1Cor 5 | RmzSC | STEP | ယုဒမဟုတ်သူရို့တိုင်အောင် မပြစ်မှားစာ ဆိုးယုတ်စာ ကာမဂုဏ်အပြစ် နင်ရို့အထဲမာ ဟိရေဆိုစာကို ငါ ကြားရရေ။ ယင်းထက်မက နင်ရို့အထဲက တစ်ယောက်စာ ကိုယ့်အမိအနှောင်းကို ကိုယ့်မယားပိုင် နစပ်ရို့ ထားရေဆိုစာကိုလည်း ငါ ကြားရရေ။

1 Corinthians 5

အသင်းတော်မာ လူရို့ အကျင့်ပျက်ခြင်း

1 ယုဒမဟုတ်သူရို့တိုင်အောင် မပြစ်မှားစာ ဆိုးယုတ်စာ ကာမဂုဏ်အပြစ် နင်ရို့အထဲမာ ဟိရေဆိုစာကို ငါ ကြားရရေ။ ယင်းထက်မက နင်ရို့အထဲက တစ်ယောက်စာ ကိုယ့်အမိအနှောင်းကို ကိုယ့်မယားပိုင် နစပ်ရို့ ထားရေဆိုစာကိုလည်း ငါ ကြားရရေ။ 2 ယေကေလည်း နင်ရို့ ဘဝင်မြင့်နီကတ်တေ။ ယင်းထက်ပင် နင်ရို့ ရှက်ရို့ ဝမ်းနည်းဖို့ သင့်ကတ်တေ မဟုတ်လော? ဆိုးယုတ်စာ ကာမဂုဏ်အပြစ်ကို လုပ်နီသူကို နင်ရို့အထဲက ထုတ်ဘိုက်လိုက်ဖို့ သင့်ရေ မဟုတ်လော? 3 ငါ ကိုယ်တိုင် နင်ရို့နအတူ မဟိကေလည်း ငါ့ စိတ်စာ နင်ရို့နအတူ ဟိရေ။ အရာ ငါ ကိုယ်တိုင် နင်ရို့နအတူ ရောက်ရို့ ဟိသူပိုင် ထိုဆိုးယုတ်စာ ကာမဂုဏ်အပြစ် လုပ်နီသူကို အယင်ကပင် တရားဆုံးဖြတ်ရို့ ထားဗျာ။ 4 ငါ့ တရားဆုံးဖြတ်ချက်စာ ဒေပိုင်၊ နင်ရို့စာ ငါရို့မာ အသျှင်ယေရှုနာမည်န တစ်နေရာတည်းမာ စုကတ်တေခါ ငါ့ ဝိညာဉ်လည်း နင်ရို့နအတူ ရောက်ရို့ ဟိလိမည် အရာ ငါရို့ အသျှင်ယေရှု၏ တန်ခိုးစာ ငါရို့ဘားမာ ဟိလိမည်။ 5 ယင်းခါ ထိုလူကို ဒါဏ်အဖြစ် မာရ်နတ်အလက်မာ တင်အပ်လိုက်ကတ်။ ယင်းပိုင်ဆိုကေ သူ့ခန္ဓာစာ ပျက်စီးလိမည်၊ ယေကေလည်း သူ့ဝိညာဉ်စာ အသျှင်ယေရှု ကြွလာရေနိမာ ကယ်တင်ခြင်းကို ရလိမည်။

6 နင်ရို့ အကြီးအကျယ် စကားတိကို ပြောဖို့ မသင့်။ တဆီးတစ်ဖဲ့သျှေ ဂျုံမုန့်တစ်ခဲလုံးကို ရော့တက်အောင် လုပ်နိုင်ရေဆိုစာကို နင်ရို့ သိကတ်တေ မဟုတ်လော? ယင်းပိုင်တထန် အပြစ်လည်း ထိုတဆီးနတူရေ။ 7 ယင်းအတွက်န နင်ရို့အထဲက တဆီးအဟောင်းကို ထုတ်ဘိုက်လိုက်ကတ်။ ယင်းပိုင်ဆိုကေ နင်ရို့ တဆီးမထည့်စာ ဂျုံမုန့်အသစ် ဖြစ်ကတ်လိမည်။ အမှန် နင်ရို့ တဆီးမထည့်စာ ဂျုံမုန့်အသစ် ဖြစ်ကတ်တေ၊ အကြောင်းကား ငါရို့မာ လွတ်မြောင့်ခြင်းပွဲ၏ သိုးဆိတ်သျှေဆိုစာ ခရစ်တော်စာ ယဇ်ပူဇော်ခြင်းကို ခံရလီရေ။ 8 ယင်းအတွက်န လာလတ်၊ တဆီးမထည့်စာ ပေါင်မုန့်ဆိုစာ နုညံ့ခြင်းန မှန်ကန်ခြင်းကို ထားရို့ လွတ်မြောင့်ခြင်းပွဲကို ကျင့်ပကတ်မည်။ ယေကေလည်း တဆီးအဟောင်းဆိုစာ မနာလိုခြင်းန ဆိုးယုတ်စာ အကျင့်သီလကို စွန့်ပယ်ကတ်မည်။

9 ကာမဂုဏ်ကို လိုက်စားသူရို့န နင်ရို့ မပေါင်းဖေါ်ဖို့အတွက် ငါ အယင်တစ်ခေါက် နင်ရို့တို့ စာရွီးရို့ ပီးလီရေ။ 10 ယေကေလည်း ဒေ လောကမာ အကျင့်သီလ ပျက်သူရို့၊ လောဖကြီးသူရို့၊ အားဒမ လုယူသူရို့ အရာ ရုပ်တုကို ကိုးကွယ်သူရို့န မပေါင်းဖေါ်ဖို့အတွက် ငါ ပြောစာ မဟုတ်၊ အကြောင်းကား ယင်းပိုင်ဆိုကေ နင်ရို့ ဒေ လောကကို စွန့်ရို့ လားလီကတ်ရဖို့ဗျာ။ 11 ယေကေလည်း ငါ ရွီးလီစာ ဖြစ်တေကား ဒေပိုင်၊ အသူမဆို ကိုယ့်ကိုကိုယ် ကျုံသူညီအစ်ကို ဖြစ်တေ ဟို့ ပြောရို့ပင်လည်း သူစာ အကျင့်သီလ ပျက်တေ၊ လောဖတတ်တေ၊ ရုပ်တုကို ကိုးကွယ်ရေ၊ လူကို ဆဲရေ၊ ယစ်မုန်းငါးပါးကို သုံးရေ အရာ လူက အားဒမ လုယူရေဆိုကေ နင်ရို့ ယင်းသူန မပေါင်းဖေါ်လီကတ်ကေ့။ ယင်းထက်မက သူနအတူ ထိုင်ရို့တိုင်အောင်ပင် မစားသောက်လီကတ်ကေ့။

12 – 13 အသင်းတော်ပြင်က လူရို့ကို တရားစစ်ဆေးဖို့စာ ငါ့တာဝန် မဟုတ်။ ထာဝရဘုရား သူရို့ကို တရားစစ်ဆေးလိမည်။ ယေကေလည်း အသင်းတော်အထဲမာ အပြစ်လုပ်နီသူရို့ကို နင်ရို့ တရားစစ်ဆေးကတ်ရဖို့။ ကျမ်းစာမာ ရွီးရို့ ဟိရေ၊ “ဆိုးယုတ်သူကို နင်ရို့အထဲက ထုတ်ဘိုက်လိုက်ကတ်။”