1Cor 4 | RmzSC | STEP | လူရို့စာ အာပေါလုန ငါ့ကို ခရစ်တော်၏ ပြုဇုသူန ထာဝရဘုရား၏ ဖုံးရွှက်စာ မှန်ကန်ခြင်းကို ဟောပြောဖို့ တာဝန် ရသူ ဖြစ်တေ ဟို့ မှတ်ကတ်ပတ်စီ။

1 Corinthians 4

ခရစ်တော်၏ တမန်တော်

1 လူရို့စာ အာပေါလုန ငါ့ကို ခရစ်တော်၏ ပြုဇုသူန ထာဝရဘုရား၏ ဖုံးရွှက်စာ မှန်ကန်ခြင်းကို ဟောပြောဖို့ တာဝန် ရသူ ဖြစ်တေ ဟို့ မှတ်ကတ်ပတ်စီ။ 2 ကိုယ့်အပိုင်သျှင်က တာဝန် ရစာ အလုပ်သမားဂေါင်းစာ သစ္စာဟိရဖို့။ 3 နင်ရို့ ဖြစ်စီ၊ အသူမဆို ဖြစ်စီ၊ ငါ့ကို တရားစစ်ဆေးကတ်တေဆိုကေ ငါ့မာ တစ်ခုလည်း အရေးမကြီး။ ယင်းထက်မက ငါ ကိုယ်တိုင်လည်း ကိုယ့်ကိုကိုယ် တရားမစစ်ဆေး။ 4 ငါ့မာ အသိညာဏ်စာ စင်ကြယ်ရေ၊ ယေကေလည်း ငါ ကိုယ့်ကိုကိုယ် အပြစ်နကင်းသူ ဖြစ်တေ ဟို့ သက်သီ မပြနိုင်။ အသျှင်ရာ ငါ့ကို တရားစစ်ဆေးရေ။ 5 ယင်းအတွက်န အသျှင် ပြန်ရို့ ကြွမလာသကြား နင်ရို့ တစ်ယောက်ကိုလည်း တရားမစစ်ဆေးလီကတ်ကေ့။ ယင်းအဓိပ္ပါယ်ကား တရားစစ်ဆေးဖို့စာနိရက် မတိုင်သကြား နင်ရို့ တစ်ယောက်ကိုလည်း တရားမစစ်ဆေးလီကတ်ကေ့။ သူစာ တရားစစ်ဆေးရေနိမာ အမိုက်မှောင်ထဲမာ ဖုံးရွှက်ရို့ ဟိစာတိကို အလင်းတို့ ထုတ်ယူခလိမည် အရာ လူရို့ စိတ်နှလုံးမာ ဖုံးရွှက်စာ ရွယ်မှတ်ချက်တိကိုလည်း ဖေါ်ပြလိမည်။ ယင်းအချိန်ခါ လူရို့စာ ထာဝရဘုရားက ကိုယ်နထိုက်တန်စာ ချီမွမ်းခြင်းကို ခံရကတ်လိမည်။

6 ငါ့ ညီအစ်ကိုမောင်နမှရို့၊ နင်ရို့ နားလည်ကတ်ပတ်စီအတွက် ငါန အာပေါလုကို ပုံဥပမာ တင်ပြရို့ ထို ဟိသမျ စကားကို ပြောလီစာ ဖြစ်တေ၊ အကြောင်းကား ငါရို့စာ နင်ရို့ကို ကျမ်းစာမာ ရွီးရို့ဟိစာ စကားတိထက် အရာလည်း ပြင်တို့ ထွက်ရို့ မလားစီချင်။ ယင်းပိုင်ဆိုကေ နင်ရို့စာ ဂေါင်းဆောင်ရို့အထဲက တစ်ယောက်ကို ချီမွမ်းရို့ အခြားတစ်ယောက်ကို အားမနာ လုပ်ကတ်လိမည် မဟုတ်။ 7 နင့်ကို အခြားလူရို့ထက် ထူးဆန်းရေ ဟို့ တစ်ယောက်လည်း မမှတ်။ နင့်မာ ဟိသမျ အားကုံးစာ ဆုကျေးဇူးအဖြစ် ထာဝရဘုရားက ရလီရေ မဟုတ်လော? ယင်းပိုင်ဆိုကေ ထာဝရဘုရားက ဆုကျေးဇူးအဖြစ် မရစာပိုင် နင် ဇာဖို့ အကြီးအကျယ် စကားတိကို ပြောနီစာလည်း?

