိညာဉ်တော်က ရစာ စကားတိကိုရာ အသုံးပြုကတ်တေ။ 14ဝိညာဉ်နမဆိုင်သူစာ ထာဝရဘုရားက လာစာ မှန်ကန်ခြင်းတိကို လက်မခံနိုင်၊ အကြောင်းကား ယင်းသျှင့်တိစာ သူ့ဘားမာ တစ်ခုလည်း အဓိပ္ပါယ် မဟိ။ အရာ သန့်ရှင်းသောဝိညာဉ်တော်ကို လက်မခံသူစာ ဝိညာဉ်နဆိုင်စာ အကြောင်းတိကို နားမလည်နိုင်၊ အကြောင်းကား သန့်ရှင်းသောဝိညာဉ်တော် မကူညီဘိုင်းန ထိုအကြောင်းတိကို မသိနိုင်။ 15အရာ ဝိညာဉ်နဆိုင်သူစာ ဟိသမျ အားကုံးကို စစ်ဆေးရို့ ကြည့်ဖို့ နိုင်ရေ၊ ယေကေလည်း သူ့ကို တစ်ယောက်လည်း စစ်ဆေးရို့ ကြည့်ဖို့ မနိုင်ကတ်။ 16အကြောင်းကား ကျမ်းစာမာ ရွီးရို့ ဟိရေ၊
“အသျှင်၏ စိတ်သဖေါကို အသူ သိနိုင်ရေလည်း?
အရာ အသျှင်ကို အသူ အကြံပီးနိုင်ရေလည်း?” ယေကေလည်း ငါရို့စာ ခရစ်တော်၏ စိတ်ကို ရကတ်ပျာ။
Copyright information for
RmzSC