8 နင်ရို့ မှတ်နီကတ်စာကား၊ ဒေဂု နင်ရို့မာ လိုအပ်ချက် အားကုံး ပြည့်စုံလားခဗျာ၊ အရာ နင်ရို့ အယင်ကပင် သူဌေး ဖြစ်လားခကတ်ပျာ။ ဒေဂုပင် နင်ရို့ မင်းပိုင် နီထိုင်ကတ်ပျာ၊ ယေကေလည်း ငါရို့ မင်းပိုင် မနီထိုင်ကတ်။ ဟုတ်တေ၊ နင်ရို့ အမှန် မင်း ဖြစ်ကတ်ကေပင် ကောင်းလီဖို့သိ။ ယင်းပိုင်ဆိုကေ ငါရို့လည်း နင်ရို့နအတူ အုပ်ချုပ်ဖို့ ရလီကတ်ဖို့။ 9 ယင်းထက်ပင် ငါရို့ မှတ်ကတ်စာကား၊ ထာဝရဘုရားစာ ငါရို့ကို အသင်းတော်မာ အနိမ့်ဆုံးနေရာမာ ချထားရေ။ ငါရို့စာ သီဒါဏ် ခံရဖို့အတွက် လူပရိတ်သတ်ရို့ ရှိက ယူလားစာ ထောင်ကျသားရို့ပိုင် ဖြစ်နီကတ်ပျာ။ ငါရို့စာ လောကသားရို့န ဂေါင်းခင်နတ်သားရို့ဘားမာ ရည်သွန်းပြုခြင်းကို ခံရနီကတ်ပျာ။ 10 ငါရို့စာ ခရစ်တော်အကြောင်းန ပညာတုံး ဖြစ်ကတ်ပျာ၊ ယေကေလည်း နင်ရို့ မှတ်ကတ်တေ၊ နင်ရို့စာ ခရစ်တော်န တစ်ကိုယ်တည်း ဖြစ်ရို့ ပညာသျှင် ဖြစ်ကတ်ပျာ! အရာ ငါရို့စာ အားနည်းသူ ဖြစ်ကတ်တေ၊ ယေကေလည်း နင်ရို့ မှတ်ကတ်တေ၊ နင်ရို့ အားခွန်နပြည့်စုံသူ ဖြစ်ကတ်ပျာ! အရာ နင်ရို့စာ ရိုသေခြင်းကို ခံရသူ ဖြစ်ကတ်ပျာ! ယေကေလည်း ငါရို့စာ အသရေရှုတ်ချခြင်းကို ခံရသူ ဖြစ်ကတ်ပျာ။ 11 ငါရို့ ဒေဂုပင် အစားန ရီငတ်နီကတ်တေ၊ အရာ အဝတ်အစား ခေါင်းပါးနီကတ်တေ။ ငါရို့စာ ညှဉ်းဆဲခြင်းကို ခံရနီကတ်တေ၊ အရာ ငါရို့မာ ကိုယ်ပိုင် အိမ်ယာ မဟိကတ်။ 12 ငါရို့ ကိုယ့်အလက်န ပင်ပန်းခံပြီးကေ အလုပ်လုပ်ရို့ စားနီကတ်တေ။ လူရို့ ငါရို့ကို ပုတ်ခတ်ရို့ စကား ပြောကတ်တေခါ ငါရို့စာ သူရို့ကို မေတ္တာပို့ကတ်တေ အရာ လူရို့ ငါရို့ကို ညှဉ်းဆဲကတ်တေခါ ငါရို့ သည်းခံနီကတ်တေ။ 13 အရာ လူရို့ ငါရို့ကို အသရေရှုတ်ချကတ်တေခါ ငါရို့ နုညံ့ခြင်းစကားန သူရို့ကို အဖြေပီးကတ်တေ။ ငါရို့ ဒေနိတိုင်အောင် ဒေ လောကသားရို့ မျက်စိမာ ကြွန်းအညှက်န ညစ်ညူးစာတိပိုင် ဖြစ်နီကတ်တေ။

14 ငါ နင်ရို့ကို အရှက်ချဖို့အတွက် ဒေ စကားတိကို ရွီးလိုက်စာ မဟုတ်၊ ယေကေလည်း ငါ နင်ရို့ကို ကိုယ့်သားသမီး အရင်းပိုင် မှတ်ရို့ သတိပီးဖို့အတွက် ရွီးလိုက်စာ ဖြစ်တေ။ 15 အကြောင်းကား နင်ရို့အထဲမာ ခရစ်တော် အကြောင်းကို သွန်သင်ပီးဖို့သူ ထောင်သောင်းမက ဟိကေလည်း နင်ရို့မာ အဖဆိုစာ တစ်ယောက်တည်းရာ ဟိရေ။ ငါစာ သတင်းကောင်းကို ဟောပြောခြင်းကနီရို့ ခရစ်ယာန် ဘဝမာ နင်ရို့အဖ ဖြစ်ပျာ။ 16 ယင်းအတွက်န နင်ရို့ ငါ့ပိုင်တထန် နီထိုင်ဖို့အတွက် ငါ နင်ရို့ကို အရေးတကြီး တောင်းပန်ရေ။ 17 ယင်းအတွက်န ငါ တိမောသေကို နင်ရို့တို့ ရွှတ်လိုက်လီရေ။ တိမောသေစာ ကျုံသူအနေန ငါ့မာ ချစ်ခင်စာန သစ္စာဟိစာသား ဖြစ်တေ။ ငါ ဇာပိုင် ယေရှုခရစ်တော်ကို အမှီပြုရေလည်းဆိုစာကို သူစာ နင်ရို့ကို အတွက်ဖေါ်ရို့ ပီးလိမည်။ ထိုအကြောင်းကို နေရာတိုင်းမာဟိစာ အသင်းတော်တိုင်းမာ ငါလည်း သွန်သင်ပီးနီရေ။

18 ငါ နင်ရို့တို့ ပြန်မလာ ဟို့ ထင်ရို့ နင်ရို့အထဲမာ တစ်ချိုးလူရို့စာ ဘဝင်မြင့်နီကတ်ပျာ။ 19 ယေကေလည်း အသျှင် အလိုဟိရေဆိုကေ ငါ နင်ရို့တို့ အယင်အမြန် လာလတ်ဖို့။ ယင်းခါ သူရို့စာ သက်သက် ဘော်ကြော့ကြင်းကတ်စာလော၊ မဟုတ်ကေ သူရို့မာ ထာဝရဘုရား၏ တန်ခိုး ဟိရေလောဆိုစာကို ငါ သိရဖို့။ 20 အကြောင်းကား ထာဝရဘုရား၏ နိုင်ငံတော်မာ စကားပြောခြင်းစာ အဓိက မဟုတ်၊ ယေကေလည်း ထာဝရဘုရား၏ တန်ခိုးန နီထိုင်လုပ်စားခြင်းရာ အဓိက ဖြစ်တေ။ 21 နင်ရို့ ဇာ လိုချင်ကတ်တေလည်း? ငါ နင်ရို့တို့ ဇာ ယူခဖို့လည်း? ကြိမ်ဒုတ်လော မဟုတ်ကေ ချစ်ခြင်းမေတ္တာန နုညံ့ခြင်းစိတ်လော?